Karongi: Umusore w’imyaka 18 yarohamye mu Kivu agiye kuvoma yitaba Imana

Yanditswe na Mukwaya Olivier
Kuya 17 Gicurasi 2020 saa 01:58
Yasuwe :
0 0

Sibobugingo Jérôme wari utuye mu Mudugudu wa Bupfune, Akagali ka Nyarusazi mu Murenge wa Bwishyura mu Karere ka Karongi yarohamye mu Kiyaga cya Kivu, yitaba Imana.

Uyu musore w’imyaka 18 yarohamye mu Kiyaga cya Kivu aho yari agiye kuvoma, ahagana saa Kumi n’Imwe zo ku mugoroba wo ku wa Gatanu, tariki 15 Gicurasi 2020.

Sibobugingo yabanaga na mukuru we, aba bombi ubusanzwe bakomoka mu Karere ka Nyaruguru.

Umunyamabanga Nshingwabikorwa w’Umurenge wa Bwishyura, Ayabagabo Faustin, yemeje aya makuru y’urupfu rwa Sibobugingo.

Yagize ati “Sibobugingo yarohamye mu Kiyaga cya Kivu, ubwo yarimo agerageza kujyamo agiye kuvoma amazi kandi atari azi koga.”

Yasabye abaturiye Ikiyaga cya Kivu kurushaho kwirinda amazi yacyo kuko bimaze kugaragara ko ashobora guhitana ubuzima bwa benshi.

Ati “Abaturage bumve ko Ikiyaga cya Kivu nubwo ari umuturanyi wabo mwiza bakuramo ibyo kurya, ukanabafasha mu kwidagadura boga, ariko barasabwa gukoresha ubwenge kugira ngo barinde ubuzima bwabo.’’

Ayabagabo yihanganishije umuryango wa nyakwigendera wabuze uwawo.

Abaturage basabwe kandi kwirinda kujya mu Kiyaga cya Kivu, badafite abo bari kumwe bazi koga, cyangwa imyenda ibarinda kurohama (life jacket).

Umurambo wa nyakwigendera wahise ujyanwa ku Bitaro bya Kibuye, nyuma uhita ushyingurwa.

Kuva uyu mwaka watangira, Sibobugingo yabaye umuntu wa kabiri uhitanwe n’Ikiyaga cya Kivu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .