00:00:00 IGIHE NETWORK KN KINYARWANDA EN ENGLISH FR FRANCAIS

Kayonza: Abikorera beretswe aho bashoramo imari banasabwa gutanga serivisi nziza

Yanditswe na Hakizimana Jean Paul
Kuya 31 Ukuboza 2022 saa 09:48
Yasuwe :

Ubuyobozi bw’Akarere ka Kayonza bweretse abikorera bo muri aka Karere bimwe mu bikorwa bashoramo imari bakunguka ndetse kongera kubasaba kujya batanga serivisi nziza.

Ibi byagaragajwe ku mugoroba wo ku wa Kane tariki ya 29 Ukuboza 2022 ubwo ubuyobozi bw’Akarere ka Kayonza bwaganiraga n’abikorera mu musangiro wiswe wari ugamije gushimira no kubereka amwe mu mahirwe ari muri aka Karere bakwiriye kubyaza umusaruro.

Akarere ka Kayonza ni umutima w’Intara y’Iburasirazuba kuko iyo uturutse muri Uganda ukanyura Nyagatare na Gatsibo ariko uruhukiramo, ku bantu baturutse Tanzania bo bakagera Kirehe na Ngoma nabo baruhukira muri aka Karere. Abaturutse mu Mujyi wa Kigali bo banyura Rwamagana na bo bakagera muri aka Karere.

Umuyobozi w’Akarere ka Kayonza, Nyemazi John Bosco, yavuze ko urwo ruhurirane rutuma aka Karere kaba kamwe mu dushakirwamo serivisi zitandukanye n’abantu b’ingeri zose ku buryo ngo ari yo mpamvu abikorera bakwiriye gukoresha neza ayo mahirwe bagashora imari mu kwakira abaturage bakagana.
Meya Nyemazi yakomeje agira ati “ Ikibazo twakwibaza abavuye iyo mihanda yose serivisi zose bakeneye barazibona? Turifuza ko mwakora ibishoboka birenze ibikorwa uyu munsi.”

Uyu muyobozi yakomeje yereka abikorera amwe mu mahirwe y’ishoramari ari muri aka Karere arimo ko ari kogbafite igice kinini cya Pariki y’Akagera , Ikiyaga cya Muhazi, Akarere kabarizwamo inzuri nyinshi ku buryo abahubaka uburyo ubwo ari bwo bwose bakoresha babyaza umusaruro umukamo uhaboneka bashyigikirwa.

Nyuma yo kubereka aya mahirwe, Meya Nyemazi yasabye abikorera kurushaho gutanga serivisi nziza nk’imwe mu nzira yo kureshya abakiriya n’abandi bashoramari kuko ngo Kayonza ifite amahirwe yo kuba yarashyizwe mu mijyi yunganira Umujyi wa Kigali.

Abikorera biyemeje gukora impinduka

Umuyobozi w’Urugaga rw’Abikorera mu Karere ka Kayonza, Asiimwe Charles, yabwiye IGIHE ko nyuma yo kwerekwa amahirwe y’ishoamari ari muri aka Karere biyemeje gukora impinduka mu buryo bugaragara.

Ati “ Impinduka za mbere twiyemeje ni ugukora imishinga ihuriweho twafatanya; urugero twiyemeje gushyira imbaraga mu kubaka inyubako nini z’ubucuruzi zigezweho nko mu isantere ya Kabarondo no mu Mujyi wa Kayonza, aho hose turashaka kwishyira hamwe tukahubaka inzu nziza zahindura isura y’umujyi.”

Yakomeje avuga ko bashaka no kubaka Parikingi nini y’amakamyo mu rwego rwo gushaka uko bazajya bahaparika bahabonere serivisi zitandukanye, yanavuze ko kandi hari n’abagaragaye bashaka gushora imari mu buhinzi.

Kuri ubu Akarere ka Kayonza kashyizwe mu turere twunganira Umujyi wa Kigali, ubuyobozi bukaba butangaza ko bwifuza ko abikorera bagira uruhare mu bikorwa by’iterambere mu gihe Leta yabemereye kubakorera ibikorwaremezo birimo imihanda, amashanyarazi n’amazi ku hantu bitari.

Umuyobozi w’Abikorera mu Karere ka Kayonza, Asiimwe Charles yavuze ko bagiye gukorera hamwe bubaka bimwe mu bikorwaremezo bikenewe
Umuyobozi w’Akarere ka Kayonza, Nyemazi John Bosco yasabye abikorera gutanga serivisi nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .