Kayonza: Abasaga 7500 bahawe amazi meza na World Vision Rwanda

Yanditswe na Tuyishimire Raymond
Kuya 17 Mata 2021 saa 02:25
Yasuwe :
0 0

Abaturage bo mu Murenge wa Murundi mu Karere ka Kayonza, barishimira kuba barahawe umuyoboro w’amazi wa Karuruma-Nyabigega, watumye babona amazi meza nyuma y’igihe kirekire bavoma amazi mabi akomoka mu bishanga.

Uyu muyoboro wubatswe mu 2020 na World Vision Rwanda, ku bufatanye n’Akarere ka Kayonza ndetse n’Ikigo cy’Igihugu gishinzwe amazi, Isuku n’Isukura, Wasac.

Uyu mushinga ufite agaciro ka miliyoni 500 Frw. Abaturage bagerwaho n’amazi meza babikesha uyu muyoboro bangana na 7500. World Vison Rwanda ifite uruhare rwa 48% mu gihe Akarere ka Kayonza gafite uruhare 52%.

Mukandayisenga Julienne utuye mu Murenge wa Murundi, akaba umwe mu bahawe amazi, yavuze ko mbere batarabona uyu muyoboro, bavomaga amazi y’ibishanga akabatera uburwayi ariko bishimira ko babonye amazi meza.

Ati “Twavomaga mu Karuruma, akaba ari amazi atemba, gusa twaje kubivuga nyuma yo kubona ko adutera indwara nyinshi, baza kuduha amazi ubu niyo tuvoma. Ubu turamesa, turanywa, isuku ni yose muri Murundi."

Ugirirwineza Janvier yavuze ko ikibazo cy’amazi cyari kibahangayikishije cyane.
Ati “Twavomaga amazi mabi yo mu bishanga akatugiraho ingaruka ariko aho tuboneye amazi meza nta ndwara tukibona mu bana”.

Muri gahunda y’Igihugu y’Iterambere (NST1) yo kuva mu 2017 kugera mu 2024, u Rwanda rwihaye intego ko mu 2024, abaturage bose bazaba bagezweho n’amazi meza.

World vision Rwanda, ifite intego ko mu mwaka wa 2022, abagera kuri miliyoni bazaba bafashijwe kubona amazi.

Umuyobozi Mukuru wa Word Vision Rwanda, Sean Kerrigan, yabwiye IGIHE ko impamvu bahisemo Akarere ka Kayonza, ari mu rwego rwo kujyana n’icyerekezo cy’Igihugu cyo kugeza amazi meza ku Banyarwanda.

Ati “ Twahisemo gukorana n’Akarere ka Kayonza mu rwego rwo kujyana n’icyerekezo cy’Igihugu, aho buri munyarwanda agomba kuba afite amazi meza.”

Yasabye abatuye muri aka Karere kubungabunga ibi bikorwaremezo, bakabifata neza kuko ayo mazi azatuma abana bakura nta ndwara z’umwanda bafite.

Umuyobozi w’Akarere ka Kayonza, Murenzi Jean Claude, yavuze ko mu Karere ka Kayonza, abaturage bagera kuri 82% bafite amazi, bityo ko bakwiye gusigasira ibyagezweho.

Ati “Icyo dusaba abaturage mu rwego rwo kugira ngo bayakurikirane, nabo babigiremo uruhare. Aho babona umuyoboro w’ itiyo wapfuye nabo bafatanye kuwikorera. Icyo tubasaba ni uruhare runini aho gutegereza ko Akarere kazabibakorera.”

Usibye kuba hatashywe umuyoboro w’amazi, ku ishuri ry’Urwunge rw’Amashuri rwa Rukara (GS Rukara), hubatswe ubwiherero bugezweho butandatu bw’abahungu n’abakobwa ndetse n’ubwiherero bw’abafite ubumuga.

Mu rwego rwo gukomeza kwimakaza isuku, World Vision Rwanda yubatse kandi Kandagira Ukarabe eshanu ku mashuri abanza ya Kawagire Protestant, GS Kawagire Catholic, GS Muzizi, GS Rukara Catholic na GS Rukara Protestant.

Hubatswe kandi ivuriro ry’ibanze (Poste de santé) mu Murenge wa Rukara, ryuzuye rifite agaciro ka miliyoni zirenga 28 Frw, aho uruhare rw’Akarere rungana na 60%, naho urwa World Vision Rwanda rukaba rungana na 40%.

World Vision international ni Umuryango Mpuzamahanga wa Gikirisitu, ukora ibikorwa by’ubumuntu birimo gukora ubuvugizi no gutanga ubufasha ku bana n’imiryango mu bihugu bitandukanye, hagamijwe kurandura ubukene no kurwanya akarengane. Watangiye gukorera mu Rwanda mu 1994. Ibikorwa byawo bimaze kugera ku barenga miliyoni 1,5 mu gihugu.

Abashinzwe imikorere w'uyu muyoboro basobanuriye abayobozi b'Akarere, abakozi b'Intara y'Iburasirazuba ndetse na World Vision imikorere yawo
Abatuye mu Murenge wa Murundi bishimiye ko begerejwe amazi meza
Aya mavomo yabafashije kubona amazi meza nyuma y'aho bavomaga mu gishanga
Umuyobozi wa World Vision Sean Kerrigan, ari kumwe n'Uw'Akarere ka Kayonza Murenzi Jean Claude
Igikorwa cyabaye hubarizwa ingamba zo kwirinda COVID-19
Mu Murenge wa Murundi hatashywe amavomo mashya
Umuyoboro uzageza amazi ku baturage basaga basaga 7500
Umuyobozi Mukuru wa World Vision Sean Kerrigan yitegereza uko uyu muyoboro ukora
Amatiyo afasha kuzamura amazi ku mavomo ngo abaturage babashe kuvoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .