Kigali: Abaganga babiri batawe muri yombi nyuma yo gutera umurwayi ikinya akitaba Imana

Yanditswe na IGIHE
Kuya 19 Ugushyingo 2019 saa 01:07
Yasuwe :
0 0

Abaganga babiri bakora muri Baho International Hospital batawe muri yombi bakurikiranyweho icyaha cy’ubwicanyi budaturutse ku bushake nyuma y’uko bateye ikinya umurwayi bikarangira yitabye Imana.

Batawe muri yombi kuri uyu wa Mbere nyuma y’uko umurwayi witwa Mukamurenzi Rosette bari bagiye kubaga mu nda bamuteye ikinya akitaba Imana.

Nyakwigendera yari asanzwe ari Umukozi wa Minisiteri y’Uburezi aho yakoraga nk’Umuyobozi w’Ibiro by’Umunyamabanga uhoraho.

Umuvugizi wa RIB, Marie Michelle Umuhoza, abajijwe iby’aya makuru yemeje ko ari impamo, ashimangira ko abantu bashinzwe kurengera ubuzima bakwiye guhora bitwararitse ku makosa kuko ashobora gutera ibyago.

Ati “Bakwiye kwirinda uburanganre, bakarangwa no gushishoza hamwe no gukurikiza amabwiriza mu gihe babungabunga ubuzima bw’ababagana kuko amagara arasesekara ntayorwa.”

Umuyobozi ushinzwe ibikorwa by’ubuvuzi muri Baho, Dr Thomas Iyakaremye, yabwiye IGIHE ko urupfu rwa Mukamurenzi rwababaje ndetse ko bihanganishije umuryango we.

Ati “Buriya iyo umuntu apfuye buri gihe cyane cyane twe dukora kwa muganga, ni ikintu kibabaje cyane ni yo yaba ari indwara imwishe. Turihanganisha umuryango we, twaravuganye tubabwira uko byagenze.”

Yasobanuye ko “mu by’ukuri nta makosa twavuga ngo itsinda ryari riri kumuvura ryakoze” ahubwo ko ari ikijya bibaho ko umurwayi 1/1000 ashobora kwitaba Imana ari kuvurwa ari nayo mpamvu mbere abaganga babanza bamusobanurira ibigiye kumukorerwa byose.

Ati “Iyo umuntu agiye kuvurwa muganga amusobanurira ati hari ingaruka izi n’izi uburyo tugiye kukuvuramo bushobora kugira cyangwa nyuma yo kuvurwa ushobora kugira ikibazo iki n’iki nubwo indwara yaba yakize. Niba ugiye kubagwa bakakubwira bati ushobora kuva, niba ugiye guterwa ikinya bakakubwira bati ushobora kugiterwa ntukanguke cyangwa kikaba cyagutwara ubuzima.”

Amategeko asobanura ko iyo umuntu yishe undi bw’ububuraburyo, uburangare, ubushishozi buke, umwete muke, kudakurikiza amabwiriza cyangwa ubundi buteshuke bwose ariko adafite umugambi wo kumwica, aba akoze icyaha.

Umuntu uhamijwe n’urukiko gukora icyaha cyo kwica bidaturutse ku bushake ahanishwa igifungo kitari munsi y’amezi atandatu ariko kitarenze imyaka ibiri n’ihazabu y’amafaranga atari munsi y’ibihumbi 500 Frw ariko atarenze miliyoni ebyiri cyangwa kimwe gusa muri ibyo bihano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza