Kayonza: Bihaye ibyumweru bibiri byo kuvugurura imyubakire nyuma yo kunengwa na Perezida Kagame

Yanditswe na Hakizimana Jean Paul
Kuya 17 Ugushyingo 2020 saa 03:31
Yasuwe :
0 0

Ubuyobozi bw’Akarere ka Kayonza bufatanyije n’Urugaga rw’Abikorera, batangaje ko bihaye ibyumweru bibiri byo kuvugurura inzu zose zegereye umuhanda no kuzishyiraho ama- pavé nyuma yaho banenzwe na Perezida Kagame.

Tariki 30 Ukwakira 2020 ubwo hatangazwaga uko uturere twakurikiranye mu mihigo, Umukuru w’Igihugu yanenze uburyo mu Mujyi wa Kayonza usanga abantu bubaka inzu nziza ariko imbere ahagana ku muhanda ntibahakorere isuku.

Yavuze ko ahenshi yahabonye inzu nziza ariko imbere ugasanga ifite umwanda n’ibitaka, yibabaza uburyo umuntu abona ubushobozi bwo kubaka inzu nziza ariko akananirwa kuyikorera isuku imbere kugira ngo irusheho gusa neza cyane.

Ni ibintu byateye ipfunwe ubuyobozi bw’Akarere ka Kayonza n’abikorera, biyemeza kugira icyo bakora kugira ngo umujyi wabo urusheho gusa neza.

Umuyobozi w’Urugaga rw’Abikorera mu Karere ka Kayonza, Rugigana Jean Bosco, yabwiye IGIHE ko nyuma yo kunengwa n’Umukuru w’Igihugu bakoze inama bakiha ibyumweru bibiri byo kuvugurura ibice byose byegereye umuhanda.

Ati “ Twakoze inama twiyemeza kwiha ibyumweru bibiri byo kuvugurura, hari abantu batari bashyizeho ama- pavé ku nzu zabo ubu bari kuyashyiraho, hari n’abandi batari barashyizeho amakaro mu rwego rwo gutuma inzu isa neza nabo bari kuyashyiraho, twafashe icyemezo ko nibura ukwa cumi na kumwe kurangira byose birangiye.”

Rugigana yavuze ko akenshi nk’abikorera bagendera mu murongo leta iba yashyizeho ari nayo mpamvu bateganya n’utundi dushya twinshi nyuma yaho bamenye ko mu Mujyi wa Kayonza hagiye gushyirwamo kaburimbo mu bilometero bine n’igice.

Ati “Urumva ahatari hari kaburimbo ahenshi hari hari icyondo ku buryo wanasangaga abahacururiza batinya kuhashyira ama-pavé ariko nibamara kuyidushyiriramo tuzasaba abikorera kugira icyo bakora ku nzu zabo ziri aho ngaho ku buryo isura y’umujyi izahita ihinduka.”

Umuyobozi w’Akarere ka Kayonza, Murenzi Jean Claude, we yavuze ko bakoranye inama n’abashinzwe urugaga rw’abikorera bakabasaba kuvugurura inzu bakoreramo, ngo icyo leta izajya ibafasha ni ukubakorera ubugenzuzi n’ubujyanama ku buryo bakora ibintu byiza kandi bijyanye n’igihe.

Ubwo hamurikwaga imihigo y’umwaka wa 2019/2020 Akarere ka Kayonza kaje ku mwanya wa 11 n’amanota 73.9%.

Abafite inzu mu Mujyi wa Kayonza batangiye kuvugurura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .