Imbogamizi kuri Kaminuza z’i Kigali zayobotse kwigisha hifashishijwe ikoranabuhanga

Yanditswe na Uwimana Abraham
Kuya 23 Mutarama 2021 saa 01:27
Yasuwe :
0 0

Nyuma y’ishyirwaho rya gahunda ya Guma mu Rugo mu Mujyi wa Kigali nk’imwe mu ngamba zo kwirinda ikwirakwira rya COVID-19, kaminuza zitandukanye zikorera muri uyu mujyi zahisemo gukomeza amasomo hifashishijwe ikoranabuhanga, mu kwirinda ko abanyeshuri basigara inyuma, gusa ngo haracyarimo imbogamizi.

Mu Mujyi wa Kigali kuri ubu habarizwa 50% bya kaminuza zose ziri mu gihugu, kandi inyinshi muri zo zitari muri Kigali usanga ari amashami y’iziri muri Kigalli, nk’uko imibare y’Inama Nkuru y’Amashuri Makuru (HEC) ibigaragaza.

Bamwe mu bayobozi ba kaminuza ziri mu Mujyi wa Kigali, bavuga ko nyuma y’icyemezo cy’Inama y’Abaminisitiri cyo gushyira Umujyi wa Kigali muri Guma mu Rugo, kaminuza zabo zitahagaritse amasomo, ahubwo bahisemo kuyakomeza hifashishijwe ikoranabuhanga nk’uburyo n’ubundi bwakoreshejwe mu gihe cy’amezi arenga arindwi amashuri amaze afunze.

Umuyobozi wa Kaminuza ya Kigali (UoK), Tombola Gustave, yabwiye The New Times ko guhera ku wa gatatu ku itariki 19 Mutarama, abanyeshuri basubiye ku buryo bwo kwiga hifashishijwe ikoranabuhanga hirindwa ko habaho kudindira mu masomo.

Yagize ati “Abanyeshuri bamaze kumenyera uburyo bwo gukoresha ikoranabuhanga, cyane ko ari bwo buryo bwakoreshejwe mu mwaka wa 2020, ikibazo gikomeye kigihari ni uko bamwe muri bo bagifite ibibazo bya internet cyangwa igiciro cyayo kiri hejuru.”

Tombola yavuze ko mu rwego rwo gukemura iki kibazo abanyeshuri bakwiye gushyirirwaho ubundi buryo bakoresha biga, cyane cyane abagowe n’imibereho muri Kigali, ni ibintu avuga ko basabye muri HEC bakaba bategereje igisubizo.

Ibi kandi bivugwa n’Umuyobozi wa Kaminuza ya UTB (University of Tourism, Technology and Business Studies), Callixte Kabera, na we yavuze ko iyi kaminuza yasubijeho uburyo bwo kwiga hifashishijwe ikoranabuhanga ku banyeshuri bose, kuko ubu ngo bitari ikibazo ahubwo bamaze kubimenyera.

Ati “Duha abanyeshuri bacu ubumenyi bukwiriye mu kwiga hifashishijwe ikoranabuhanga, urebye ku bigendanye n’ibikoresho, ubu kimwe cya kabiri cy’abanyeshuri bacu bose bafite ibikoresho by’ikoranabuhanga bibafasha mu gukurikirana amasomo, abatabifite bo birasaba gutegereza igihe amasomo asanzwe azafungurirwa.”

Kabera yongeyeho ko muri ibi bihe bya COVID-19 byasabye ko amasomo muri rusange akomeza hifashishijwe ikoranabuhanga, abanyeshuri batari bafite ibikoresho by’ikoranabuhanga babigendeyemo, asaba ko hakwiye kujyaho gahunda yakorohereza n’abo ngabo kugira ngo badacikanwa n’amasomo.

Ati “Igikenewe ni uko hashyirwaho gahunda aho buri munyeshuri wese ugiye muri kaminuza agomba kugira igikoresho cy’ikoranabuhanga kimufasha mu myigire ye, ibindi byose byaba ari byiza.”

Yongeyeho ati “Biragoye kuvuga ko nta kudindira bizabaho kuko abanyeshuri benshi badafite ibikoresho by’ikoranabuhanga bibafasha gukurikirana amasomo, ndetse n’abafite ibyabo bwite bakoresha nka telefone n’ibindi, bagorwa cyane no kubona internet. Mu rwego rwo kugira ngo rero ibi bitadindiza ireme ry’uburezi, hakeneye gushyirwaho gahunda ihamye yafasha bose.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .