00:00:00 IGIHE NETWORK KN KINYARWANDA EN ENGLISH FR FRANCAIS

Karongi: Batewe impungenge n’umugezi ukomeje kubatwara abantu

Yanditswe na Nsanzimana Erneste
Kuya 3 Mutarama 2023 saa 04:11
Yasuwe :

Abaturage bo mu Murenge wa Bwishyura baturiye umugezi wa Nyabahanga batewe impungenge no kuba ukomeje kubatwara abantu, amatungo, imyaka utaretse no kubasenyera inzu.

Abaturiye uyu mugezi bavuga ko kuba ukomeje kubatwara abantu buri uko imvura yaguye ukuzura biterwa ahanini no kuba nta kiraro gihari cyo kwambukiraho bajya guhaha, kwiga, gusenga n’ahandi.

Abaganiriye na IGIHE ni abo mu Midugudu ya Nyamigina, Gomba na Kirambo. Abakuze muri bo bavuga ko hambere amazi y’uyu mugezi yari make ariko ngo uko imyaka ishira indi igataha babona arushaho kwiyongera.

Maniraguha Antoinette w’imyaka 45 avuga ko mu myaka 5 ishize azi abantu 10 bari baturanye bamaze kwicwa n’uyu mugezi. Muri aba ntiyabariyemo imirambo yabonye muri uyu mugezi atazi ba nyirayo n’iyo yagiye abona irohorwa mu Kiyaga cya Kivu nyuma yo kumanurwa n’uyu mugezi.

Mukakabanda Clemence avuga ko batewe impungenge no kuba uyu mugezi ukomeje kwica abantu bitewe n’uko nta ntindo ugira, uretse ikiraro kiri kuri kaburimbo ahantu bemeza ko kuzengurukayo ari kure bagereranyije n’aho batuye.

Ati “Nta muntu uwambuka iyo wuzuye abo hakurya baraburara kuko udusoko turi hano. Kuva umwaka wa 2022 watangira nzi abantu nka batanu umaze kwica, hari n’abo tutazi baturuka iriya ruguru aho uturuka”.

Niyigena Elisha wo mu Mudugudu wa Kirambo akagari Gitarama, atuye muri metero nkeya uvuye kuri uyu mugezi ndetse muri 2021 wamutwariye urutoki n’ibiraro umwicira amatungo arimo ihene n’ingurube.

Ati “Iyo imvura iguye ntabwo dusinzira, nk’ubu nijoro wari wuzuye ntabwo wasinzira. Ni ukubyuka tukaza kureba aho amazi ageze kugira ngo tubashe kuva mu nzu. Dukeneye ko Leta yadufasha tukimuka kuko twe turi abakene ntabwo twabyishoboza”.

Umunyabanga Nshingwabikorwa w’Umurenge wa Bwishyura, Ayabagabo Faustin yabwiye IGIHE ko iki kibazo nk’ubuyobozi bakizi ndetse ko babaruye imiryango 12 igomba kwimuka ku nkengero z’umugezi wa Nyabahanga mu rwego rwo kwirinda ko uyu mugezi wakuzura ukabatwara.

Gitifu Ayabagabo yavuze ko ubuyobozi bw’akarere bwahasuye ndetse ko hari umushinga wihutirwa wo kubaka urukuta rw’amabuye no guha uyu mugezi inzira kugira udakomeza gusatira aho abaturage batuye.

Ati “Twari twasabye ko abahatuye bakwimurwa, hari n’abo twari twabaruye imiryango 12, hari bane twahakuye, hari n’andi mazu twari dufite aho bita mu gatoki twabonaga ko wa muntu waba ufite ikibazo kihutirwa kurusha yahita agana tukaba tumutuje”.

Ubuyobozi bufite gahunda yo kubaka urukuta rw’amabuye kugira ngo uyu mugezi udakomeza gutengura ubutaka usatira umuhanda n’amazu y’abaturage. Ubuyobozi kandi bufite gahunda yo kuyobya uyu mugezi no kubaka ikiraro kugira ngo abaturage bage babona aho bambukira. Abaturage basanga byaba byiza iki kiraro kibaye ikiraro gica mu kirere cy’abanyamaguru.

Amazi y'Umugezi wa Nyabahanga yariyongereye ndetse imvura iherutse kugwa isenya ibiraro by'amatungo n'inzu z'abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .