Kayonza: Umudugudu wasize inzu zose irangi risa (Amafoto)

Yanditswe na Hakizimana Jean Paul
Kuya 24 Mata 2019 saa 06:43
Yasuwe :
0 0

Mu gihe buri gace mu Rwanda usanga kagira umwihariko waba karemano cyangwa uwahanzwe n’abantu, umudugudu wa Nkodo ya ll mu Murenge wa Rwinkwavu wahisemo guhanga agashya, wiyemeza ko inzu zose zisigwa irangi ry’ubururu.

Abawutuye bagira udushya twinshi turimo ibiro by’umudugudu byiyubakiwe n’abaturage, kuba ku bufatanye bw’abaturage buri wese yarabashije kugura radiyo na matola, bakagira n’imipira yanditseho Nkondo ll n’ibindi.

Bavuga ko basanze gutera irange ry’ubururu ku nzu zose ari byo bigezweho, hagamijwe gusukura inzu ngo n’uhagera ajye yishimira isuku iharangwa.

Uyu mudugudu ufite ingo 84, gutera irangi bakaba barabibariye ingengo y’imari ya miliyoni imwe n’igice amafaranga y’u Rwanda, azagenda ava mu matsinda yo kwizigamira yashyizweho n’abaturage b’uyu mudugudu.

Umuyobozi w’umudugudu wa Nkondo ya ll, Baribuka Laurent, avuga ko gutera irangi ku nzu zose zigize uyu mudugudu ari igikorwa cyateguwe n’abaturage ubwabo.

Ati “Ubufatanye burangwa mu mudugudu wacu nibwo butuma tugera kuri byinshi, twamaze kubaka amatsinda ane tugenda dutangiramo amafaranga buri wese n’uko yifite, hanyuma tukayahuriza hamwe tukareba ikintu runaka dukeneye mu mudugudu ubundi tukagikora.”

Yakomeje avuga ko bateye irangi mu rwego rwo gukora isuku mu mudugudu wabo, kuko nubwo ari mu cyaro, nibura umuntu uhageze abona ko basobanutse.

Abaturage buzuzanya n’ubuyobozi

Twizeyimana Jean Baptiste utuye muri uyu mudugudu, avuga ko ibyo bageraho byose babikesha umuyobozi mwiza w’umudugudu, utekereza kure akanamenya guhanga udushya.

Ati “Ubundi byatangiye dufite inzu ziriho ibishonyi gusa, adushyira mu mashyirahamwe ane twese buri kwezi tukagenda dutangana udufaranga duke duke, ageze aho adukoresha inama twumvikana ko twatera umucanga ku nzu zacu twese turabikora.”

“Dukomeza dutanga udufaranga duke duke buri kwezi nanone arongera ati mureke tuvugurure dutere kabarasasu, nuko dukora kuri konti y’umudugudu buri muturage turayimuterera. Ikindi nakubwira iyo hari ufite inzu itaragera ku rwego rw’uko twayitera irange turabanza tukamufasha kuyuzuza neza ubundi tukamuterera.”

Nyiranizeyimana Francine we avuga ko iki gikorwa bacyibonamo bose kuko mbere y’uko bivugwa mu nama y’umudugudu, babanza kubiganirira mu itsinda bakabyemeranyaho.

Mukadiyama Verene we yagize ati “Ntabwo ari itegeko ni ibintu twumvikanye twese kugira ngo tube heza, rero uje gutera irangi ahera ruhande agatera umudugudu wose ikindi turanafashanya n’udafite amafaranga kuburyo nawe atererwa umudugudu wose ugasa.”

Umuntu ubasigira irange biyemeje kumwishyura ibihumbi 500 Frw, andi bakazajya bayamwishyura buhoro buhoro kugeza bayamazemo. Uyu mudugudu uherutse guhembwa n’Akarere nk’umudugudu wahize iyindi mu miyoborere myiza.

Ibyo abaturage bo mu Karere ka Kayonza bakoze ntibyari bisanzwe mu Rwanda ariko mu bindi bice ho bijya bikorwa. Nko muri Maroc, hari umujyi witwa Chefchaouen wamamaye kubera inzu z’ubururu bwerurutse ziharangwa.

Ucyinjira muri uyu mudugudu ubona icyapa kinini kiguha ikaze
Ibiro by'umudugugu wa Nkondo II byubatswe mu bushobozi bw'abaturage
Abaturage bafite imyenda isa muri uyu mudugudu
Chefchaouen, ni Umujyi wo muri Maroc ufite inzu zisa zose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza