00:00:00 IGIHE NETWORK KN KINYARWANDA EN ENGLISH FR FRANCAIS

Karongi: Abatuye ahabonetse amashyuza barasaba ko hatunganywa

Yanditswe na Nsanzimana Erneste
Kuya 12 Mutarama 2023 saa 02:36
Yasuwe :

Ni inkuru itazwi n’abantu benshi uretse abahatuye ariko y’ukuri. Mu Karere ka Karongi, mu Murenge wa Bwishyura naho haboneka amazi ava mu butaka ashyushye azwi ku izina ry’amashyuza.

Amashyuza aboneka ku hafi y’ahantu hari ibirunga, ndetse abahanga bemeza ko ubushyuye buyabamo, bukomoka ku bikoma byo mu nda y’isi.

Mu Rwanda amashyuza aboneka ku nkengero z’Ikiyaga cya Kivu. Azwi cyane ni ayo mu karere ka Rubavu mu Murenge wa Nyamyumba n’ayo mu ka Rusizi mu wa Nyakabuye.

Ahandi byagaragaye ko hari amashyuza ni mu karere ka Karongi, mu murenge wa Bwishyura akagari ka Gitarama, umudugudu wa Josi.

Aya mashyuza ari mu gishanga cya Kigezi, ku birenge by’umusozi wa Josi azwi ahanini n’abantu bayaturiye kuko banayifashisha mu kazi kabo ka buri munsi.

Ingabire Ruth, utuye hafi y’amashyuza ya Karongi, yabwiye IGIHE ko ahanini aya mashyuza akoreshwa n’abayaturiye. Uyu mubyeyi w’imyaka 55 avuga ko yavutse asanga aya mashyuza ahari, akavuga ko abatayasura biterwa n’uko batayazi.

Ati “Abahaturiye barazindukana ibivomesho bakajya kuzana ayo bakaraba, abandi bakayogerayo. Iyo yakoze cyane akananirwa cyangwa yakoze urugendo rurerure ajyayo agataha ameze neza kuko aya mazi avura amavunane”.

Hitimana Jean d’Amour avuga ko ahabonetse amashyuza y’i Karongi hatunganyijwe hakanamenyekanishwa, byakorohereza abayasura n’abayaturiye.

Ati “Aya mazi apfupfunuka ahantu hatatu hegeranye. Icyo dusaba ubuyobozi ni uko bahakora neza, bakanadukorera inzira iyageraho”.

Aho aya mashyuza y’I Karongi ari ni mu isambu ya Nteziryayo Alphonse. Iyi sambu hari umushoramari mu ntangiriro z’umwaka ushize wayiguze gusa icyo ateganya kuhakorera ntabwo kiramenyekana.

Umuyobozi wungirije w’Akarere ka Karongi, Niragire Theophile, yabwiye IGIHE ko bagiye gukorana n’inzego z’ibanze, bakareba uko bayabyaza umusaruro.

Akamaro k’amashyuza ntikavugwaho rumwe kuko hari abatemera ko avura nubwo hari ubushakashatsi bwakorewe mu bihugu birimo u Budage, Amerika n’u Buyapani bugaragaza ko amashyuza atuma amaraso atembera neza mu mubiri, agabanya ububabare, agatuma umuntu asinzira neza, akanavura zimwe mu ndwara z’uruhu.

Amashyuza byagaragaye ko avura indwara zimwe na zimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .