00:00:00 IGIHE NETWORK KN KINYARWANDA EN ENGLISH FR FRANCAIS

Karongi: Umucuruzi amaze gukura mu muhanda abana barenga 150

Yanditswe na Nsanzimana Erneste
Kuya 13 Mutarama 2023 saa 07:58
Yasuwe :

Ikibazo cy’abana bo mu muhanda ni kimwe mu byabaye agatereranzamba kuko ingamba zo kubakuramo zigenda zifatwa ariko hamwe na hamwe ukabona aho kugabanuka barushaho kwiyongera.

Dushimimana Jean Baptiste, umucuruzi wo mu mujyi wa Karongi mu myaka 22 ishize amaze gukura mu muhanda abana barenga 150. Bamwe muri bo barakuze ubu ni abagabo n’abagore bafite ingo zikomeye.

Mu mwaka 2000, nibwo uyu mucuruzi ufite restaurant mu mujyi wa Karongi yarebye abona uyu mujyi urimo abana benshi bo mu muhanda babayeho nabi. Kuva ubwo yatangiye kujya abegera bakaganira akababaza icyo bakeneye agafasha buri wese agendeye ku mahitamo ye.

Uyu mugabo bigaragara ko adafite amikoro ahambaye, mu bana yakuye mu muhanda harimo abo yafashije gukomeza amashuri kuri ubu barangije za kaminuza. Abandi bize imyuga inyuranye ubu bari gutanga umusanzu wo kubaka igihugu mu mpande zitandukanye.

Bamwe ni abakanishi b’ibinyabiziga banafite imodoka zabo, abandi ni abadozi n’ababaji.

Aman Nzamwita, ni umwe mu bana Dushimimana yakuye mu muhanda; ubu ni umubabaji wabigize umwuga ukorera mu mujyi wa Karongi. Afata Dushimimana nk’umubyeyi we kuko ariwe wamugiriye inama akanamufasha kujya kwiga imyuga ku ishuri ry’imyuga rya Karengera mu karere ka Nyamasheke.

Nzamwita ubu afite inzu mu mujyi wa Karongi ndetse afite umugore n’abana babiri.

Icyemezo cyo kujya kuba mu muhanda yagifashe kubera ubukene bwari mu rugo iwabo, nyuma y’uko apfushije se mu 1994. Icyo gihe yari umwana w’imyaka 7.

Nyuma kubura se yarezwe na nyina bigera aho amikoro aba make, yajya ajya ku ishuri yataha akabwirirwa, atangira asiba ishuri akajya kuroba isambaza mu Kivu, nabyo bigeze aho abona biranze, ku mwaka 12 ajya mu muhanda hafi y’isoko akajya atwaza abaguzi imizigo ari nabwo yinjiye mu ngeso zo gukoresha ibiyobyabwenge.

Nzamwita muri 2001 nibwo yahuye na Dushimimana, amubaza icyo yamufasha amusaba kumufasha akajya kwiga kubaza.

Ati “Abana twabanaga mu muhanda harimo abari barahunze umwuka mu mubi wo mu ngo ziwabo n’abari barahunze ubukene ari cyo kiciro nanjye nabarizwagamo”.

Akiva kwiga ububaji ntabwo ubuzima bwari bumwohereye kuko ibikoresho n’ubundi bufasha bari baremerewe n’ubuyobozi bw’Intara y’Iburengerazuba babutegereje amaso agahera mu kirere.

Ibi byatumye Nzamwita yegera abantu bari basanzwe babaza arababwira ati “Niba nta n’akazi mufite njye ndabakorera ku buntu ariko nshyire mu bikorwa ubumenyi nakuye mu ishuri butamfira ubusa”, icyo yabaga agamije kindi ni ukugira ngo aze kubona aho akura ifunguro rya saa sita.

Gukunda umwuga wo kubaza byagiye bimuzamura gake gake, kuri ubu afite inzu y’ububaji, yifashisha mu guha akazi abana bari mu buzima yahozemo.

Dushimimana yabwiye IGIHE ko mu bacuruzi bari mu isoko rya Bwishyura harimo abo yafashije abakura mu buzima bwo mu muhanda abigisha gucuruza.

Iyo abonye umwana uba mu muhanda ngo aramwegera akamuganiriza, akumva icyatumye ajya mu muhanda, akamubaza icyo yifuza akaba aricyo amufashamo.

Avuga ko impamvu hari imiryango itwara abana ibakuye mu muhanda bagerayo bakahava kandi iyo miryango ifite amikoro, ari uko baba badatega uwo mwana amatwi ngo bumve icyo akeneye.

Dushimimana Jean Baptiste umaze gukura mu muhanda abana bagera ku 150 avuga ko ubufasha bwa mbere umwana wo mu mahnda aba akeneye ari ukubona umutega amatwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .