00:00:00 IGIHE NETWORK KN KINYARWANDA EN ENGLISH FR FRANCAIS

Kayonza: Miliyoni 328 Frw zashowe mu gusangiza urwunguko abaturiye Pariki y’Akagera

Yanditswe na Hakizimana Jean Paul
Kuya 29 June 2022 saa 08:53
Yasuwe :

Abaturage bo mu mirenge itanu yo mu Karere ka Kayonza bubakiwe ibikorwaremezo bitandukanye byatwaye asaga miliyoni 328 Frw mu rwego rwo kubasaranganya inyungu yaturutse muri Pariki y’Akagera baturiye, bakaba basabwe gukomeza kuyibungabunga no gutanga amakuru ku bagifite akayihayiho ko kujya guhiga inyamaswa.

Ni ibikorwaremezo byubatswe mu Mirenge ya Rwinkwavu, Kabare, Mwiri, Gahini na Murundi. Mu byubatswe harimo Isoko rya Kageyo, Agakiriro ka Cyarubare, Ibagiro rya kijyambere rya Rwinkwavu.

Hubatswe kandi inzu ibamo abarimu mu Murenge wa Murundi no mu Murenge wa Gahini, amashanyarazi yatanzwe mu Mudugudu wa Gisunzu mu Murenge wa Mwiri ndetse no ku ishuri ryisumbuye rya Ndego.

Karama Joseph ushinzwe ubufatanye hagati ya Pariki y’Akagera n’abayituriye yavuze ko ibikorwaremezo bubakiye abaturage bigamije kubereka ko Pariki ari iyabo ari nayo mpamvu bagomba kubona inyungu ziyiturukamo.

Ati “Iyo abaturage bakorewe ibikorwaremezo nk’ibi bakabona aho bacururiza ibyo bahinze n’ibindi barushaho kwibonamo ya Pariki bakabona ko ibafitiye akamaro babandi bajyamo guhiga bakabatanga tukabashyikiriza Polisi bagahanwa.”

Yavuze ko nibura abaturage babona inyungu ituruka kuri Pariki ari abayituriye mu birometero icumi amakoperative yo ngo bayasaba gukora imishinga bakayibagezaho ubundi bakabatera inkunga.

Niyonsenga Claudine udodera muri koperative yitwa Abahuje ba Kabare ikorera mu Gakiriro ka Cyarubare igizwe n’abanyamuryango 25 yavuze ko bakidoda buri umwe ukwe nta bakiriya bagiraga.

Ngo buri umwe nibura yashoboraga kwinjiza 1000Frw ku munsi none ngo ubu buri wese asigaye yinjiza inyungu ya 5000Frw ku munsi kubera gukorera ahantu heza kandi hazwi.

Amizero Juvens usudirira muri aka Gakiriro we yavuze ko yashimiye Pariki y’Igihugu y’Akagera yabubakiye agakiriro keza katumye bakorera ahantu heza hashobora no gutuma buri umwe yinjiza inyungu y’ibihumbi 15Frw ku munsi mu gihe byagenze neza.

Yagize ati “Twakoreraga ku muhanda twirirwa tunyagirwa izuba rituri ku mutwe ariko ubu turakorera ahantu hasakaye, ubu turakorera ahantu hari abakiliya ku munsi nibura ushobora gucyura inyungu y’ibihumbi 15Frw kuko turi abasuderi bane.”

Mukangwije Florida ucururiza mu isoko rya Kageyo riherereye mu Murenge wa Mwiri we yavuze uburyo bacururizaga hanze imvura yagwa ikanyagira ibicuruzwa byabo, yashimiye Leta na Pariki y’Akagera yabafashije gukorera ahantu heza, avuga ko kuri ubu bahitezeho inyungu irenze iyo bakuraga aho bakoreraga hanze.

Mukamakuza Esperance we yagize ati “ Mbere twacururizaga ku muhanda, imvura yagwa tukirukanka bikanyanyagira yahita tukaza gucururiza mu byondo none ubu turishimye, mu mvura turacuruza nijoro tugacuruza iri soko ryaduteye kongera igishoro.”

Umuyobozi w’Akarere ka Kayonza, Nyemazi John Bosco, yashimiye Pariki y’Akagera uburyo igira uruhare mu iterambere ry’abaturage ba Kayonza, yasabye abaturage kubungabunga ibikorwaremezo bubakiwe.

Ati “Turabasaba kubyitaho kugira ngo bitangirika kuko ibyinshi batangiye kubikoresha.”

Kuva mu 2004 Pariki y’Igihugu y’Akagera imaze gushora mu kubakira ibikorwaremezo abaturage b’Akarere ka Kayonza bifite agaciro k’asaga miliyari 4 Frw birimo amavuriro, amashuri, kugeza amashanyarazi ku baturage n’ibindi byinshi bitandukanye byose bikorwa mu rwunguko ruba rwavuye mu basura iyi parike.

Agakiriro ka Cyarubare kuzuzye ku bufatanye bwa Pariki y'Akagera
Abubakiwe agakiriro byabafashije gukorera ahantu heza
Isoko rya Kageyo ryubatswe na Pariki y'Akagera ryafashije abaturage gukorera ahantu heza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .