00:00:00 IGIHE NETWORK KN KINYARWANDA EN ENGLISH FR FRANCAIS

Karongi: Imiryango isaga 800 iracyararana n’amatungo

Yanditswe na Nsanzimana Erneste
Kuya 17 April 2022 saa 04:04
Yasuwe :

Abaturage bo mu karere ka Karongi bagaragaza ko ubujura bw’amatungo butuma bahitamo kurarana nayo mu nzu kugira ngo ibisambo bitayatwara.

Abaganiriye na IGIHE bavuga ko ubujura bw’amatungo bukorwa ku manywa na nijoro, bityo ko batinya kuyaraza mu biraro kuko iyo arayemo abajura bayiba.

Mukakabera Maria wo mu kagari ka Kibilizi umurenge wa Rubengera, yafashe umwanzuro wo kuragiza ihene ze ebyiri kugira ngo abajura batazacukura inzu bakazisanga mu nzu kuko atabona imbaraga zo kubarwanya.

Ati "Ikibazo cy’ubujura bw’amatungo kimeze nabi. Baraza bakazizitura aho ziriho hose niyo haba ku manywa barazijyana".

Uyu mukecuru azi abantu batandatu baturanye bamaze kwibwa amatungo arimo ihene n’inkoko mu mezi abiri ashize.

Nyirarukundo Marie Chantal yavuze ko ubu bujura aribwo butuma bahitamo kurarana n’amatungo.

Ati "Muri kano karere kurarana n’amatungo birahari cyane, kuko n’ukubeshya ngo ntararana nayo ayirara iruhande kuko atayiraye iruhande bayimwiba".

Undi muturage yagize ati "Inaha bariba, batwibye ihene ibura iminsi mike ngo ibyare kandi yabyaraga babiri hashize iminsi umugabo duturanye na we bamwiba ihene n’iyayo.”

Umuyobozi wungirije w’Akarere ka Karongi, ushinzwe imibereho myiza y’abaturage, Mukase Valentine asaba abaturage gukaza amarondo bakirinda kurarana n’amatungo kuko intego ari uko Umunyarwanda agomba kugira aho aba hasobanutse.

Ati "Dusaba abayobozi b’amasibo n’imidugudu iyo miryango ibarizwamo gushyiraho ingamba zihamye zo kurara irondo, kuko akenshi usanga bararana n’amatungo banga ko abajura bayabatwara, ariko iyo irondo rihari abaturage ubwabo bicungira umutekano wabo ubwabo, w’amatungo yabo n’ibyabo.”

“Ikindi dukora ni uko iyo miryango iyo twayimenye tuyikangurira umuco w’isuku kuko ntabwo wagira isuku ubana n’ingurube, n’inkoko n’inka mu nzu”.

Mu karere ka Karongi hari habaruwe imiryango 1389 irarana n’amatungo ariko binyuze mu bukangurambaga n’ubufasha buhabwa iyi miryango igera kuri 583 yacitse ku muco wo kurarana n’amatungo kuri ubu isigaye ikirarana n’amatungo ni 806.

Hari imiryango isaga 800 muri Karongi ikirarana n'amatungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .