00:00:00 IGIHE NETWORK KN KINYARWANDA EN ENGLISH FR FRANCAIS

Kayishema, nimero ya mbere ku rutonde rw’abakekwaho uruhare muri Jenoside bashakishwa

Yanditswe na IGIHE
Kuya 9 June 2022 saa 05:58
Yasuwe :

Umushinjacyaha Mukuru w’Urwego rwasigariyeho Urukiko Mpuzamahanga rwashyiriweho u Rwanda, Serge Brammertz, yatangaje ko ku rutonde rwa ba ruharwa bashakishwa ku ruhare rwabo muri Jenoside yakorewe Abatutsi, nimero ya mbere ari Fulgence Kayishema.

Abazi Kayishema, bamugaragaza nk’umuntu wagize uruhare mu bwicanyi bwakorewe Abatutsi mu Kiliziya. Umwe mu bamuzi neza ni Froduard Maniraguha.

Maniraguha yakuze ari umusore wifuza kwiha Imana, cyane ko ari byo n’umuryango we washakaga ku buryo ku myaka 14 yari umuhereza mu Kiliziya. Muri Mata 1994, intumbero ze yahise azishyira ku ruhande kubera ibyo yabonye i Nyange aho akomoka.

I Nyange, Abatutsi barenga ibihumbi bibiri bari bahungiye mu Kiliziya aho Maniraguha yakoraga. Bakiriwe n’Umupadiri w’Umuhutu, wijeje abari basabye ubuhungiro ko azabafasha.

Icyo yari yakoze ahubwo ni ugukora lisiti y’abahungiye muri iyo Kiliziya. Maniraguha ati “Nabonye ubwicanyi bwakozwe mu buryo bwateguwe.”

Fulgence Kayishema wari Umupolisi ni we wafatanyije n’Umupadiri wayoboraga Kiliziya y’i Nyange.

Kayishema yayoboye Ingabo n’Interahamwe zitera Kiliziya ziyijugunyaho za grenades ndetse zitwaza imihoro zigiye gutsemba Abatutsi. Byaje kurangira abarenga 2000 bari bahunze bahiciwe.

Ati “Ubwo babibonaga ko hari abakiri bazima, bateguye umugambi wo kubatsemba, basenya urusengero.”

Maniraguha asobanura ko Kayishema ari “umwicanyi, umugizi wa nabi, wateguye ubwicanyi ndetse ubwe yarishe.”

Umushinjacyaha Mukuru wa IRMCT, Serge Brammertz, yagize ati “[Kayishema] ni we muntu wa mbere turi gushaka.”

Brammertz ayoboye itsinda ry’abantu bashinzwe guhiga bukware abakekwaho Jenoside bihisha ubutabera.

Iri tsinda ryitwa "Tracking Unit" riherutse mu Rwanda ndetse ryaherekejwe mu gihugu n’abanyamakuru ba SPIEGEL, ikinyamakuru cyo mu Budage, mu gihe cy’icyumweru bari mu iperereza mu Rwanda.

Kuva Brammertz yafata izo nshingano mu 2016, iryo tsinda ryakoze akazi gakomeye rihiga umuntu wese ukekwaho uruhare muri Jenoside. Ni ryo tsinda ryatahuye ko Protais Mpiranya yapfuye ndetse ko yashyinguwe muri Zimbabwe.

Ati “Na nyuma y’imyaka 30 Jenoside ibaye, ntitugomba guhagarika gushakisha abakekwa no kubageza imbere y’ubutabera.”

Kayishema Fulgence wahoze ari Umugenzacyaha wa Komine Kivumu muri Perefegitura ya Kibuye, ashinjwa ibyaha bya Jenoside birimo kuba umufatanyacyaha w’abakoze Jenoside, ubwumvikane bugamije gukora Jenoside n’ibyaha byibasiye inyokomuntu byakorewe muri Komine Kivumu, hagati y’itariki ya 6 n’iya 20 Mata 1994.

Tariki ya 15 Mata 1994, Kayishema yategetse kandi acura umugambi wo gusenya Kiliziya ya Nyange, yarimo Abatutsi barenga 2000 babuze uko basohokamo bagapfiramo.

Fulgence Kayishema ni we muntu uri guhigwa bukware mu bashinjwa uruhare muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .