Kabuga Félicien ukiri mu kato kubera COVID-19 yangiwe guhura n’umwavoka we

Yanditswe na Rabbi Malo Umucunguzi
Kuya 5 Ugushyingo 2020 saa 01:14
Yasuwe :
0 0

Umucamanza lain Bonomy w’Urwego rwasigaranye imirimo y’Inkiko Mpuzamahanga Mpanabyaha zirimo urwari rwarashyiriweho u Rwanda, IRMCT, yanze ubusabe bw’umwavoka wa Kabuga Félicien washakaga ko bahura imbonankubone, mu gihe bitemewe kubera icyorezo cya Coronavirus.

Ku wa 21 Ukwakira nibwo IRMCT yemeje ko nyuma yo gufatirwa mu Bufaransa, Kabuga abanza kujyanwa by’agateganyo ku ishami ry’Urwego ry’i La Haye mu Buholandi, aho guhita ajyanwa i Arusha muri Tanzania, aho impapuro zisaba ko afatwa zategekaga ko agomba gufungirwa.

Ni icyemezo cyafashwe hashingiwe ku bibazo by’ubuzima bwa Kabuga byagaragajwe muri raporo y’umuganga washyizweho n’abavoka be. Ni mu gihe Ubwanditsi bwavuze ko mu nshuro nyinshi bwayisabye, butigeze bwakira raporo y’ubuzima bwa Kabuga yagombaga gutangwa n’ubuyobozi bw’u Bufaransa bwari bumufunze.

Abashinzwe ubuzima i Arusha n’i La Haye bavuze ko nta wabasha gufata icyemezo gishingiye ku makuru afatika cyangwa kitabogamye ku bushobozi bw’umubiri wa Kabuga ku buryo yakoherezwa muri Tanzania, hafatwa icyemezo ko aba ajyanywe i La Haye by’agateganyo, kugira ngo hakorwe isesengura ku buzima bwe.

Umwavoka we yamusanze mu Buholandi

Ku wa 26 Ukwakira 2020 nibwo Kabuga Félicien yoherejwe muri Gereza y’Umuryango w’Abibumbye, avanywe mu Bufaransa aho yafatiwe, ariko abanza gushyirwa mu kato k’iminsi icumi nk’uko bigenda ku muntu wese winjiye mu Buholandi, mu kwirinda ikwirakwira ry’icyorezo cya Covid-19.

Ku wa 30 Ukwakira 2020, umwavoka wa Kabuga, Me Emmanuel Altit, yandikiye Urwego asaba ko hashyirwaho ingamba zatuma babasha kugirana ibiganiro bari kumwe, kugira ngo bitegure umunsi wa mbere wo kugezwa imbere y’urukiko, baganire ku buryo bwo kuburana n’ibimenyetso byashingiweho afatwa.

Kabuga yitwaje ko gusurwa n’umwavoka ari ngombwa kugira ngo ahabwe ubutabera buboneye, cyane ko ari uburenganzira bw’ibanze bw’umuburanyi, kandi ngo ni uguhura bari kumwe, cyane ko Kabuga atazi gukoresha itumanaho mu buryo bw’amashusho, byongeye, ngo agorwa no gukoresha telefoni.

Ni ubusabe yatangaga mu gihe abantu basanzwe batemerewe kwinjira mu nyubako z’Urwego kugeza ku wa 31 Ukuboza 2020, ariko Me Altit we yanditse avuga ko icyorezo cya COVID-19 kidasobanuye ko uburenganzira bw’umukiliya we bugomba guhonyorwa.

Ibyo ngo banabishingiraga ko ubwo Me Altit yageraga mu Buholandi basanze nta Covid-19 yanduye, kandi koroshya amabwiriza agenga akato ngo bishobora gukorwa.

Nyuma yo gusesengura ubwo busabe, Umucamanza yavuze ko bijyanye no kuba gusura imfungwa byarabaye bihagaritswe mu kuzirinda COVID-19, kuba Kabuga yaroherejwe mu Buholandi by’agateganyo kubera impungenge z’ubuzima, ari ngombwa ko amabwiriza yashyizweho yubahirizwa uko ari.

Gusa ngo bijyanye n’uko hakenewe ko hihutishwa ko Kabuga agezwa imbere y’umucamanza, Me Altit yakwemererwa kwinjira mu nyubako z’Urwego kugira ngo avugane n’umukiliya we, ariko hakoreshejwe ikoranabuhanga ry’amashusho, kandi akagendera ku mabwiriza yashyizweho.

Mu gihe Kabuga yavuze ko atazi gukoresha iryo koranabuhanga ry’amashusho, umucamanza yavuze ko ubwanditsi bw’urukiko bugomba kubimufashamo kandi itumanaho ryabo rikaba mu bwisanzure, igihe bidakunze, bakazamenyesha umucamanza hagafatwa izindi ngamba.

Umucamanza lain Bonomy ariko yategetse ko Ubwanditsi bw’urukiko bugomba gutuma, ku munsi wo kugezwa mu rukiko bwa mbere uzashyirwaho bidatinze, Kabuga yabonana n’umwunganira mu gihe gikwiriye mbere y’iburanisha, kugira ngo bemererwe noneho kugirana ibiganiro imbonankubone, bijyanye n’amabwiriza yashyizweho n’inzego z’ubuzima.

Me Emmanuel Altit yangiwe guhura na Kabuga imbonankubone, kubera ibihe bya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .