00:00:00 IGIHE NETWORK KN KINYARWANDA EN ENGLISH FR FRANCAIS

Kayonza: Abantu 11 bafashwe bagiye gutorokera muri Tanzania bahunga inkingo za COVID-19

Yanditswe na Hakizimana Jean Paul
Kuya 19 January 2022 saa 11:16
Yasuwe :

Abaturage 11 barimo abarimu babiri bo mu Karere ka Kayonza mu Murenge wa Kabare, bafatiwe mu Murenge wa Ndego bagiye gutorokera muri Tanzania, bavuga ko bahungaga kwikingiza COVID-19 ngo kuko ari ikimenyetso cya satani.

Aba baturage bafashwe mu ijoro ryakeye ryo kuri uyu wa Kabiri rishyira kuwa Gatatu, bafatirwa mu Mudugudu wo ku Munini mu Kagari ka Karambi mu Murenge wa Ndego.

Abafashwe bakomoka mu miryango ibiri, aho harimo abarimu babiri bigishaga mu mashuri abanza bari bari kumwe n’abana babo.

Undi muryango wari ugizwe n’umubyeyi umwe n’abana be mu gihe undi mubyeyi we amaze iminsi yaraburiwe irengero nawe bikaba bivugwa ko yahunze kwikingiza.

Umunyamabanga Nshingwabikorwa w’Umurenge wa Kabare bakomokamo, Karuranga Léo, yabwiye IGIHE ko aba baturage bari bamaze iminsi bihisha ubuyobozi bwajyaga kubareba kugira ngo bubaganirize bubereke ko kwikingiza atari ibya satani kuko n’ababayobora mu idini basengeramo babikoze.

Yagize ati “ Bari bahunze urukingo rwa COVID-19, mu bafashwe rero banabapimye basanga harimo umwe wamaze kwandura iki cyorezo, bavuga ko imyemerere bafite ari uko uru rukingo ari urwo kwa satani akaba ariyo mpamvu baruhunga.”

Karuranga yavuze ko kuri ubu icyihutirwa cyane bagiye gukora ari ukubanza kubasubiza mu ngo zabo ngo kuko ubuyobozi bwa Ndego bwabanje kubaganiriza bamwe bakemera kwikingiza no gusubira mu ngo zabo.

Uyu muyobozi yavuze ko muri uyu Murenge bari bafite abaturage 145 banze kwikingiza. Ubuyobozi bwakoresheje abandi bakirisitu mu kubaganiriza bajya impaka kuri Bibiliya, bamwe bakaba baragiye bemera kwikingiza abandi bagahitamo gushaka guhunga ngo kuko bavuga ko urukingo rwa COVID-19 ari ikimenyetso cya satani.

Guverineri w’Intara y’Iburasirazuba Gasana Emmanuel, aherutse gutangaza ko muri iyi Ntara hari abarenga 115 bagiye bafatirwa ku mipaka itandukanye bashaka guhunga iyi gahunda yo kwikingiza, aho abenshi bavuga ko imyemerere bafite itabibemerera.

Ubuyobozi buvuga ko abanze kwikingiza bukoresha abandi bakozi b’Imana mu kubigisha no kubaganiriza ku cyo ijambo ry’Imana rivuga, bamwe bikarangira bemeye kwikingiza, mu gihe abandi babyanga bagahitamo gushaka guhunga ingo zabo.

Kuri ubu Intara y’Iburasirazuba imaze gukingira urukingo rwa mbere ku bagera kuri 98% mu gihe abarenga 66% bo bamaze gufata urukingo rwa kabiri.

Muri Kayonza abantu 11 bafashwe bagiye gutorokera muri Tanzania bahunga inkingo za COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .