Jenoside yari umusozo ariko ntiyari intangiriro y’ubwicanyi bwakorewe Abatutsi-Dr Bizimana

Yanditswe na Ishimwe Israel
Kuya 7 Mata 2019 saa 03:59
Yasuwe :
0 0

Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène, yavuze ko Jenoside yateguwe bizwi kuva ku bwicanyi bwakorewe Abatutsi mu 1959 kugera mu 1994 ubwo abasaga miliyoni bicwaga mu mezi atatu.

Yabitangaje mu muhango wo gutangiza icyunamo wabereye muri Kigali Convention Centre kuri uyu wa 7 Mata 2019. Witabiriwe na Perezida Kagame na Madamu n’abandi banyacyubahiro barimo abakuru b’ibihugu n’abahagarariye za guverinoma zabo.

Mu kiganiro yatanze, Dr Bizimana yagarutse ku buryo Jenoside yateguwe, igashyirwa mu bikorwa kandi haratanzwe integuza nuko amahanga atera intambwe mu kwemera ukuri kwayo.

Yagize ati ‘‘Jenoside yose ni icyaha gitegurwa, si impanuka cyangwa ibyago bishobora kukugwira ku mpamvu runaka. Uyu munsi turibuka imyaka 25 ishize Jenoside ibaye ariko mu by’ukuri ubwicanyi bwibasiye Abatutsi bwatangiye mu 1959 bivuze ko uyu mwaka wa 2019 twibuka ubwicanyi bwakozwe mu myaka 60 ishize.’’

Yavuze ko ubutegetsi bwagiye busimburana kuva igihugu kibonye ubwigenge mu 1962 bwashyizeho politiki yibasira Abatutsi nk’abakwiye kurimburwa.

Yagize ati ‘‘Jenoside yakorewe Abatutsi yaje ari umusozo ariko ntiyari intangiriro. Jenoside yabaye hari ibimenyetso bihagije byerekana ko Leta yari ifite umugambi wo kuyikora.’’

Kuva mu 1959 ubwo Abatutsi bameneshwaga bakirukanwa mu Rwanda bahorwa ubwoko bwabo, uko imyaka yicumaga ni ko impungenge z’uko Jenoside yaba ziyongeraga.

Dr Bizimana yavuze ko “Mu 1962, Abatutsi basaga 2000 barishwe muri Perefegitura ya Byumba. Nta muntu wigeze abivugaho uretse Musenyeri Sibomana Joseph wabyamaganye ku ngoma ya Perezida Kayibanda Grégoire.’’

Mu 1963, Abatutsi barishwe muri perefegitura nyinshi byitwa ko ari ukubera impunzi ziturutse i Burundi zateye igihugu. Abasaga ibihumbi 30 barapfuye barimo ibihumbi 20 bo muri Perefegitura ya Gikongoro.

Ibi byatumye Umutangabuhamya ukomoka mu Busuwisi Gilles wakoranaga na UNESCO, yegura ku kazi ke ko kwigisha muri Kaminuza i Butare aho yanditse ko atakomeza umwuga we mu gihe igihugu cyica igice cy’abagituye.

Mu kinyamakuru Le Monde cyo ku wa 4 Gashyantare 1964 yanditse ko “Ntibyashobokaga ko nguma gukorana na guverinoma ifite uruhare muri Jenoside. Ni gute nakwigisha mu kigo aho abanyeshuri bishwe kubera ko ari Abatutsi gusa?’’

Ibitangazamakuru mpuzamahanga nka Le Figaro, RFI na Radio Vatican byavuze kuri ubwo bwicanyi byagereranyije na Jenoside.

Radio Vatican yatangaje ko “Jenoside iteye ubwoba nyuma y’iyakorewe Abayahudi, iri kubera mu mutima wa Afurika. Abantu benshi baricwa buri munsi mu Rwanda.’’

Bizimana yavuze ko ibimenyetso byinshi byerekana ko ubutegetsi bwa Habyarimana bwayiteguye mu gihe hari abagaragaza ko yashoboraga kwirindwa.

Yavuze ko “Biri ku mutwe wa Loni kuba itarabonye ibimenyetso ngo ikumire cyangwa ngo ihagarike Jenoside mu Rwanda.’’

Yifashishije ingero za raporo zasohowe ariko ntizitabweho.

Ati “Muri raporo y’abadepite b’Abafaransa yo mu 1998, ivuga ku magambo ya Ambasaderi w’u Bufaransa mu Rwanda, Georges Martres (1989-1993) ko ‘Jenoside yarashobokaga kuva mu 1990. Col Serubuga wari Umugaba w’Ingabo wungirije mu Gisirikare cy’u Rwanda, yishimiye igitero cya FPR Inkotanyi, yavugaga ko kizamufasha gusobanura impamvu yo gutsemba Abatutsi.’’

Indi ni iyasohotse ku wa 7 Werurwe 1993 aho Komisiyo Mpuzamahanga ishinzwe Iperereza yasuye u Rwanda ikerekana ko hari ibyago byinshi bya Jenoside.

Ku wa 28 Mutarama 1993, perezida wayo yatumiwe kuri France 2, ikinyamakuru gikomeye mu gihugu, asobanura ibyo babonye mu Rwanda. Yashimangiye ko “Uruhare rw’ubutegetsi buragaragara cyane muri iyo Jenoside, n’ibyaha byibasiye inyokomuntu.’’

Muri Mata 1993 kandi umunyamategeko akaba n’inzobere mu iperereza n’Umunya-Sénégal Bacre Waly Ndiaye, abwirijwe na Loni yakoze raporo igaragaza ko Leta ya Habyarimana yakoze ubwicanyi ku baturage b’Abatutsi mu bice bitandukanye by’igihugu yashyize ahabona ku wa 11 Kanama 1993.

Dr Bizimana yavuze ko mu gihe hibukwa ku nshuro ya 25 Jenoside yakorewe Abatutsi ‘nta na kimwe cyahangara ububabare bw’abarokotse’.

Mu byo yagaragaje bikibangamye ni ibijyanye n’inyandiko zidashyikirizwa u Rwanda.

Yavuze ko “Inyandiko z’Urukiko mpanabyaha rwashyiriweho u Rwanda ni umurage w’u Rwanda nyamara Loni yanze kuruziha kandi arirwo rwazihaye urwo rukiko ngo ruzifashishe mu gutanga ubutabera. N’ubuhamya bwinshi urwo rukiko rwashingiyeho ubwinshi bwavuye ku Banyarwanda, none kuki zidahwaba ba nyirazo aribo Banyarwanda?’’

Dr Bizimana yavuze ko hari imyanzuro yafashwe ariko umuco wo kudahana ihakana n’ingengabitekerezo ya Jenoside bikiriho aho hari ibihugu byinangiye kubahana ahubwo bikabaha ubwenegihugu.

Kuva mu myaka 10, Ubushinjacyaha bw’u Rwanda bwatanze impapuro zirenga 900 zo gufata abakekwaho icyaha cya Jenoside yakorewe Abatutsi bihishahisha mu mahanga ariko rwakiriye abagera kuri 21 gusa.

Bizimana yavuze ko ibimenyetso byinshi byerekana ko ubutegetsi bwa Habyarimana bwateguye Jenoside mu gihe hari abagaragaza ko yashoboraga kwirindwa
Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène, yavuze ko Jenoside yateguwe bizwi kuva ku bwicanyi bwakorewe Abatutsi mu 1959 kugera mu 1994 ubwo yashyirwaga mu bikorwa

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza