00:00:00 IGIHE NETWORK KN KINYARWANDA EN ENGLISH FR FRANCAIS

Kamere yanze! France 24 yongeye kubaza Perezida Kagame ikibazo kidahinduka guhera mu 2011

Yanditswe na Philbert Girinema
Kuya 9 July 2022 saa 12:45
Yasuwe :

Hari ikibazo kimwe iteka kidasiba mu byo France 24 n’itangazamakuru mpuzamahanga muri rusange babaza Perezida Kagame mu gihe bagiranye na we ikiganiro. Icyo kibazo buri gihe kiza ari icya nyuma giheruka ibindi byose ku buryo kimeze nk’agashinguracumu!

Kuva mu 2011, nta kiganiro na kimwe Perezida Kagame yagiranye na France 24 ntabazwe icyo kibazo. Ni ikibazo kigaruka kuri manda ye, niba aziyamamariza kongera kuyobora u Rwanda.

Urebye ibiganiro byose Perezida Kagame yagiranye na France 24, icyo kibazo yarakibajijwe. By’umwihariko Umunyamakuru Marc Perelman wakoranye na we ikiganiro cyatambutse kuri uyu wa 8 Nyakanga 2022, ntiyigeze asiba kumubaza icyo kibazo guhera mu 2011 kandi gihora aricyo cya nyuma.

Iyo usesenguye ibyo biganiro kandi, biragoye ko hari icyarangira hatabajijwe ku ngingo zijyanye na demokarasi, berekana ko ibintu bicika mu Rwanda mu gihe mu bihugu by’amahanga ibyo bitangazamakuru biba bikomokamo habera amahano ndengakamere.

Ni ibintu bigaragaza uruhande itangazamakuru mpuzamahanga ribonamo Afurika n’u Rwanda muri rusange nk’ahantu hahora induru, haba abantu batubahiriza amategeko, umugabane w’ibibi byose bibaho.

Urugero rwa vuba rugaragaza uburyo ibi binyamakuru bibona Afurika ni itangazo ryo mu 2019 ritanga akazi rya The New York Times.

Muri Nyakanga 2019 ubwo The New York Times (NYT) yarimo gushaka umunyamakuru uzakora ku Biro byayo biri i Nairobi, abayobozi bayo bagaragaje neza ubwoko bw’inkuru bari biteze ku munyamakuru wari buhabwe akazi, wagombaga “Gushaka amakuru mu bihugu bitandukanye, kuva mu butayu bwa Sudani n’ihembe rya Afurika, kumanuka kugera mu mashyamba ya Congo n’inkombe za Tanzania.”

Ntabwo ryagarukiye aho kuko ryavugaga ko uzaba umuyobozi mushya azaba agiye gukorera “ahantu hadasanzwe kandi hihariye haboneka inkuru zikomeye zirimo iz’iterabwoba, intambara zishingiye ku mitungo, ikibuga kirwanirwa n’u Bushinwa no kwamburana ubutegetsi kwa hato na hato utibagiwe n’igitugu”.

Iyi nkundura yo kubona Afurika nk’umugabane w’ibibazo ni yo Perezida Kagame amaze igihe arwana, asobanurira itangazamakuru mpuzamahanga ko ridakwiriye gukomeza kwigira nk’irishaka gukura umugogo mu maso y’abandi ritihereyeho.

Mu kiganiro cyatambutse kuri uyu wa Gatanu, Marc Perelman, ntiyibagiwe ikibazo cye cya nyuma. Ajya gusoza ikiganiro, yabajije Perezida Kagame ati “Ese urateganya kongera kwiyamamaza?”

Umukuru w’Igihugu yamusubije ko amatora ari amahitamo y’abaturage, kandi akorwa mu mucyo nta ngingimira. Yavuze ko binashobotse yakwiyamamaza kugeza mu myaka 20 iri imbere.

Ati “Turi kuvuga amatora [...] amatora ashingiye ku mahitamo y’abantu. Mu byo tunengwa byose, nta muntu uravuga ko amatora atabaye mu mucyo ariko twabyumvise mu bindi bice abantu batavugaho, harimo ni iby’abantu batunenga.”

“N’ubu mu bihugu biteye imbere, hari ibibazo by’amatora. Mu minsi ishize, hari ikibazo cyabaye mu gihugu giteye imbere muri demokarasi aho umuntu yashatse …”

Umukuru w’Igihugu ntiyashatse kuvuga icyo gihugu, ariko ukurikiye neza ibyo yavugaga ni Leta Zunze Ubumwe za Amerika, aho Donald Trump wari Perezida yanze kwemera ko yatsinzwe na Joe Biden, bigateza imvururu mu gihugu.

Perezida Kagame yavuze ko nta muntu ukwiriye kumubwira ibyo gukora, mu gihe amatora ari mu biganza by’abaturage ngo bihitiremo icyo bashaka.

Muri Nzeri 2011, habura iminsi mike ngo arangize umwaka wa mbere wa manda ye ya kabiri, Perezida Kagame yaganiriye na Perelman nanone amubaza niba mu 2017 azava ku butegetsi.

Umukuru w’Igihugu yamusubije ko atumva impamvu ahora asubiza bene ibyo bibazo, ariko mu magambo make aramubwira ati “reka dutegereze turebe”.

Muri Nyakanga 2012, nanone Perezida Kagame yongeye kubazwa iki kibazo. Cyari icya nyuma nk’ibisanzwe, abazwa igihe azavira ku buyobozi bw’u Rwanda.

Icyo gihe yarasubije ati “Mfite igihugu ntari mfite mbere mu buzima bwanjye. Rero kuva njye mfite igihugu kiri kurushaho gutekana, gitera imbere, mfite byose. Nta mpungenge mfite. Najya no mu rugo rwanjye nkaryama, nkasoma, nkandika, nkanezerwa.”

Muri Mata 2014, ikibazo kijyanye n’amatora na manda nanone ni cyo cyasoje ikiganiro Perezida Kagame yagiranye na Perelman.

Icyo gihe yamubajije niba azahererekanya ubutegetsi mu mahoro n’undi uzamusimbura mu 2017, anamubwira ko hari abavuga ko aramutse atabikoze yaba atsinzwe ikintu gikomeye. Yanamubajije niba azahindura Itegeko Nshinga akongera kwiyamamaza.

Mu kumusubiza, Perezida Kagame yavuze ko umwaka wa 2017 utaragera, ko abantu badakwiriye gukomeza kwigira nk’aho bafitiye u Rwanda n’Abanyarwanda impuhwe.

Ati “Kuki abantu badategereza? Byabaye ngombwa ko mvuga kenshi kuri iyi ngingo kubera ibibazo byahoraga biza, mu buryo butandukanye. Ntabwo bishingiye kuri njye, ntabwo ari njye wanditse Itegeko Nshinga, ntabwo ngomba kubwira Abanyarwanda uko bitwara cyangwa ibyo kuvuga, byo gukora.”

“Ibibazo bikomeza kwisukiranya, bati ese urahaguma [ku butegetsi], ubuvuyeho. Nta gisubizo kinyura abantu kuri icyo kibazo.”

Mu 2021, bwo France 24 yakoze ikiganiro ifatanyije na RFI, maze umunyamakuru wa RFI abaza Perezida Kagame ati “Nyakubahwa Perezida, mumaze imyaka 21 muri kuri uyu mwanya. Amatora ataha azaba mu myaka itatu, uzaba uri umukandida?”

Perezida Kagame yamusubije ati “Mbere na mbere, ndifuza ko Imana yaba ikintije ubuzima bwiza, aho ni ku ruhande rwanjye bwite, naho ku bijyanye na Politiki, Abanyarwanda bazahitamo ariko nanjye nshobora gufata umwanzuro wanjye. Niba Abanyarwanda bavuze bati turacyagukeneye, turifuza ko ukomeza, ibyo ni ingenzi ariko nshobora kuvuga nti murabizi, ndumva nshaka gukora ibindi.”

Ibi bibazo n’ibindi bisa na byo bidasiba mu itangazamakuru mpuzamahanga bivuga kuri Afurika no ku Rwanda, bituma umuntu ashobora gukeka mu gihugu ibintu byacitse, ko u Rwanda ruri muri bya bihugu bizwi nka ’rogue states’, [État voyou] bitubahiriza amategeko mu buryo ndengakamere kugera no ku burenganzira bw’ibanze bwa muntu.

Umunyamakuru wa France 24, Marc Perelman, buri gihe ahorana ikibazo abaza Perezida Kagame mbere yo gusoza ikiganiro. Kiba kivuga kuri manda ye, niba azongera kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .