Kaunda wayoboye bwa mbere Zambia na mwishywa wa Patrice Lumumba bahembewe kurwanya ruswa

Yanditswe na Ishimwe Israel
Kuya 9 Ukuboza 2019 saa 08:07
Yasuwe :
0 0

Kenneth David Buchizya Kaunda wabaye Perezida wa mbere wa Zambia yahawe igihembo nyamukuru nk’uwagize uruhare mu kurwanya ruswa mu gihugu cye mu gihe abarimo Jean Jacques Lumumba [mwishywa wa Patrice Lumumba] na we yahembwe kubera ibikorwa bye bigamije kurandura ruswa.

Ibirori byo guhemba indashyikirwa mu kurwanya ruswa byabereye muri Kigali Convention Centre kuri uyu wa 9 Ukuboza 2019.

Ibi bihembo ngarukamwaka bya ‘Sheikh Tamim Bin Hamad Al Thani International Anti-Corruption Excellence Award’ ni inshuro ya kane byatanzwe ariko ni iya mbere byabereye ku Mugabane wa Afurika.

Ni igikorwa cyitabiriwe n’abayobozi barimo Perezida Paul Kagame; Umuyobozi w’Ikirenga wa Qatar (Emir) Sheikh Tamim bin Hamad al Thani ari na we cyitiriwe; Perezida w’Ishyirahamwe ry’Umupira w’Amaguru ku Isi, Gianni Infantino; Perezida wa Komisiyo ya AU, Moussa Faki Mahamat; Madamu Jeannette Kagame; Perezida wa Namibia, Hage Gottfried Geingob na Madamu Monica Geingos n’abandi.

Ibirori byo guhemba byitabiriwe n’abantu 600, barimo urubyiruko ruturutse mu bice bitandukanye by’igihugu, abahembwe n’abagize inama y’ubutegetsi y’abategura ibi bihembo.

Ku nshuro ya kane ibi bihembo byahawe abantu barindwi babaye indashyikirwa ku Isi mu kurwanya ruswa no kwimakaza ugukorera mu mucyo bari mu byiciro bine birimo icyo Kwihangira umurimo, icy’Urubyiruko, icy’Uburezi n’icy’Ibihe byose.

Mu bihembo byatanzwe icy’indashyikirwa mu by’Uburezi (Academic Research and Education) cyahawe Dr Maria Krambia-Kapardis wakoze ubushakashatsi ku kurwanya ruswa na Dr. Alban Koçi, Umwarimu w’Amategeko muri Kaminuza ya Tirana muri Albania.

Mu cyiciro cy’urubyiruko (Youth Creativity and Engagement) hahembwe Jean Jacques Lumumba ukomoka muri Repubulika Iharanira Demokarasi ya Congo. Uyu avukana na Patrice Lumumba uzwi mu mateka ya Afurika nk’uwaharaniye uburenganzira bw’ikiremwamuntu.

Hanahembwe kandi itsinda ry’urubyiruko rw’abanyamuziki Jeunesses Musicales International (JMI) rikorera mu bihugu 40.

Mu cyiciro cyo guhanga udushya (Anti-Corruption and innovation) hahembwe umuryango wa SEMA ukorera abaturage ubuvugizi bakagerwaho na serivisi zitandukanye.

Hanahembwe kandi Elnura Alkanova, umunyamakuru ukomoka muri Kyrgyzstan wakoze inkuru z’ubucukumbuzi ku kurwanya ruswa.

Igihembo nyamukuru cyiswe “Lifetime/Outstanding achievement’’ cyahawe Kenneth David Buchizya Kaunda wabaye Perezida wa mbere wa Zambia (1964-1991).

Mu butumwa yatanze kuko atabashije kugera muri Kigali, yahagarariwe n’umukobwa we Cheswa Silwizya, yashimye icyizere yagiriwe n’ubufatanye bw’abaturage b’igihugu cye mu kurwanya ruswa.

Usibye guhabwa igihembo, nta mafaranga cyangwa irindi shimwe rigiherekeza kuko gifatwa nko gutera ingabo mu bitugu abitangiye kurwanya ruswa.

Perezida Kagame yashimye Sheikh Tamim Bin Hamad Al Thani wagiriye u Rwanda icyizere rukakira ibi bihembo.

Yagize ati “Ndashimira icyerekezo yagize cyatumye ashyiraho ibi bihembo n’ubufatanye n’Umuryango w’Abibumbye.’’

Yashimangiye ko mu buyobozi buri wese akwiye kubigira ibye ko “Nta gisobanuro cyo kuyobora nabi kibaho. Twatangiye urugendo rwo kurwanya ruswa kandi iki gikorwa ni inkomezi mu kurusoza.’’

Yashimiye abatsinze muri uyu mwaka kuko bagaragarije mu bihugu byabo ko ruswa atari iyo kwihanganirwa.

Perezida wa FIFA, Gianni Infantino, yavuze ko urugamba rwo kurandura ruswa ari urwa buri wese.

Yagize ati “Icyo twese turwanira ni ugutsinda urugamba rwo kurwanya ruswa. Icy’ingenzi ni ukumenya inshingano zacu, zo gukora ibikorwa byacu mu mucyo.

Yakomeje ati ‘‘Nizera ko dufatanyije, turi abakunzi b’umupira w’amaguru, niba hari icyo mukora, mugahagarika ruswa mu gihe ije, ntekereza ko tuzakora ibyiza ku bana bacu no ku muryango uzadukomokaho.’’

‘Sheikh Tamim Bin Hamad Al Thani International Anti-Corruption Excellence Award’] ni ibihembo bitangwa na Qatar ku bufatanye n’Ishami ry’Umuryango w’Abibumbye rishinzwe kurwanya ibiyobyabwenge n’ibyaha (UNODC).

U Rwanda rwatoranyijwe kwakira iki gikorwa kubera urugendo rwarwo mu kurwanya ruswa. Raporo y’Umuryango Mpuzamahanga urwanya ruswa n’akarengane yasohotse umwaka ushize yashyize u Rwanda ku mwanya wa Kane muri Afurika mu kurwanya ruswa, inyuma ya Seychelles, Botswana na Cape Verde.

Perezida Kagame n'Umuyobozi wa Komisiyo ya AU, Moussa Faki Mahamat mu banyacyubahiro bitabiriye iki gikorwa
Madamu Jeannette Kagame na we yitabiriye itangwa ry'ibihembo by'ababaye indashyikirwa mu kurwanya ruswa ku Isi
Perezida Paul Kagame n'Umuyobozi w’Ikirenga wa Qatar (Emir) Sheikh Tamim bin Hamad al Thani mbere yuko igikorwa cyo guhemba gitangira
Perezida Kagame yayoboye abandi bayobozi berekeza gufata inyundo zifashishijwe mu gusenya urukuta rwari rwubatswe, byakozwe nk'ikimenyetso cyo kurandura ruswa
Perezida wa Namibia, Hage Gottfried Geingob, ubwo yari amaze gushyikira inyundo ye
Perezida Paul Kagame n'Umuyobozi w’Ikirenga wa Qatar (Emir) Sheikh Tamim bin Hamad al Thani berekeza ahari hubatswe urukuta ruriho ijambo ruswa mu ndimi zitandukanye zirimo Ikinyarwanda, Igifaransa, Icyongereza, Icyarabu, Igiswahili n'izindi
Perezida wa FIFA, Gianni Infantino asenya urukuta rwari rwanditseho ijambo ruswa yifashishije inyundo. Ni igikorwa gishushanya urugendo rwo gukura ruswa mu nzira
Abayobozi bakuru bitabiriye iki gikorwa bsenye urukuta. Nyuma y'iki gikorwa bahise bamwenyura
Perezida Paul Kagame na Emir Sheikh Tamim bin Hamad al Thani bamwenyura nyuma yo gusenya urukuta wagereranya na ruswa ibangamira abantu mu nzira igana ku iterambere
Perezida Paul Kagame na Emir Sheikh Tamim bin Hamad al Thani berekeza aho basenyeye urukuta
Perezida Paul Kagame na Emir Sheikh Tamim bin Hamad al Thani bafunguye ahubatswe ikimenyetso cy'ikiganza gishushanya ko abantu bakwiye kuvuga oya kuri ruswa
Perezida Kagame yashimye ko u Rwanda rwagiriwe icyizere cyo guhabwa kwakira iki gikorwa cyo guhemba indashyikirwa mu kurwanya ruswa\
Iki gikorwa cyabaye imvura ijojoba ariko ntiyarogoye gahunda zari zateganyijwe
Perezida Paul Kagame aganira n'Umuyobozi w’Ikirenga wa Qatar (Emir) Sheikh Tamim bin Hamad al Thani. Bavaga mu busitani ahafunguriwe ku mugaragaro ikimenyetso cy'ikiganza berekeza muri Kigali Convention Centre aho ibihembo byatangiwe
Perezida Paul Kagame yashimye Umuyobozi w’Ikirenga wa Qatar (Emir) Sheikh Tamim bin Hamad al Thani watekereje ku guhemba ab'indashyikirwa mu rugamba rwo kurwanya ruswa
Itorero ry'Igihugu Urukerereza ni ryo ryasusurukije abitabiriye ibi birori
Itsinda ry'abacuranzi "The Muses" ribarizwa muri Afurika y'Epfo ryanyuze benshi mu buryo ricuranga umuziki unyura amatwi
Perezida Kagame Paul yavuze ko nta muyobozi muto cyangwa umukuru, nta n’igisobanuro cyo kuyobora nabi gikwiye kubaho
Perezida Kagame yashimye abatsinze avuga ko gukorera hamwe kwabo gushushanya ubwitange bwo kutihanganira ruswa
Intumwa yihariye y'Ishami ry'Umuryango w'Abibumbye rishinzwe kurwanya ibiyobyabwenge n'ibyaha (UNODC) akaba n'Umuyobozi w'ibihembo bya ACE Awards [International Anti-Corruption Excellence Awards], Dr. Ali Bin Fetais Al Marri, yavuze ko uko u Rwanda rwemerewe kwakira iki gikorwa nyuma yo gusoma amateka arwerekeye nuko igihugu cyiyubatse
Perezida wa Namibia, Hage Gottfried Geingob, uri mu Rwanda ku nshuro ye ya kane, yavuze ko ruswa ari ikibazo gikwiye guhagurukirwa na buri wese. Yavuze ko abayobozi bakeneye gukorera mu mucyo kugira ngo abaturage bongere babagarurire icyizere
Umuyobozi wa Komisiyo ya AU, Moussa Faki Mahamat, yavuze ko u Rwanda rwatoranyijwe kwakira iki gikorwa kubera uko rwigaragaje mu rugamba rwo kurwanya ruswa
Perezida wa FIFA, Gianni Infantino, yavuze ko urugamba rwo kurandura ruswa ari urwa buri wese
Dr Maria Krambia-Kapardis ashyikirizwa igihembo na Emir Sheikh Tamim bin Hamad al Thani
Dr. Alban Koçi, Umwarimu w’Amategeko muri Kaminuza ya Tirana muri Albania asuhuzanya na Perezida Kagame nyuma yo guhabwa igihembo
Jean Jacques Lumumba, mwishywa wa Patrice Lumumba ari mu bahembewe kurwanya ruswa
Abagize Jeunnesses Musicales International (JMI) bashyikirizwa igihembo cyabo
Umunyamakuru Elnura Alkanova wo muri Kyrgyzstan yahembwe nyuma yo gukora inkuru z’ubucukumbuzi ku kurwanya ruswa
Cheswa Silwizya Kaunda ni we washyikirijwe igihembo cya se Kenneth David Buchizya Kaunda wahembwe nk'uwitangiye kurwanye ruswa mu buzima bwe
Abahawe ibihembo byo kurwanya ruswa ku Isi n'abayobozi bakuru bitabiriye iki gikorwa bafashe ifoto y'urwibutso
Umunyabugeni Ahmed Al Bahrani ukomoka muri Iraq ni we wakoze ikiganza cyateretswe muri Kigali Convention Center
Iki kiganza gikozwe mu cyuma ni ikimenyetso gisobanura ko byihutirwa cyane guhagarika ruswa no kuvuga ‘Oya’ ku cyaha cyayo. Ni ikiganza gisobanura gukorera mu mucyo.
Ibihembo byatanzwe ni birindwi byagabanyijwe mu byiciro bine bitandukanye
Ibihembo byatanzwe bikozwe muri zahabu
Ibi bihembo bya ACE Awards [International Anti-Corruption Excellence Awards] bitangwa na Qatar ku bufatanye n’Ishami ry’Umuryango w’Abibumbye rishinzwe kurwanya ibiyobyabwenge n’ibyaha (UNODC)

Amafoto: Muhizi Serge

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza