Kicukiro: Umugabo arakekwaho gutemera abantu babiri mu kabari

Yanditswe na Mukahirwa Diane
Kuya 22 Ugushyingo 2020 saa 06:27
Yasuwe :
0 0

Polisi y’u Rwanda iri gushakisha umugabo wo mu karere ka Kicukiro ukekwaho gutemera abantu babiri mu kabari agahita atoroka.

Mu ijoro ryo kuri uyu wa Gatanu kuya 20 Ugushyingo, mu karere ka Kicukiro mu murenge wa Gatenga umugabo yatemye abantu babiri mu kabari ke bapfuye ko bari banze kumwishyura.

Uwo mugabo bivugwa ko yari asanzwe afite iduka, mu bihe bya coronavirus akarihindura akabari. Kuwa Gatanu muri iryo duka haje kunywera abagabo babiri, abishyuje babura ayo kwishyurira abakobwa bari biriwe basangira, afata umwanzuro wo kubatema arabakomeretsa.

Umuvugizi wa Polisi w’Umujyi wa Kigali, CIP Sylvestre Twajamahoro, yabwiye IGIHE uwo mugabo amaze gutema abo bantu, yahise atoroka inzego z’umutekano zahagera zikamubura, niko gutangira kumushakisha.

Ati “Inzego z’umutekano ziri gukorana kugira ngo uyu mugabo afatwe ndetse aryozwe ibyo yakoze. Hari amakuru avuga ko yaba ari mu karere ka Gicumbi iperereza ricyakomeje ari gushakishwa.”

CIP Twajamahoro yihanangirije abaturage kujya mu tubari kandi bibujijwe muri ibi bihe byo kwirinda Coronavirus, abasaba kandi kwirinda amakimbirane.

Umugore w’ukekwa yahise atabwa muri yombi ndetse n’abo bakobwa babiri bavugwaho kuba bari biriwe basangira n’abatemwe, mu gihe abakomerekejwe bo bari kwitabwaho n’abaganga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .