Karongi: Abahinzi ba Kawa bahembwe miliyoni 14 FRW bayivuga imyato mu guhindura ubuzima

Yanditswe na Mukwaya Olivier
Kuya 8 Ugushyingo 2019 saa 01:36
Yasuwe :
0 0

Abaturage bo mu Murenge wa Mubuga baravuga imyato igihingwa cya Kawa bamaze imyaka itanu bahinga bakavuga ko cyabagejeje kuri byinshi.

Ibi babivuze ubwo Mubuga Coffe yabashyikirizaga amafaranga miliyoni 14 y’ishimwe ku musaruro w’umwaka. Aya mafaranga yatanzwe na San Francisco Bay yo muri Leta zunze Ubumwe za Amerika isanzwe ibagurira kawa.

Yatanzwe mu rwego rwo kugabana inyungu n’abahinzi babashishikariza kongera umusaruro. Kugeza ubu abahinzi ba kawa bakaba bahabwa amafaranga 190 ku kilo nk’uko byemejwe na NAEB noneho San Francisco Bay ikabongera amafaranga 110 kuri buri kilo nk’ubwasisi [aya niyo yabyaye miliyoni 14 FRW].

Kayigire Emmanuel, umuhinzi wo mu kagari ka Murangara ufite ibiti 4868 akaba ari nawe wahawe ishimwe ry’ibihumbi 262 FRW, avuga ko kawa yamuteje imbere aho nawe yazamuye imibereho y’abakozi 10 akoresha.

Ati “Mu myaka itanu ubu umuryango wanjye witeje imbere, nubatse inzu nziza ku muhanda nahaye akazi abahinzi 10 bahoraho nabo imiryango yabo imeze neza, ubu mu myaka itanu iri imbere ngiye kongera ikawa ku buryo buri mwaka ngomba gutera ibiti 1000 bishya kuko mbona batangiye kuduhemba ni ukongera imbaraga’’

Mukamunana Emmima avuga ko kawa yamufashije kwiteza imbere akarihira abana be bose wenyine bakaba bararangije amashuri, agashima leta yahaye abagore agaciro.

Ati “Njyewe ubundi nari umucuruzi ariko ababyeyi banjye bakaba barahingaga kawa. Aho basaziye natangiye guhinga imirima basize none ubu nyuma y’imyaka itanu kawa yongereye amafaranga mu bucuruzi bwanjye narihiye abana banjye bose amashuri njyenyine bararangije. Byose byatewe n’uko leta yahaye agaciro umugore kuko hari abashoramari baza bashaka ikawa z’abagore gusa’’.

Abimana Mathias umuyobozi wa Mubuga Coffee, wahembwe miliyoni 4 z’amafaranga y’u Rwanda, avuga ko imyaka itanu isize uruganda rumaze kuzamuka akishimira uburyo abaturage bazamutse.

Ati “Mu myaka itanu maze nkorera mu Murenge wa Mubuga twageze kuri byinshi twavuye ku bitanda 18 byo kwanikaho ubu turi kuri 92 ariko tugiye kongera ku buryo tuzaba dufite 140 kandi ubu dufite ubushobozi bwo kwakira Toni 15 za kawa mu gihe twatangiye ari toni 4”.

Akomeza agira ati “Abaturage twarabafashije kuko abana babo 40 barangije amashuri yisumbuye twabahaye akazi mu rwego rwo gufasha leta nsaba ko urubyiruko rwakwitabira ku bwinshi kuko babonye ko ubwasisi bwatangiye kuboneka’’.

Umunyamabanga Nshingwabikorwa w’Umurenge wa Mubuga, Ntakirutimana Gaspard, avuga ko uretse guteza imbere abaturage kawa yazamuye ubukerarugendo bitewe n’abasura benshi baje mu ngendo shuri, cyangwa abakunzi b’ikawa baba baturutse impande zose, mu gihugu no hanze yacyo.

Ati “Bose baca mu mazi baje kureba ikawa ku buryo byanatumye hari abasaba ibibanza ku dusozi dukikije ikiyaga cya Kivu ngo hubakwe amahoteli. Bigaragara ko ikawa ari kimwe mu byakoreshwa mu bukerarugendo.”

Imibare itangwa n’Ikigo cy’Igihugu gishinzwe kohereza mu mahanga ibikomoka ku buhinzi n’ubworozi (NAEB), igaragaza ko mu Rwanda imiryango 400,000 itunzwe n’ubuhinzi bw’ikawa.

Ku mwaka nibura u Rwanda rweza udufuka turi hagati ya 267, 000 na 420,000, (Toni 16 000 kugeza kuri Toni 21 000). Ikawa ihingwa ku buso bungana na Hegitari 42,000 ikibanda cyane mu bice by’imisozi miremire.

Abahinzi ba Kawa i Karongi barayivuga imyato
Abahawe amashuri yisumbuye nabo bahawe akazi muri Kawa
Abimana Mathias (ibumoso) Umuyobozi wa Mubuga Coffee avuga ko kawa yazamuye abaturage ba Mubuga
Aho kwicara mu rugo bayobotse ubuhinzi bwa kawa
Umuhinzi wa kawa ahabwa amafaranga y'ishimwe ku musaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza