00:00:00 IGIHE NETWORK KN KINYARWANDA EN ENGLISH FR FRANCAIS

Kayonza: Imyigishirize izira inkoni yazamuye imitsindire

Yanditswe na Hakizimana Jean Paul
Kuya 22 Ukuboza 2022 saa 11:42
Yasuwe :

Abarimu bo mu turere twa Kayonza, Bugesera na Ruhango baravuga imyato porogaramu nshya yo kwigisha abana bakina nabo kuko byatumye biyumvanamo binabafasha kuzamura ikigero cy’imitsindire mu ishuri ndetse no mu bizamini bya Leta.

Ibi byagaragajwe kuri uyu wa Gatatu tariki ya 21 Ukuboza 2022 ubwo hasozwaga porogaramu yiswe ‘ Great’(Gender Responsive Education and Transformation) yari igamije guteza imbere imyigire n’imyigishirize bibanda ku ihame ry’uburinganire.

Ni Porogaramu yazanywe na Right to Play ikaba imaze imyaka itanu kuva 2018-2022, yakorerwaga mu turere twa Kayonza, Bugesera na Ruhango ku bufatanye bwa Minisiteri y’Uburezi, right to Play na Umuhuza.

Muri iyi porogaramu abarimu bigishijwe uko baca igihano kibabaza umubiri mu gihe bari kwigisha abana, amashuri yubakiwe icyumba cy’umukobwa, hatangwa ibikoresho by’imikino aho hari n’ibigo byubakiwe ibibuga.

Hashinzwe ‘clubs’ zifasha abana kwitinyuka mu ruhame bakiyumvamo kuyobora, gufasha abana kuva mu ngorane z’ubuzima ndetse no guhugura abashinzwe uburezi n’abarimu.

Bisengimana François ushinzwe porogaramu muri Right to Play, yavuze ko mu myaka itanu bamaze bashyira mu bikorwa uyu mushinga bageze kuri byinshi birimo no kubasha kwinjiza ikijyanye no kwigisha abana hakoreshejwe imikino.

Ati “ Ubu twazanye umushinga utuma abarimu bakoresha imikino bigatuma abana biyumvamo abarimu, bakabona ishuri nk’ahantu ho kuruhukira kuburyo biga bakina bikabafasha gufata ibintu vuba.”

Akarere ka Kayonza kagaragaza ko uyu mushinga utari watangira kugakoreramo abana batsindaga kuri 82% abenshi ngo batinyaga gukora ibizamini bagaragaza ko nibatsindwa ari igisebo, aho ngo uyu mushinga utangiye kuhakorera kuri ubu basigaye batsinda kuri 98% . Abakobwa batsinda ibizamini ngo bavuye kuri 82,8% bagera kuri 95,3%.

Abarimu ntibiyumvishaga ko bakwigisha badakubita abana

Bamwe mu barimu bavuze ko batari bahabwa amahugurwa ngo bumvaga batashobora kwigisha abana ngo basoze umunsi batabakubise kuko bumvaga aribwo bari kubarera neza.

Aho bamariye guhugurwa ngo basanze kwigisha umwana neza ari ukumwigisha museka, mukina muganira ngo kuko bituma akwiyumvamo.

Tuyisenge Patrick uturuka mu Karere ka Ruhango ku kigo cy’amashuri cya Nyundo, yavuze ko ngo mbere bakoreshaga amarangamutima mu guhana abana rimwe na rimwe bikaba byanatuma umwana yava mu ishuri.

Ati “Ubu twamenye kugenzura amarangamutima yacu cyane cyane imbere y’abana ubundi wagiraga umujinya ugahita wumva ushaka guhana umwana umukubita inkoni ariko ubu twarisobanukiwe, duhindura imyitwarire aho biri no mu byadufashije kwegerana n’abana twigisha cyane bituma banatsinda neza.”

Umuyobozi w’Akarere ka Kayonza, Nyemazi John Bosco, yavuze ko kuri ubu bishimira ibyiza byavuye muri uyu mushinga.

Kuri ubu iyi porogaramu irangiye abana ibihumbi 81 498 aribo bamaze kugerwaho, hahuguwe abarimu 1649 hubakwa ibikorwaremezo birimo ibibuga n’ibyumba by’abakobwa mu turere twa Bugesera, Kayonza na Ruhango.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .