Kabgayi: Ubugome bwicanwe Abatusi buteye ishavu n’agahinda- Musenyeri Smaragde

Yanditswe na

Faustin Nkurunziza

Kuya 3 Kamena 2014 saa 11:41
Yasuwe :
0 0

Umushumba wa Diyosezei ya Kabgayi, Smaragde Mbonyintege, yavuze ko kumva ubugome bwakorewe Abatutsi biciwe abari bahungiye i Kabgayi biteye ishavu n’agahinda.
Kuwa 2 Kamena mu muhango wo kwibuka abazize Jenoside yakorewe Abatutsi mu karere ka Muhanga by’umwihariko abahungiye i Kabgayi bamwe muri bo bakahicirwa, abandi bakajyanwa kwicirwa mu bice bitandukanye no kurohwa muri Nyabarongo, Musenyeri Smaragde yavuze ko nubwo icyo gihe atabaga muri iyo Diyosezi, ngo abone n’amaso ye (...)

Umushumba wa Diyosezei ya Kabgayi, Smaragde Mbonyintege, yavuze ko kumva ubugome bwakorewe Abatutsi biciwe abari bahungiye i Kabgayi biteye ishavu n’agahinda.

Kuwa 2 Kamena mu muhango wo kwibuka abazize Jenoside yakorewe Abatutsi mu karere ka Muhanga by’umwihariko abahungiye i Kabgayi bamwe muri bo bakahicirwa, abandi bakajyanwa kwicirwa mu bice bitandukanye no kurohwa muri Nyabarongo, Musenyeri Smaragde yavuze ko nubwo icyo gihe atabaga muri iyo Diyosezi, ngo abone n’amaso ye abatwarwaga urusorongo bajya kwicwa, ngo iyo abitekereje asanga biteye ishavu n’agahinda, agendeye ku buhamya bw’abaharokokeye bagenda batanga hirya no hino.

Mu ijambo rye yirinze kugira uwo atunga agatoki haba mu bihaye Imana bivugwa ko baba baragize uruhare muri Jenoside yakorewe Abatutsi, ati “ Nubwo ibyabereye i Kabgayi bitavugwaho rumwe, gusa amateka yaho arabigaragaza.”

Ministiri w’Umuco na Siporo Protais Mitali nawe yavuze ko amateka ya Jenoside i Kabgayi afite inyigisho yihariye, ati“Urwibutso rwa Kabgayi rufite umwihariko ukomeye kubera imvo n’imvano ya Jenoside yacuriwe muri aka gace k’Amajyepfo! Bikwiriye kutubera isomo ry’uko bitazongera kubaho ukundi.”

Yakomeje agira ati “Ntawe ukwiriye guca ku ruhande ibyo Kambanda wahoze muri Leta y’abatabazi yakoreye Abatutsi bo muri aka gace.”

Minisitiri Mitali yashimiye abagize uruhare mu kurokora Abatutsi, asaba abarokotse Jenoside kwihangana bagakomera, anasaba ko abagifite imvugo mbi yo gusesereza abacitse ku icumu bakwiye kubihagarika.

Mu buhamya bwatanzwe na Nduwayezu Venuste warokokeye i Kabgayi, yavuze ko yiboneye n’amaso ye uko Abatutsi batemagurwaga ibitsi bajyanwa mu buvumo bwa Ndiza kuhicirwa.

Yavuze ko mu kurokoka kwe yaje guhishwa mu mutiba w’ibishyimbo n’umwe mu batarahigwaga wari umuturanyi wabo icyo gihe ngo byari mu matariki ya 20 Mata 1994. Nduwayezu yavuze ko yaciye kuri bariyeri umunani zariho interahamwe cyane cyane iyahitwa i Nyabisindu i Gitarama, aho bicaga bakoresheje udufuni.

Imibiri y’Abatutsi bibukwa bashyinguwe mu rwibutso rwa Kabgayi bagera ku bihumbi 10,329, hakiyongeraho indi mibiri 480 yashyizwe muri urwo rwibutso kuri uyu wa 2 Kamena 2014, iturutse mu mirenge inyuranye nka Nyamabuye, Cyeza na Rutobwe yo mu karere ka Muhanga.

Muri uwo muhango hari n’imva zashyizweho indabo z’abapadiri bagera kuri 20, abihaye Imana, abarimu bigishaga mu Iseminari, abahoze ari abakozi ba Kabgayi bagera ku 140 bazize Jenoside yakorewe Abatutsi, bashyinguwe mu irimbi ry’abapadiri b’i Kabgayi.

Umushumba wa Diyosezei ya Kabgayi, Smaragde Mbonyintege

Reba amafoto menshi y’umuhango wo kwibuka ku rwibutso rwa Kabgayi
Foto: Faustin N.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza