Kigal: Ibikorwa byo gutanga amaraso ahabwa abarwayi birakomeje muri ’Car Free Zone’

Yanditswe na Ishimwe Deborah
Kuya 2 Nzeri 2020 saa 08:37
Yasuwe :
0 0

Abatuye Umujyi wa Kigali kuri uyu wa Gatatu tariki 2 Nzeri 2020, bahuriye ahazwi nka Car Free Zone, bakomeza ibikorwa byo gutanga amaraso.

Ni igikorwa cyateguwe na Banki y’Ubucuruzi ya Access Bank Plc binyuze mu ishami ryayo ryita ku bagore, Maternal Health Care ifatanyije n’Ikigo cy’Igihugu cyo gutanga amaraso, Inzira Collect na Iby’Iwacu.

Iki gikorwa cyari gifite insanganyamatsiko igira iti ‘Rengera ubuzima bw’umubyeyi, tanga amaraso, tanga ubuzima.’ Kigamije gukusanya amaraso azahabwa abantu bayakenera cyane cyane abagore babyara bakagira ikibazo cyo kuva.

Uwari uhagarariye Umuyobozi wa Access Bank Rwanda mu itangizwa ry’iki gikorwa, Natacha Sandrine Umuhoza, avuga ko hejuru y’akazi bakora nka banki bagira n’ibindi bikorwa bifasha igihugu bakora.

Yakomeje avuga ko nka banki bahisemo gutera igikorwa cyo gutanga amaraso inkunga kuko bemera ko umuntu atatera imbere adafite ubuzima bwiza.

Yagize ati “Iki gikorwa twahisemo kukinyuza mu ishami tugira muri Access Bank kubera ko twatekereje tugasanga abagore bari mu bantu bakenera amaraso kenshi, cyane mu gihe babyara bakunze kugira ibibazo bitandukanye bituma bakenera amaraso, kandi kugira ngo umuntu atere imbere agomba no kuba afite ubuzima buzira umuze.’’

Iki gikorwa cyo gutanga amaraso kizamara iminsi itatu aho kizarangira ku wa 4 Nzeri 2020.

Umuyobozi w’Ikigo cy’Igihugu cyo gutanga amaraso, Dr. Gatare Swaibu, yashimye ubufatanye bwa Access Bank muri iki gikorwa cyo gutanga amaraso.

Yagize ati “Iki gikorwa cyasaga naho cyahagaze kuva COVID-19 yagera mu Rwanda, gusa nyuma twaje gusanga gikenewe twifatanya n’abafatanyabikorwa mu ishami rya Access Bank Rwanda, ryita ku bagore kugira ngo iki gikorwa kibashe kuba.”

Bitewe n’icyorezo cya Coronavirus, ibikorwa byo gutanga amaraso mu mashuri n’insengero byarahagaze kubera ko byafunzwe ariko ahandi byarakomeje nk’uko bisanzwe.

Umuyobozi wa Ibyiwacu, Umulisa Fiona Cecile, avuga ko Abanyarwanda bakwiriye kurushaho kugira umuco wo gutanga amaraso kuko batayatanze nta handi yava kandi akenerwa na benshi.

Umwe mu bitabiriye iki gikorwa cyo gutanga amaraso, Akingabire Marie Claire, avuga ko gutanga amaraso ari igikorwa akora yishimiye kuko yabonye umuntu abantu benshi babura ubuzima kubera kubura amaraso bikamutera agahinda.

Mu butumwa bwe yashishikarije abandi gutanga umusanzu muri iki gikorwa cy’ubutwari bagatanga ubuzima ku bandi.

Indege nto zitagira abapilote za Zipline zimaze kuba ubukombe mu gikorwa cyo kugeza amaraso kwa muganga mu bice bitandukanye by'igihugu
Umwe mu bitabiriye igikorwa cyo gutanga amaraso, Akingabire Marie Claire, atanga amaraso
Amaraso azatangwa mu gufasha abantu bayakenera cyane cyane abagore babyara bakagira ikibazo cyo kuva
Igikorwa cyateguwe na Banki y’Ubucuruzi ya Access Bank Plc binyuze mu ishami ryayo ryita ku bagore, Maternal Health Care ifatanyije n’Ikigo cy’Igihugu cyo gutanga amaraso, Inzira Collect na Iby’Iwacu
Umuyobozi wa Ibyiwacu, Umulisa Fiona Cecile, yavuze ko Abanyarwanda bakwiriye kurushaho kugira umuco wo gutanga amaraso
Uhagarariye Umuyobozi wa Access Bank Rwanda, Natacha Sandrine Umuhoza, aganira n'itangazamakuru
Umuyobozi w’Ikigo cy’Igihugu cyo gutanga amaraso, Dr. Gatare Swaibu, yashimye ubufatanye bwa Access Bank mu gikorwa cyo gutanga amaraso
Access Bank itanga serivisi zitandukanye z'imari
Access Bank Rwanda iri mu mabanki y'ubucuruzi akorera ku butaka bw'u Rwanda

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .