Kagame yavuze ku mubano n’u Bufaransa, ukwiyubaka k’u Rwanda, kongera kwiyamamaza n’ibindi

Yanditswe na IGIHE
Kuya 14 Gashyantare 2020 saa 10:21
Yasuwe :
0 0

Perezida Kagame, umuyobozi utera abandi ishema, ugira icyerekezo, ibanga, wubashywe, utinywa kandi ufite imiyoborere idasanzwe. Ni umwe mu bayobozi bigoye gusobanura muri iki kinyejana cya 21.

Mu myaka igera kuri 20 ayoboye u Rwanda, yarukuye mu mwijima wa Jenoside yakorewe Abatutsi mu 1994, arugira indorerwamo ya Afurika no hanze yayo. Muri make, ni umucunguzi w’u Rwanda n’Abanyarwanda.

Mu 1994, u Rwanda rwarasenyutse burundu, amabanki yasigayemo ubusa, ubutaka nta gihingwa kiriho ahubwo bwuzuyeho imibiri y’Abatutsi barenga miliyoni bishwe muri Jenoside.

Impunzi zari nyinshi yaba mu cyahoze ari Zaïre, ubu ni Repubulika Iharanira Demokarasi ya Congo, Tanzania n’ahandi, abarokotse Jenoside basigaye iheruheru. Mu myaka 26, akanyamuneza ni kose mu Banyarwanda, ahari umwijima hari umucyo, ahari amarira hari inseko.

Nta moko akirangwa mu Banyarwanda [Hutu, Tutsi, Twa], urubyiruko rurihangira imirimo igira uruhare mu iterambere ry’igihugu. Imihanda muri Kigali ni intagereranywa kandi irangwamo isuku.

Umugabo uri inyuma y’izi mpinduka zose, Perezida Kagame, yagiranye ikiganiro n’ikinyamakuru Le Point ku wa 31 Mutarama 2020, mu gihe cy’amasaha abiri ubwo cyari kimusanze muri Village Urugwiro.

Uwahoze ari Minisitiri w’Intebe w’u Bwongereza akaba n’inshuti ye ya hafi, Tony Blair, avuga ko Perezida Kagame ari ‘umuyobozi w’icyerekezo’. Vuba aha uwari Perezida w’u Bufaransa, Nicolas Sarkozy, yabwiye Le Point ko ‘yakozwe ku mutima na Perezida Kagame’.

Yashingiye ku buryo yabashije kongera kubaka igihugu nk’u Rwanda cyashenywe burundu na Jenoside, avuga ko ari umuyobozi ufite icyerekezo ku Rwanda na Afurika.

Iyi niyo mpamvu ibihugu nka Gabon, Togo, Bénin, u Burundi, Burkina Faso n’ahandi, byohereza itsinda ryo kwigira ku byo u Rwanda rwabashije kugeraho.

Binashimangirwa kandi n’icyizere Perezida Kagame adahwema kugirirwa mu ruhando mpuzamahanga, aho ku wa 9 Gashyantare yatorewe kuyobora Akanama k’Urwego rushinzwe Iterambere rwa AU (AUDA-NEPAD).

Inzego zitandukanye nk’Ikigega Mpuzamahanga cy’Imari (FMI) na Banki y’Isi, zishimira u Rwanda uko rwabashije guteza imbere ubukungu. Ku ruhando mpuzamahanga ntiruhatangwa kuko muri Kamena ruzakira Inama ya Commonwealth ndetse rukanayiyobora.

Ntawakwirengagiza ko Louise Mushikiwabo, ari we uyoboye Umuryango w’Ibihugu bikoresha Ururimi rw’Igifaransa (Francophonie). Mu minsi mike ishize kandi u Rwanda rwakoze igikorwa cy’indashyikirwa rwakira abimukira bagurishwaga nk’abacakara muri Libya.

Ikiganiro kirambuye Perezida Kagame yahaye ikinyamakuru Le Point

Le Point: Ubwiganze bw’u Bufaransa muri Afurika yo munsi y’Ubutayu bwa Sahara buri kugabanuka cyane, ahubwo hakagaragara uruhare rw’u Bushinwa, Turikiya cyangwa se u Burusiya. Ntabwo ibi bibateye impungenge?

Paul Kagame: Nta muntu n’umwe uduteye impungenge. [ aseka] Kuko nibura ubu bwo twihagazeho. Atari uko turi ibihugu by’ibihangange mu ikoranabuhanga ahubwo kuko inzira iganisha ku iterambere ndetse na politiki ihatugeza igaragara.

Yaba u Bushinwa, Turikiya, Leta Zunze Ubumwe za Amerika, u Burusiya, dukorana na buri umwe wese. By’umwihariko, ibyo bihugu si inshuti ndetse si n’abanzi.

Ihame ni uko u Rwanda rutajya rwivanga mu mikorere y’ibindi bihugu ndetse nabyo biba bitegereje ubufasha bwacu ku bibazo bimwe na bimwe. Niba dufite igitekerezo ku ngingo runaka, turabitanga, niba ntabyo turaceceka.

Le Point : Ni iki mwiteze ku Bufaransa? Imbabazi? Ishoramari?

Paul Kagame: Hagati y’u Rwanda n’u Bufaransa, hari byinshi byavuzwe, hari byinshi byakozwe... uyu munsi turareba ahazaza kurusha ahahise. Biragaragara ko Perezida Macron ari Umukuru w’Igihugu utareba ahahise...hari imikorere mishya.

Hari ibimenyetso bigaragaza ko umubano hagati y’ibihugu byacu byombi wateye imbere. Nk’urugendo rw’abayobozi b’Ikigo cy’u Bufaransa gishinzwe Iterambere. Abashoramari baje mu Rwanda mu gushaka aho bashora imari yabo.

Twakoze ingendo ebyiri mu Bufaransa ku butumire bwa Perezida Macron. Uyu munsi dufite Ambasaderi mushya na Louise Mushikiwabo ayobora Umuryango w’Ibihugu bikoresha Ururimi rw’Igifaransa. Ibi byose ni ibintu bitanga icyizere. Iyo urebye ahahise, ntabwo ubabarira.

Hari ibintu mudashobora kwibagirwa, ariko hari ibindi ubabarira. [Aseka.] Ntabwo buri gihe ushobora gukomeza utegereje abagusaba imbabazi. Ni aha buri wese ngo afate inshingano asabe imbabazi niba abona ko ari ngombwa.

Le Point: Mumaze imyaka irenga 20 ku butegetsi, ni izihe mbogamizi mwagize mu kuyobora u Rwanda?

Paul Kagame: Urebye hafi ya byose byari inzitizi. Twagombaga gusaba buri kimwe uhereye mu 1994, igihugu cyose cyari cyangiritse, nta na kimwe cyasigaye ariko imbogamizi ya mbere kwari ukongera guhuza abantu, bari bamaze gucengerwa mu bitekerezo byabo, bahatirijwe gutekereza ko batandukanye ntacyo bashobora gukorera hamwe.

Ku ruhande rumwe hari abiciwe, ku rundi hari abishe, abenshi babuze buri kimwe. Navuga ko buri kimwe cyari imbogamizi. Biragoye ko umuntu yabisobanura.

Le Point: Ni gute mwabashije kumvisha buri ruhande ko rukwiye kongera kubana?

Paul Kagame: Hari abatubwiye bati ‘Ni ibiki uvuga, ni gute wanyumvisha ko natanga imbabazi?’ Twabasubije ko dufite ejo heza n’igihugu tugomba guhuriza hamwe imbaraga mu kucyubaka.

Kuvuga ibi no kubishyira mu bikorwa urabizi bihagije ko nta kindi gisobanuro bifite ariko benshi mu babuze buri kimwe bemeye gutanga imbabazi bitanga ibisobanuro cy’uko twabigenje. Uko niko twatangiye buhoro buhoro kugira ngo abantu bongere gushyira hamwe ariko banahabwa inzira yo kongera kwiyubaka.

Mu 1994 byari bikenewe kongera gutekereza ku mutekano, kongera kuzana abaganga mu bitaro byari byuzuyemo inkomere, byari bikenewe kongera gufungura amashuri, kubazanira ibiribwa. Ibyo byose twabikoze dufatanyije n’abafatanyabikorwa bacu baduha ubufasha banatwizeza inkunga ariko natwe twagombaga kugira ibyo dushora kugira ngo twizere ko tutazakomeza kubeshwaho n’ubufasha. Izo mbogamizi n’ubu ziracyahari.

Le Point: Ubukungu bw’u Rwanda bwakomeje gutera imbere ku gipimo kirenga 7% mu myaka itanu ishize. Byatewe n’iki? Ese ni ibitangaza byabaye ku Rwanda?

Paul Kagame: Ubukungu bwacu bwari buhagaze neza guhera mu myaka 15 ishize, bwiyongera ku gipimo kiri hagati ya 7-8% kandi ukurikije imibare itangwa n’ibigo bikurikirana ubukungu bwacu igaragaza ko bwageze ku 10% mu 2019.

Ibi ndabivuga nshize amanga ariko mu 2020 na 2021 ubukungu bwacu buzarenga ku gipimo cya 8%. Niba icyo aricyo gitangaza cyabaye ku Rwanda tuzakomeza kuri uwo murongo nubwo ntacyo twakoze kidasanzwe.

Kimwe n’ibindi bihugu byo ku Isi, twagizweho ingaruka n’impamvu nyinshi tudafiteho ububasha zirimo nk’ibiciro by’ibyifashishwa mu nganda ariko duhanze amaso ubuhinzi, ubukerarugendo, umutekano, kunoza serivisi, ibikorwaremezo n’ibindi. Nyuma y’izo nzego, izindi zirakurikira.

Imbonerahamwe igaragaza uko ubukungu bw'u Rwanda bwazamutse kuva mu myaka yashize

Le Point: Impinduka za mbere ntabwo ari iz’imyumvire?

Paul Kagame: Ubusanzwe imitekerereze y’abantu si imwe. Kugira ngo tugere kuri ibi twashoye mu kongerera ubushobozi abantu, by’umwihariko mu rubyiruko no mu burezi.

Twashakiye igisubizo urwego rw’ubuzima bw’Abanyarwanda, twabongereye ubumenyi, urubyiruko rwarigishijwe neza, rutegurwa kujya ku isoko ry’umurimo atari gusa ku ryo mu Rwanda ahubwo no ku rwego mpuzamahanga, ibyo byose dutangiye kubona imbuto zabyo.

Twahinduye uburyo bw’imiyoborere. Gusobanukirwa icyiza ku Banyarwanda ni byo byatugejeje ku nzira nyayo yo gukora mu nyungu z’abaturage no gushyiraho politiki ngenderwaho.

Le Point: Imikorere yanyu ifatira icyitegererezo kuri Singapore?

Paul Kagame: Yego. Afurika yose ishobora kuberwa icyitegererezo n’iki gihugu. Mu myaka 50 ishize, iki gihugu cyari ku rwego rumwe rw’iterambere na Afurika. Nimujya i Jakarta, Singapore, Malaysia, Koreya, muzatangazwa n’ibyo muzabona. Dufite byinshi byo kubigiraho.

Le Point: Ni iki Afurika yakwigira kuri Aziya?

Paul Kagame: Byinshi cyane, uko bashora imari mu mishinga y’ibikorwaremezo, ikoranabuhanga, umutekano, uburezi, ubucuruzi, uko bakurura abashoramari n’ibindi.

Ariko mbere ya byose, ni ngombwa guhera mu gushora imari mu bantu, ibindi bigakurikira. Nyuma ya byose, uburyo ushora imari mu bantu bizaba urufunguzo rwa byose. Igikenewe ni uguha buri wese amahirwe angana atari itsinda runaka ryiharira inyungu za byose.

Le Point: U Rwanda buri gihe rutangwaho urugero mu kurwanya ruswa. Ni gute mwabigezeho, ni gute mwakoze kugira ngo Abanyarwanda bumve uburyo bwanyu bwo guhangana n’ikibazo?

Paul Kagame: Twumvise vuba ko ruswa ari inzitizi mu kongera kwiyubaka kwacu. Ni abaturage babihomberamo. Twagombaga kumvisha abaturage ko ruswa ari ikibazo gikomeye. Iteka ni akazi k’abantu bumvwa n’abaturage, abakozi ba leta, abayobozi, akenshi n’abagize guverinoma.

Abaturage bahombera cyane muri iyi ruswa kandi nta muntu watekerezaga ko ari ahantu haturuka inyungu.

Byarakozwe kuko nta yandi mahitamo twari dufite. Niyo mpamvu twashyizeho amategeko na politiki zo kurwanya ruswa kugira ngo twizere ko uyijanditsemo wese abihanirwa. Yaba mu burezi, ubuzima, kubona imiti, n’izindi serivisi abaturage bagomba guhabwa, atari ngombwa ko bishyura ngo babone ubwo burenganzira.

Urugero kandi rugomba guturuka hejuru. Yaba muri guverinoma, buri wese agomba kwishyura amashuri y’abana be kimwe n’umuturage usanzwe.

Twashyize imbaraga muri uwo muco mbere na mbere muri uru rwego rwo hejuru hanyuma bijya muri sosiyete yose. Buri faranga dushyize mu bikorwa by’iterambere ry’igihugu cyacu, rijya aho dushaka kandi ntaho bigongana. Abanyarwanda babonye inyungu vuba. Byahinduye kandi imitekerereze yabo.

Le Point: Muri Afurika y’Uburengerazuba, ifaranga rya CFA, rigiye gukurwaho hajyeho irya ECO. Iki ni igihe cya Afurika cyo gutunga ifaranga ryayo?

Paul Kagame: Byaba ibituruka mu mateka y’abakoloni, byaba ikintu cyiza cyangwa ikibi, icy’ingenzi uyu munsi ni uko abayobozi bahisemo guhindura amateka yabo bakajyana n’ibyo bumva bibabereye.

Ku rundi ruhande, aya mahitamo agomba gushingira ku baturage ba kariya gace n’abayobozi babo. Ndabonamo ikintu cyiza muri uru rugendo rwose, ari cyo gushyira hamwe kurimo kugaragara mu karere kandi ni ingenzi mu kuzamura ubukungu. Ni ingenzi gutekereza kuri uyu munsi no ku hazaza.

Le Point: Wubatse politiki iha ibidukikije umwihariko udasanzwe. Kuki mubifata nk’ingingo y’ibanze kuri mwe?

Paul Kagame: Imyaka irenga 10 irashize dutangiye gahunda yo gutegura no gushyira mu bikorwa Politiki y’Igihugu y’Ibidukikije.

Intero [slogan] yacu ni ‘Isuku, kwita ku bidukikije no kubazwa inshingano’. Aha bisaba gusubira mu 1994 kugira ngo ubyumve neza. Twanyuze mu makimbirane yasenye igihugu, atandukanya abantu ku buryo ibintu byose byari byasenyutse.

Abanyarwanda bari bakeneye gusukura byose mu buryo bw’imitekerereze n’imibereho isanzwe. Twarebye uko bikorwa kuri buri wese mu buzima bwe bwa buri munsi; muri rusange mu gitondo dusukura inzu zacu. Naravuze nti kuki tudafata igihugu nkuko twita ku ngo zacu?

Kuki tutabyuka mu gitondo cyangwa buri gitondo ngo dukore isuku? Twemeranywa ko mu gukora isuku, icyo ukenera ni ubushake n’umurava wo kubikora.

Uku niko twatangiye. Imyanda myinshi twakusanyaga ni ijyanye n’amacupa ya pulasitiki wasangaga yandagaye ahantu hatandukanye.

Le Point: Kimwe n’ibihugu byateye imbere wafashe ingamba zikomeye zo guca pulasitiki

Paul Kagame: Hashize imyaka 12 twiyemeje guca pulasitiki z’ubwoko bwose. Twasuzumye neza ingaruka ziri mu myanda ya pulasitiki. Ntibyari bihagije gushyiraho itegeko gusa, ahubwo hari hanakenewe gutekereza ku bisubizo birambye.

Ni ibisubizo byizewe kandi bishobora no gutanga amahirwe y’akazi. Urwo rugamba rwagize ingaruka nziza zatumye iri bwirizwa rishyigikirwa. Simbivuze ngamije gukurura nishyira ariko iyo utangiriye ku busa, uba ufite inshingano zo kwirinda gusubiramo amakosa y’ahahise. Twahisemo kugerageza politiki ifite icyerekezo ku hazaza hacu.

Le Point: Ibijyanye n’ibidukikije byaba byubakiye ku bwiyunge bw’Abanyarwanda? Byaba bifitanye isano n’ukwiyubaka k’u Rwanda?

Paul Kagame: Nibyo nta gushidikanya. Ikibabaje ni uko mu bibazo twanyuzemo niho dutekerereza kuri ibyo bibazo. Simvuze ko ibyabaye ari byiza. Ndashaka kugaragaza ko byadufashije guhindura uko dukoramo no guharanira kwimakaza amahoro hagati y’abantu batakaje ibyabo byose kandi baranaciwemo ibice. Kuba ahantu hasukuye bituma umuntu yongera kwigarurira icyizere akanakigirira abandi.

Ibidukikije byabaye ihame rishya ryatangirijweho urugendo rushya rw’ubuvuzi bw’ibanze. Nkuko nabikomojeho, abantu bari bakeneye kugira imitekerereze ihamye.

Mu 1994, twarebaga ku ntego n’imbogamizi zashoboraga kongera guhuza abaturage, aho ibijyanye n’ibidukikije byari iby’ibanze.

Perezida Paul Kagame yavuze ku mubano wa Afurika n’u Bufaransa, ukwiyubaka k’u Rwanda nyuma ya Jenoside yarushegeshe

Le Point: U Rwanda rwahaye umwihariko ibijyanye no kwita ku bukerarugendo ku rwego rwo hejuru…

Paul Kagame: Nibyo hari impamvu, igihugu cyacu ni gito. Iyo uri muto, ni ngombwa kongera agaciro k’ibyo ufite. Bijyana no kurinda ibirimo Ingagi zo muri Pariki y’Ibirunga kuko aribyo binyabuzima bisigaye muri aka gace byigabanyije muri Uganda, Repubulika Iharanira Demokarasi ya Congo n’u Rwanda.

Aka gace gato niko konyine ku Isi kakibungabunze ingagi, turamutse duhisemo kugafungurira umubare munini w’abagasura, pariki ishobora kwangirika byihuse.

Ariko tugiye guhitamo kugira ngo utange serivisi y’agaciro gahambaye, abantu baraza, bakishimira imbaraga twashyize mu kubungabunga uwo murage Isi ifite.

Ibi nibyo turi kugerageza gukora muri Pariki y’Igihugu y’Akagera ibarizwamo inyamaswa eshanu nini zikunze gukurura ba mukerarugendo zirimo Intare, Inzovu, Ingwe, Inkura n’Imbogo.

Twahise twumva ko ari ingenzi kuzamura agaciro k’ibyanya bitandukanye tubiha umwihariko. Umusaruro watangiye kuboneka kuko umubare w’abasura uriyongera bihoraho.

Le Point: Mu Nteko, Guverinoma, inzego z’imiyoborere no mu bigo mpuzamahanga (Mushikiwabo uyoboye OIF), abagore bariganje. Ni Intambwe yari yoroshye guterwa no kwakirwa mu gihugu cyawe?

Kagame: Icya mbere navuga ni uko tutarakora ibiri ku rwego rwifuzwa. Kuri iyi ngingo turatekereza ariko tukanashyira mu bikorwa. Abagore muri sosiyete yacu ntibarahabwa agaciro gahagije. Rimwe na rimwe usanga ari ukubera umuco, urwego rw’ubumenyi bwo mu ishuri, ubushake bw’imiryango n’ibindi.

Iyo niyo myumvire yari yarabase Abanyarwanda benshi bumva ko nta mpamvu yatuma iterambere ry’abagore rishyigikirwa.

Nyamara hari abagore basaga 52% mu Rwanda. Ni gute igihugu cyatera imbere kirengagije cyangwa kigasiga inyuma 52% by’abaturage bacyo? Ntibyumvikana.

Abagore bakwiye guhabwa amahirwe angana n’ay’abagabo kandi bigakorwa kuva mu buto bwabo.

Le Point: Mushishikariza urubyiruko rw’Abanyarwanda kuva mu gihugu rukajya kwiga, gukora cyangwa gutura muri Aziya, Amerika n’i Burayi?

Paul Kagame: Dushyira imbaraga mu burezi muri rusange kugira ngo abanyeshuri bumve batekanye hano, bashaka kuhaba no kuhaguma. Tubaye abanyakuri, ntidufite ibyo dukeneye byose.

Bituma dushyiraho buruse tugamije gushishikariza abanyeshuri guhaha ubundi bumenyi hanze muri Afurika, Aziya, Amerika n’i Burayi. Benshi baragaruka, abandi bagasigara mu bihugu byabakiriye ariko abenshi bakomeza gukorana bya hafi n’u Rwanda. Hagomba kubaho uburyo bukwiye bwo gukurikirana abagenda, abagaruka n’abasigara muri ibyo bihugu.

Le Point : Nihe mubona u Rwanda mu myaka icumi iri imbere?

Paul Kagame: Reka nguhe ingingo nke: Mu myaka 20 ishize, igihugu cyacu cyageze ku mpinduka zigaragara. Twagerageje gukura mu bukene miliyoni z’abaturage, twagerageje kugabanya ubusumbane mu mijjyi no mu bice by’icyaro.

Ni ukuvuga ngo kuva ubu kugera mu 2030, ndizera ko tuzaba twarageze ku zindi mpinduka ku baturage bakiri mu bukene. Aha turi kuvuga dushingiye ku igenamigambi, iterambere mu guhindura ubuzima. Hari ikindi kigereranyo cy’ingenzi, ni icyizere cy’ubuzima. Hagati y’umwaka wa 2000 n’uyu munsi, mwari muzi ko icyizere cyo kubaho mu Rwanda cyavuye ku myaka 49 kikagera kuri 67?

Le Point: Imiryango mpuzamahanga itandukanye ibashinja guhimba imibare ivuga ku bijyanye n’ubukene…

Paul Kagame: Ibyo ntabwo mbyitayeho. Kuko muri i Kigali, mujye aho mushaka hanyuma mubaze Abanyarwanda, bashobora kubasubiza. Mwemere ibyo mbabwiye cyangwa se ntimubyemere. Ibindi ni politiki.

Le Point : Ntabwo utewe ubwoba n’intagondwa muri Islam?

Paul Kagame: Ibihugu byinshi mu karere byagizweho ingaruka nabyo, ni ukuvuga ko bitureba. Ntabwo wavuga ko turi mu mutuzo, kuko abo bakora ibitero by’iterabwoba rimwe na rimwe bagera no mu Rwanda bashaka kuhashyira ibirindiro. Tugenzurira hafi intambwe zabo. Nta muntu ufite ubudahangarwa, turi maso.

Le Point : Ku Bafaransa bazi bike, Paul Kagame ni muntu ki ? Umuturage w’Isi, uwa Afurika, umuntu wababajwe n’amateka ye y’ahahise, imibabaro?

Paul Kagame: Mbere na mbere ndi umuntu. Ariko imbogamizi n’Isi muri rusange yatumye mba undi muntu utandukanye namwe… ibikorwa byinshi- byose bigoye – byagize ingaruka zikomeye kuri njye. Ibi byose kandi biterwa n’aho umuntu aba yaravukiye, ibyabaye mu buzima bwacu. Ariko ushobora gufata umwanzuro wo gukora icyiza cyangwa ikibi. Ushobora gufata umwanzuro wo kuba umunyakuri, ushobora gufata umwanzuro wo gukora mubi, wo kuba umunyabugugu cyangwa se umunyempuhwe. Gusa buri gihe ngerageza ku ruhande rwiza rw’ibyo ubumuntu budusaba. Sinavuga ko nakoze neza byose ariko ndagerageza.

Le Point : Ese birashoboka ko uzaba uri Perezida w’u Rwanda mu 2030 ?

Paul Kagame: Bizaterwa n’impamvu zitandukanye, imbogamizi, umwuka igihugu kizaba kigiye gukoreramo. Ku giti cyanjye, ndifuza umunsi umwe, ahari mu hazaza, nkaruhuka nkaba mu bundi buzima bwanjye bwite. Ntabwo mu biro byanjye nubahiriza inshingano nk’umusirikare muto, ntabwo ndi mu butumwa. Ahari nicyo gihe ko abandi bantu bazigaragaza bagafasha igihugu gutera imbere.

Paul Kagame: Ni uwuhe murage mwifuza gusigira igihugu cyanyu, Afurika n’isi?

Paul Kagame: Buri mwaka nkora igenzura ry’ibyo nanyuzemo, ibyo nagezeho n’ibyo nagizemo uruhare. Niba mu buzima bwanjye bwose narabashije kugira uruhare mu gukemura ibibazo byinshi byagize ingaruka ku Rwanda, nanjye bikangiraho ingaruka ubwanjye, bikanagira ingaruka ku mugabane; ubwo nakwemeza ko uwo ariwo murage wanjye.

Le Point: Bavuga ko mukunda umupira w’amaguru. Ese mufana Arsenal cyangwa PSG?

Paul Kagame: Nkunda siporo muri rusange, by’umwihariko umupira w’amaguru. Sinshobora gukora urutonde rw’amakipe, ariko hari Arsenal nafannye kuva mu myaka isaga 30 ishize. Hari kandi na PSG yabaye umufatanyabikorwa vuba aha. Bose bafite abakinnyi beza cyane. Nzishimira gufana umukino umwe mu bihe biri imbere nibikunda. Ariko hari n’ayandi makipe nka Barcelone, Madrid, Juventus […].

Nakinaga Basketball nkiri muto. Nanareba imipira, ariko sinkikina. Nakinnye na Volleyball, ariko ubu ku myaka yanjye sinkibasha kuyikina. Iyo mfite umwanya nkina Tennis.

Le Point: Igihugu cyanyu cyatangiye kwiyamamaza mu buryo butunguranye cyifashishije amakipe ya Arsenal na PSG. Ibyo mwashoye bihwanye n’ibyo mubona?

Paul Kagame: Cyane rwose, bimeze neza. Ibyo twashoye kuri Arsenal byatanze umusaruro mwiza. Duteganya kwiyongera k’umubare w’abasura u Rwanda baturutse mu Bwongereza. Ntekereza ko twungutse hafi inshuro zitari munsi y’eshanu z’ibyo twashoye. Kuri Paris Saint-Germain, simfite imibare neza, gusa amasezerano yo yashyizweho umukono.

Kylian Mbappé Lottin na Neymar da Silva Santos Júnior bagaragaye mu mwambaro wa Visit Rwanda wamamaza ubukerarugendo bw'u Rwanda. Aha ni ku mukino wahuje iyi kipe na Nantes wabaye ku wa 4 Ukuboza 2019

Le Point: Hanyuma isiganwa ku magare?

Paul Kagame: Isiganwa ku magare ni umukino w’ingenzi cyane ku gihugu cyacu. Abantu bava mu Bufaransa, Leta Zunze Ubumwe za Amerika kubera amarushanwa, kandi agategurwa mu gihugu hose. Ubu twatanze kandidatire yacu mu kwakira shampiyona y’Isi itaha, igomba kuba mu 2025. Dushobora kuzaba igihugu cya mbere ku Mugabane wa Afurika cyakiriye iri rushanwa.

Le Point: Ese mwaba mukoresha siporo nk’igikoresho cyo kuyobora, nkuko Qatar na Arabie Saoudite babigenza?

Paul Kagame: Yego, siporo ni igikoresho cyo kuyobora kubera ko ihuza abantu. Ubwo ni bwo bwiza bwa siporo. Iyo abantu bakora siporo, ntibibaza ibibazo ku bo muri bo, aho imiryango yanyu ikomoka, n’ibindi, kandi bikarangira buri wese yishimiye kuba ari hamwe na mugenzi we, yatsindwa cyangwa agatsinda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza