John Rutayisire na Gasana Janvier basimburanye ku buyobozi bwa REB batawe muri yombi

Yanditswe na Rabbi Malo Umucunguzi
Kuya 21 Werurwe 2019 saa 09:19
Yasuwe :
0 0

Ubushinjacyaha bw’u Rwanda, bwemeje ko bwataye muri yombi abagabo babiri bahoze bayobora Ikigo cy’igihugu cy’Uburezi REB, John Rutayisire na Gasana Janvier, bakurikiranyweho kunyereza umutungo wa leta.

Ubushinjacyaha bwatangaje ko aba bagabo bombi batangiye kubazwa ku byaha bakekwaho. Buvuga ko bombi bagize uruhare mu gukoresha nabi miliyoni 249 Frw muri gahunda ya mudasobwa imwe ku mwana, One Laptop per child.

John Rutayisire ni we muyobozi wa mbere REB yagize ubwo yatangiraga mu 2011 nyuma y’ihuzwa ry’ibigo byakoreraga muri Minisiteri y’Uburezi nk’Inama y’Igihugu Ishinzwe Ibizamini, Ikigo gishinzwe Integanyanyigisho, Ikigega gitera inkunga abanyeshuri (SFAR), Komisiyo Ishinzwe abarimu n’Ubugenzuzi bw’amashuri.

Muri Gashyantare 2015 nibwo Gasana Ismaël Janvier yasimbuye Rutayisire. Gasana wari usanzwe ari umuyobozi wungirije Ushinzwe Ireme ry’Uburezi, yasobanuye ko inshingano REB yahawe zo kurerera igihugu zikubiyebo kugena ishusho y’ejo hazaza h’igihugu, bityo ko igisa n’akajagari mu buyobozi cyose gikwiye gukumirirwa kure.

Gasana yasimbuwe muri Gashyantare umwaka ushize na Dr. Irenée Ndayambaje ari nawe ukiyobora REB.

Umushinga aba bayobozi bashinjwa gucunga nabi watangiye muri Kamena 2008 ugamije gutanga mudasobwa kuri buri mwana, intego zawo zari izo kugira u Rwanda igicumbi cy’ikoranabuhanga amahanga ashobora kwigiraho.

Kugeza mu mwaka ushize hari hamaze gutangwa imashini zo mu bwoko bwa XO zisaga 270,000 ku bigo by’amashuri abanza birenga 1500.

Gusa uyu mushinga wagiye uvugwamo ibibazo byinshi byatumye utabasha kugera ku ntego zawo, birimo kuba hari mudasobwa zibwe izindi zikabikwa kuko hari aho zoherejwe nta muriro w’amashyanyarazi uhari n’ibindi.

Raporo y’Umugenzuzi Mukuru w’Imari ya Leta ya 2016 yagaragaje ko mudasobwa zo muri iyo porogaramu zigera kuri 583 zifite agaciro k’amafaranga y’u Rwanda 101,607,187 zashyizwe mu bubiko bw’amashuri hirya no hino mu gihugu, aho guhabwa abana ngo bazikoreshe.

Ubusanzwe One Laptop per Child yatangiye igenerwa ingengo y’imari ya miliyari esheshatu z’amafaranga y’u Rwanda ku mwaka, uyu mushinga uza kugera kuri miliyari eshanu bitewe n’uko habayemo imicungire mibi.

John Rutayisire (Ibumoso) ashyikiriza Gasana Janvier (iburyo) ububasha bwo kuyobora REB ku wa 18 Gashyantare 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza