Kigali: Abacuruzi 60 bafungiwe amaduka ku bwo kurenga ku mabwiriza ya COVID-19

Yanditswe na Tuyishimire Raymond
Kuya 14 Ukuboza 2020 saa 02:30
Yasuwe :
0 0

Akarere ka Nyarugenge kafunze amaduka y’abacuruzi bakorera mu Mujyi rwagati ahazwi nka Down Town mu gihe cy’ukwezi nyuma y’uko bene yo bagaragaye barenze ku mabwiriza yo kwirinda ikwirakwira ry’icyorezo cya COVID-19 arimo kutambara udupfukamunwa no kurenza umubare w’abagomba kwinjira mu iduka.

Igenzura ryafatiwemo aba bacuruzi 60 ryabaye ku gicamunsi cyo kuri uyu wa Mbere, rikurikira umuburo watanzwe n’abayobozi mu nzego zitandukanye w’uko hari ibikorwa byo kurenga ku mabwiriza yo kwirinda Coronavirus byagaragaye byanatumye iki cyorezo gikaza umurego.

Amaduka y’abafashwe yafunzwe mu gihe cy’ukwezi, bacibwa amande hagendewe ku mabwiriza barenzeho ndetse bajyanwa kwigishwa ingamba zo kwirinda iki cyorezo.

Umuyobozi Nshingwabikorwa w’Akarere ka Nyarugenge, Ngabonziza Emmy, yavuze ko bitewe n’uko abantu badohotse ku mabwiriza bakibwira ko Coronavirus yarangiye, bagiye gushyira imbaraga mu guhindura iyo myumvire.

Yagize ati “Ariko iteka ryose urugamba ruhindura isura bitewe n’ibihe tugezemo, uyu munsi wa none bitewe n’ibikorwa bigenda bifungurwa, birimo kugenda bisaba imbaraga zidasanzwe.’’

Akomeza ati “Navuga ngo ni urugamba rushya kuko na none uko abaturage bagenda babona boroherezwa gukora ibikorwa bitari bisanzwe bikorwa muri iki gihe cya COVID-19 barahita bumva yuko icyorezo cyarangiye. Biradusaba rero guhindura imirwanire ku buryo bidusaba gukaza ingamba n’iyubahirizwa ryazo cyane ko turangaye twakwisanga mu bihe twahozemo.’’

Umuvugizi wa Polisi y’Igihugu, CP Kabera John Bosco, yasabye abantu kwirinda Coronavirus aho gucungira inzego z’umutekano ku jisho.

Yakomeje ati “Nta mpamvu yo kudohoka, bumve y’uko kudohoka ari ukwitera ibyago, ari ukubitera abandi, ari ukubitera igihugu. Icyo bagomba kumenya n’uko bakwirinda Coronavirus ntabwo bafitanye ikibazo na Polisi, ntibakwiye kwirinda Polisi ahubwo bakore ibyo amabwiriza abasaba.’’

Icyemezo cyo gufunga amaduka y’abacuruzi barenze ku mabwiriza yo kwirinda Coronavirus, cyafashwe nyuma yaho hakomeje kugaragara umubare uri hejuru w’abandura COVID-19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .