Kicukiro: Umusore yafashwe n’umuriro w’amashanyarazi arapfa

Yanditswe na Thamimu Hakizimana
Kuya 19 Gashyantare 2020 saa 06:18
Yasuwe :
0 0

Umusore witwa Bizimana Claude w’imyaka 18 wakoreraga mu Murenge wa Niboye mu Karere ka Kicukiro, yakoze ku rutsinga rw’amashanyarazi aramufata ahita yitaba Imana.

Ahagana saa saba n’igice z’amanywa yo kuri uyu wa Gatatu tariki ya 19 Gashyantare 2020, nibwo uyu musore yishwe n’umuriro ubwo yari avuye mu kiruhuko asubiye ku kazi.

Amakuru aturuka mu Murenge wa Niboye avuga ko nyakwigendera Bizimana uvuka mu karere ka Ngororero yari kumwe na mugenzi we basubiye ku kazi, mugenzi we akoze ku rutsinga yumva harimo umuriro, Bizimana na we ashaka kumwigana ngo akoreho umuriro uhita umufata uramuhitana.

Bizimana akimara gufatwa n’amashanyarazi, abaturage bahise bahamagaza imodoka y’imbangukiragutabara n’inzego z’umutekano

Umunyamabanga Nshingwabikorwa w’umusigire w’Umurenge wa Niboye, Sylvie Mutesi yemereye IGIHE iby’aya makuru.

Yagize ati “ Nibyo yishwe n’amashanyarazi. Ngo yari kumwe na mugenzi we w’umufundi basubiye ku kazi mugenzi we abona urutsinga rw’amashanyarazi arukoraho ahita amubwira ngo uzi ko harimo amashanyarazi ? Ni uko na we aza kurukoraho ngo yumve ahita apfa.”

Muvugizi wa Polisi mu mujyi wa Kigali CIP Umutesi Marie Goretti yasabye abaturage kwirinda gukorakora buri kintu cyose kiba kirimo amashanyarazi mu rwego rwo kwirinda impanuka za hato na hato.

Ati “ Icyo twasaba abaturage ni ukwirinda gukora ikintu cyose kirimo amashanyarazi bakanatanga amakuru y’ahantu hose babona hari ikintu cyahungabanya umutekano wabo.”

Umurambo wa nyakwigendera wajyanywe ku bitaro bya Kacyiru ngo ikorerwe isuzuma.

Umusore wo mu karere ka Kicukiro yafashwe n'umuriro w'amashanyarazi ubwo yari akoze ku ntsinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .