Muri uyu murenge hasize iminsi hari ikibazo cy’abasore batega abaturage bakabashikuza amaterefone n’amasakosi, ubujura butobora amazu, n’ubujura bw’amatungo magufi aho abaturage bibwaga ihene, inkoko n’ingurube.

Kuri uyu wa 22 Gicurasi 2022, inzego z’umutekano Dasso na polisi bazindukiye mu mukwabu wo gufata abakoraga ubu bujura.

Umunyamabanga Nshingwabikorwa w’Umurenge wa Rubengera Nkusi Mérard yabwiye IGIHE ko mu bafashwe harimo abafatiwe mu cyuho.

Ati “Twafashe abagera kuri 21. Ni igikorwa twakoze ku bufatanye n’inzego z’umutekano hari hamaze iminsi ubujura, abantu bagatega abantu amanywa ava bakabambura, mu gitondo saa kumi n’imwe nibwo twakoze umukwabu hari n’abo twafatiye mu cyuho”.

Abafashwe bakekwaho ubujura bumaze iminsi burimo kwanura imyenda, kwiba, amatungo, no kwambura abagenzi.

Ati “Saa kumi n’ebyiri za mu gitondo hari abo twafatiye mu cyuho bamaze gufungura inzu y’umuturage, uwo muturage niwe wadutabaje”.

Gitifu Nkusi yavuze ko mu bafashwe harimo abari buganirizwe bakabarekura, ariko ngo abafatiwe mu cyuho barashyikirizwa urwego w’igihugu rw’ubugenzacyaha bakorerwe dosiye izashyirizwe ubugenzacyaha.

Abafashwe bafungiye kuri RIB sitasiyo ya Rubengera.

Ibiro by'Akarere ka Karongi