00:00:00 IGIHE NETWORK KN KINYARWANDA EN ENGLISH FR FRANCAIS

Aba mbere mu midugudu ya Kangondo na Kibiraro bimuriwe mu nzu nshya mu Busanza (Amafoto)

Yanditswe na IGIHE
Kuya 29 Ugushyingo 2020 saa 07:19
Yasuwe :
0 0

Icyiciro cya mbere kigizwe n’imiryango 14 yari ituye mu midugudu ya Kangondo I, Kangondo II na Kibiraro I mu Mujyi wa Kigali, yamaze kwimukira mu nzu nshya yubakiwe mu Karere ka Kicukiro, ahazwi nko mu Busanza.

Kuwa Gatatu ubwo Minisitiri w’Ubutegetsi bw’Igihugu Prof Shyaka Anastase yagiranaga inama n’aba baturage bo mu gice kizwi nka Bannyahe, nibwo byatangajwe ko mu gihe inzu zo mu Busanza bagomba kwimurirwamo zigeze ku musozo zubakwa, hari imiryango 48 yiteguye kwimuka kuri iki Cyumweru.

Gusa ku ikubitiro himutse imiryango 14 nk’uko RBA yabitangaje, mu gihe igikorwa cyo kwimura indi miryango nacyo kizakurikira.

Mu nama yo kuwa Gatatu, hari abaturage bavugaga ko banyotewe no guhita bajya muri izo nzu, barimo Munyemana Ildephose.

Yabwiye Minisitiri Shyaka ati “Akabazo gato cyane nenda kukwibariza, ahubwo urufunguzo rw’iyo nzu waruzanye ngo urumpe?”

Bitewe n’ingano y’imitungo umuntu yari ahafite, azagenda ahabwa inzu ziri mu byiciro bitatu, iy’icyumba kimwe n’uruganiriro, iy’ibyumba bibiri n’uruganiriro cyangwa iya bitatu n’uruganiriro, nk’ingurane y’aho yari atuye. Igice kinini cyane ni abazahabwa icyumba kimwe n’uruganiriro.

Umwe mu baturage yagaragaje impungenge ko inzu y’icyumba itari ikwiriye umuntu ufite umuryango, byongeye wabyaye ufite abana b’ibitsina byombi, bagasaba ko iyo gahunda yasubirwamo.

Yakomeje ati “Hano twese turi bakuru, twarabyaye, nkanjye mfite umukobwa w’imyaka 18, mfite n’umuhungu w’imyaka 16. Mwese mwarabyaye muzi uburyohe bw’urugo, muzi n’ibibera mu bubiri. Iyo umugore atabyubahirije, arasenya. Ndibaza nti ni gute umugore n’umugabo bazubaka urugo abana bateze amatwi, cyangwa babareba?”

“Ikindi kibabaje muri iyi minsi harimo kuvugwa ababyeyi bafata abana babo ku ngufu, abagabo bafata abana b’abandi ku ngufu, abasambanya bashiki babo, n’ubu mwumvise umugabo w’imyaka 40 wasambanyije umubyeyi we, kandi benshi tubana n’ababyeyi bacu. Ese ntimwaba mugiye guha polisi akazi katari ngombwa?”

Yavuze ko bafite impungenge ku hazaza h’abana, asaba ko hakurikizwa itegeko, bagahabwa ingurane zikwiye mu mafaranga, bakimukira aho bashaka.

Umuyobozi w’Umujyi wa Kigali, Pudence Rubingisa, yijeje ko hari ibikoresho by’ibanze iyi miryango izajya igenda isaga mu Busanza, ku buryo bizayunganira mu kwisuganya mu gihe bakimenyera imiturire mishya.

Inkuru wasoma: Aba mbere mu batuye muri Bannyahe bagiye kwimurirwa mu Busanza (Amafoto)

Aba baturage bari batuye nabi muri Bannyahe
Bahawe ingurane z'inzu ku butaka bari batuyeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .