00:00:00 IGIHE NETWORK KN KINYARWANDA EN ENGLISH FR FRANCAIS

Kicukiro: Umushoferi yafashwe agerageza gupfumbatiza umupolisi ibihumbi 20 Frw

Yanditswe na IGIHE
Kuya 26 Mutarama 2023 saa 08:28
Yasuwe :

Polisi y’u Rwanda yafashe umushoferi ubwo yageragezaga guha umupolisi ruswa y’ibihumbi 20 Frw kugira ngo yoroherezwe kubona icyemezo cy’ubuziranenge bw’imodoka.

Ku wa Gatatu, tariki ya 25 Mutarama 2023, ni bwo uyu mushoferi yafatiwe i Gikondo mu Karere ka Kicukiro ahamaze iminsi hakorera imashini isuzuma ubuziranenge bw’ibinyabiziga. Iyi mashini ikora yimuka mu korohereza abakeneye iyi serivisi bari kure y’ibigo biyitanga bihoraho.

Umuvugizi wa Polisi y’u Rwanda, CP John Bosco Kabera, yavuze ko uwo mushoferi yatanze ruswa azi ko iri bumufashe kubona icyemezo cy’ubuziranenge nyuma y’uko imodoka ye yari imaze gutsindwa igenzura yakorewe.

Yagize ati "Imodoka yo mu bwoko bwa Toyota Carina itwarwa n’uriya mushoferi, mu kuyisuzuma basanze ivubura imyotsi myinshi ari nabyo byatumye asabwa kubanza kujya kuyikoresha."

Yakomeje ati "Icyakurikiyeho ni uko aho kujya kuyikoresha ahubwo yigiriye inama yo kwegera umupolisi ashaka kumupfumbatiza ibihumbi 20 Frw. We na bagenzi bakoranaga bahise bamufata."

CP Kabera yaburiye abatekereza gukemura ibibazo binyuze muri ruswa ko bahindura imyumvire.

Ati "Abantu bakwiye kumva ko bagomba kubahiriza ibiteganywa n’amategeko bakirinda guca mu nzira z’ubusamo ngo bahabwe serivisi batanze ruswa kuko bihanirwa n’amategeko. Bazafatwa, ari amafaranga bayahombe, ntibabone serivisi bashaka kugura kandi banashyikirizwe ubutabera."

Uwafashwe n’amafaranga yafatanywe yashyikirijwe Urwego rw’Igihugu rw’Ubugenzacyaha (RIB) ngo hakorwe iperereza ku cyaha akurikiranyweho.

Itegeko no 54/2018 ryo ku wa 13/08/2018 rirwanya ruswa, ingingo yaryo ya Kane ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Umushoferi yafashwe agerageza gupfumbatiza umupolisi ibihumbi 20 Frw ngo ahabwe icyemezo cy'ubuziranenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .