Kagame yasabye ibihugu bikize ku Isi kwemeza amasezerano ya Kigali arengera ikirere

Yanditswe na Ferdinand Maniraguha
Kuya 2 Ukuboza 2018 saa 11:00
Yasuwe :
0 0

Perezida Paul Kagame yasabye ibayobozi b’ibihugu 20 bikize ku Isi (G20) kwihutira gusinya no kwemeza amasezerano ya Kigali agamije kurwanya iyoherezwa mu kirere ry’imyuka ihumanya ikirere.

Amasezerano ya Kigali (Kigali Amendment) yemejwe mu 2016, avugurura amasezerano ya Montreal yerekeye imyuka yangiza akayunguruzo k’izuba.

Iyo myuka ituruka mu byuma bikonjesha izwi nka Hydro fluorocarbons irusha ububi inshuro 1430 umwuka mubi usanzwi uzwi nka Co2.

Buri mwaka iyi myuka yiyongera mu kirere ku kigero cya 10 na 15 %. Ikibi cyayo kandi iguma mu kirere imyaka igera kuri 29.

Kuri uyu wa Gatandatu ku munsi wa kabiri w’inama y’ibihugu 20 bikize ku Isi yaberaga Buenos Aires muri Argentine, Perezida Kagame yavuze ko kurwanya ibyangiza ibidukikije ari yo nzira iboneye y’iterambere.

Yavuze ko ihindagurika ry’ibihe ritewe n’imyuka yangiza ikirere ari ikibazo cyugarije Isi yose, asaba ibihugu bikize ku Isi gufata iya mbere mu gushakira umuti icyo kibazo.
Ati “Ubushakashatsi bwagaragaje ko ihindagurika ry’ibihe ari ikibazo giteye inkeke. Hari icyakorwa n’ibihugu bigize G20, natwe twese. Mwemeze kandi mushyire mu bikorwa amasezerano ya Kigali yunganira aya Montreal, akuraho ikoreshwa ry’imyuka ya hydro fluorocarbons. Ibihugu bike mu bigize G20 nibyo bamaze kuyashyira mu bikorwa.”

Muri Nyakanga uyu mwaka, ibihugu 39 nibyo byari bimaze gusinya cyangwa kwemeza burundu aya masezerano. Hari hakenewe ibihugu 20 biyemeza ngo atangire gushyirwa mu bikorwa guhera muri Mutarama 2019.

Mu bihugu 20 bikize, Australia, Canada, u Bufaransa, U Bwongereza, u Budage na Koreya y’Epfo nibyo bimaze kuyashyiraho umukono.

Perezida Kagame yibukije abitabiriye inama ko igishimishije ari uko abakora ubucuruzi benshi bashyigikiye ayo masezerano yitezweho kutuma ubushyuhe butiyongera dogere selisiyusi 0.5 mu mwaka wa 2100.

Leta Zunze Ubumwe za Amerika ni kimwe mu bihugu bifite inganda nyinshi kandi zikomeye zikora ibijyanye n’ibyuma bikonjesha.

Icyo gihugu ntikirasinya amasezerano ya Kigali, hari impungenge ko gishobora no kutayasinya kubera uburyo Perezida Donald Trump yakuye Amerika mu masezerano ya Paris agamije kurengera ibidukikije, avuga ko agamije gusubiza inganda za Amerika inyuma.

Icyakora, Raporo yo muri Gicurasi yakozwe n’Ikigo gishinzwe ibijyanye n’ibyuma bishyushya n’ibikonjesha, igaragaza ko Amerika izunguka niramuka isinye ayo masezerano.

Impamvu ni uko sosiyete zikomeye zo muri Amerika ari zo ziza imbere mu gukora ibikoresho byifashishwa hakorwa ibyuma bikonjesha.

Kudasinya ayo masezerano, bizatuma inganda zo muri Amerika zitabasha kugurisha ibyo bikoresho mu bindi bihugu, bigabanye amafaranga yinjizwaga.

Raporo ivuga ko muri ayo amasezerano Amerika izungukiramo imirimo mishya 33000 bitarenze 2027 kandi buri mwaka mu bukungu bwayo hakajya hinjira miliyari 12.5 z’amadolari.

Kuri ubu imyuka yangiza ikirere iva mu byuma bikonjesha n’ibishyushya igize 1 % y’imyuka yose yangiza ikirere. Nta gikozwe bizaba byikubye kabiri bitarenze 2020.

Ibihugu byasinye amasezerano ya Kigali byiyemeje kugabanya ikorwa n’ikoreshwa ry’ibyuma bikonjesha byangiza ikirere ku kigero cya 80 % mu myaka 30 iri imbere.

Mu 2050, ku Isi hazaba hari ibyuma bikonjesha (air conditioners) bigera kuri miliyari 5.6. Bivuze ko nibura buri masegonda icumi hazajya haba hagurishije ibyuma bikonjesha icumi.

Perezida Kagame ubwo yari yitabiriye inama ya G20
Perezida Paul Kagame yasabye ibayobozi b’ibihugu 20 bikize ku Isi (G20) kwihutira gusinya no kwemeza amasezerano ya Kigali agamije kurwanya iyoherezwa mu kirere ry’imyuka ihumanya ikirere
Inama ya G20 yari imaze iminsi ibera muri Argentine
Perezida Kagame ari kumwe na mugenzi we wa Argentine,Mauricio Macri
Perezida Kagame aganira na Minisitiri w'Intebe wa Canada,Justin Trudeau

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza