Kayonza: Imibiri y’abazize Jenoside yajugunywe muri ‘Barrage’ igiye gukurwamo

Yanditswe na Emma-Marie Umurerwa
Kuya 23 Mata 2019 saa 03:29
Yasuwe :
0 0

Imibiri y’abazize Jenoside yakorewe Abatutsi bo mu bice bitandukanye bigize Akarere ka Kayonza, yajugunywe mu rugomero ruzwi nka ‘Barrage’, izakurwamo muri Nyakanga 2019, ishyingurwe mu cyubahiro.

Uru rugomero ruri mu Mudugudu wa Karambi, Akagali ka Gikaya hagati y’Umurenge wa Ruramira n’uwa Nyamirama, rwifashishwa mu kuhira ibihingwa birimo umuceli.

Muri Jenoside yakorewe Abatutsi hajugunywemo imibiri y’abishwe kugeza n’ubu ntirabasha gukurwamo kubera amazi yarwo.

Kuva mu 1994 kugeza ubu hamaze gukurwamo imibiri 53 gusa, mu gihe amakuru yatanzwe muri Gacaca yavugaga ko hajugunywemo abasaga 3000.

Nduwayo Alphonse, ni umwe mu bacitse ku icumu uvuga ko muri urwo rugomero hajugunywemo bamwe mu bo mu muryango we.

Yabwiye IGIHE ati “Urugomero ni rurerure cyane kandi hasi harimo isayo. Iyo ari mu gihe cy’izuba tujya kubona tukabona imwe mu mibiri irareremba hejuru, ariko itangiye kugaragara muri iyi myaka ya vuba kuko ubona ko amazi atangiye kugabanuka.”

“Ubuyobozi bukwiye kudufasha gukamuramo amazi tukabona uko dukuramo imibiri y’abacu yajugunywemo.”

Umuyobozi w’Akarere ka Kayonza, Murenzi Jean Claude, yabwiye IGIHE ko iyi mibiri izakurwamo mu gihe cya vuba.

Ati “Ikibazo kirazwi kandi dufatanyije n’izindi nzego cyahawe umurongo. Icyo nakubwira nuko RAB yatwemereye ko mu kwezi kwa karindwi abahinzi bamaze gusarura umuceli, hazabaho igikorwa cyo gukamya urugomero amazi namara gushiramo hatangire igikorwa cyo gushakisha imibiri.”

Ubwo hibukwaga Abatutsi biciwe mu bice bitandukanye bigize Umurenge wa Nyamirama, Umuyobozi wa Ibuka mu Karere ka Kayonza, Ndindabahizi Didas, yavuze ko uretse muri “Barrage” hari n’ahandi hirya no hino hakiri imibiri y’Abatutsi itarashyingurwa.

Ati “Mu murenge wa Mukarange ahari paruwasi ya EER Nyagatovu, mu buhamya batubwira ko hari abantu bagera kuri 300, interahamwe zaraje zirabica bararangira. Ku mugoroba haje imodoka y’umucuruzi witwa Kanyangonga, bayipakiramo abo bishe bajya kubajugunya ntirashyingurwa kugeza ubu. Mu byari ibisi bya Rwinkwavu naho hari imibiri n’ubu itaravamo.”

Yakomeje asaba abatuye mu Karere ka Kayonza bazi ahari imibiri itashyingurwa gutanga amakuru kugira ngo nayo ishyingurwe mu cyubahiro.

Meya wa Kayonza, Murenzi Jean Claude avuga ko muri Nyakanga imibiri y'abazize Jenoside yakorewe Abatutsi yajugunywe muri Barrage izakurwamo
Muri uru rugomero hajugunywemo imibiri myinshi y'abazize Jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza