Kayonza: Barinubira kumara imyaka ibiri nta bendera imbere y’ibiro by’akagali kabo

Yanditswe na Bukuru JC
Kuya 10 Ukuboza 2020 saa 12:06
Yasuwe :
0 0

Abaturage bo mu kagali ka Rusave mu murenge wa Murama mu karere ka Kayonza, batangaje ko babangamiwe nuko bagiye kumara imyaka ibiri barabuze ibendera rya Repubulika y’u Rwanda ryahoze ku biro by’akagali kabo.

Aba baturage bavuga ko kuba nta bendera rizamuye imbere y’akagali kabo nkuko byahoze, bidaha agaciro ako kagali kandi bishobora kuyobya bamwe kuko ntaho ibiro bitaniye n’inzu y’umuturage.

Umwe muri abo baturage waganiriye na TV1 yagize ati “Turifuza idarapo ko ryahagarara hariya nkuko ryari rihahagaze tukaribona tukamenya no natwe turi mu gihugu nk’abanyarwanda. Ubu wamenya ko ari akagali kandi nta darapo rihari?”

Undi muturage yavuze ko ubuyobozi bwagiye busimburana muri ako kagali ngo nacyo bwakoze ngo iryo bendera ryongere kuzamurwa imbere y’akagali.
Ati “None se inzu imeze nk’iy’umuturage wamenya ko ari akagali ? Hari n’uwaza ahayoboza wenda atareba idarapo.”

Umunyamabanga nshingwabikorwa w’akagali ka Rusav, Mugenzi Jean Damascene uhamaze, yavuze ko abayobozi bahahoze bamubwiye ko bururukije ibendera rimaze gusaza, bakarijyana ku murenge, bakizezwa ko vuba bazabona irindi.

Yagize ati “Naje nsanga ntaririho kuko mpamaze amezi abiri, uwo naje nsimbura yambwiye ko barisabye ubwo ni ugutegereza rikaza. Icyo tugiye gukora ni ukwibutsa kugira ngo turebe niba amadarapo yarabonetse kugira ngo bayaduhe.”

Umunyamabanga Nshingwabikorwa w’umurenge wa Murama, Mutuyimana Pauline ntiyemera ko hashize imyaka ibiri ibendera ryururukijwe, gusa yizeza ko vuba bagiye kurihasubiza.

Yagize ati “Niba ridahari birasaba ko ngerayo, rishobora kuba ryarakuze bakaryururutsa turashyiraho irindi byihuse ariko ntabwo nahamya ko umwaka ugeze.”

Bisanzwe bimenyerewe ko ibendera ry’u Rwanda rizamurwa imbere y’inyubako za Leta n’ahandi hakorerwa imirimo ya Leta.

Abaturage bavuze ko imyaka ibiri igiye gushira nta bendera rizamuwe imbere y'aka kagali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .