Jenerali w’Umufaransa yemeye amakosa bakoze mu Rwanda yagejeje kuri Jenoside

Yanditswe na Rabbi Malo Umucunguzi
Kuya 14 Werurwe 2019 saa 07:07
Yasuwe :
0 0

Général Jean Varret wahoze mu ngabo z’u Bufaransa, yagarutse ku ruhare rw’iki gihugu mu bibazo byabaye mu Rwanda mu gihe cya Jenoside yakorewe abatutsi mu 1994, gusa u Bufaransa nk’igihugu cye ntibwigeze bushaka kwemera ukuri ku byabaye.

Général Jean Varret w’imyaka 84 yari yaremeye gusa gutanga ubuhamya ku byo azi imbere ya komisiyo y’inteko ishinga amategeko y’u Bufaransa yakoraga iperereza ku Rwanda mu 1998. Nyuma y’imyaka 25 Jenoside ibaye, yemeye kuvuga byinshi yabonye mu Rwanda, imbere ya kamera na za mikoro.

Kuva mu Ukwakira 1990 kugeza muri Mata 1993, Gen. Varret yari Umuyobozi ushinzwe ubufatanye mu bya gisirikare n’u Rwanda. Avuga ko yagerageje kwitandukanya n’ubufasha Ingabo z’u Bufaransa zahaga ubutegetsi bwa Perezida Habyarimana, ariko aza kuvanwa kuri uwo mwanya ku byifuzo bya bamwe.

Ati "Abasirikare bamwe kandi nzi neza, bazamuye igitutu harimo gusaba ko nkurwa mu nshingano. Abo ntibigeze bashaka kumva ingaruka z’iyo politiki yo gutera inkunga Habyarimana. Ubundi ubwo bufatanye bwari bugamije gutoza, ibikoresho, hatarimo kurwana. Ntekereza ko ibindi byabaye bigamije ubufasha mu rugamba."

Varret yibuka ubwo mu Ugushyingo 1990 yahuraga n’Umuyobozi wa Gendarmerie, Colonel Pierre-Célestin Rwagafilita. Muri iyo nama yamusabye intwaro ziremereye, undi amubaza impamvu kuko abajandarume batari bagenewe imbunda nini.

Ati "Maze kubyanga, uyu muyobozi wa Gendarmerie yabwiye bagenzi be ati ’mushobora kugenda, ndagumana na General gusa. Arabwira ati ’ubu turi twenyine, hagati y’abasirikare tugomba kuvuga tweruye. Ndabasaba izi ntwaro kuko hamwe n’abasirikare dushaka gukemura ikibazo. Ikibazo cyo kiroroshye: Abatutsi ntabwo ari benshi, tuzabarimbura.’ Yarabimbwiye rwose, numva ndikanze."

Jean Varret ngo yasabye guhura na Perezida Habyarimana amugezaho impungenge afite, Habyarimana arya kurungu amubaza niba koko bamubwiye, undi yibaza niba ubwo burakari butewe n’uko ibanga ryamenwe cyangwa ari uko yabeshywe.

Amakuru ye yarirengagijwe

General Varret avuga ko ayo makuru yahise ayamenyesha Ambasaderi w’u Bufaransa mu Rwanda na Minisiteri y’ubutwererane yamugengaga.

Ati "Ayo makuru ntabwo nayihereranye, ibimenyetso by’uko Jenoside yashobokaga byarigaragazaga cyane. Ibyo byanayoboye ibikorwa byanjye byakurikiyeho."

Nyamara uyu musirikare avuga ko amakuru yatanze atigeze ahabwa agaciro ngo agire icyo akoreshwa, haba ku buyobozi bwa gisirikare cyangwa abanyapolitiki.

General Jean Varret si we wenyine waburiye ubutegetsi bw’u Bufaransa, kuko bwari bufite amakuru bwahawe n’Urwego Rushinzwe Iperereza ryo hanze , DGSE, rwari ruzi byinshi kugeza no ku ihanurwa ry’indege ya Perezida Juvenal Habyarimana.

Mu ntangiro za 1993 ubwo ibintu byari bikomeje kurushaho kuba bibi mu Rwanda, komisiyo yakoraga iperereza iyobowe n’Ihuriro Mpuzamahanga ry’uburenganzira bwa muntu, FIDH, ryatangiye gukusanya ibimenyetso by’ubwicanyi bushingiye ku moko.

Muri Gashyantare 1993 abahutu b’abahezanguni bashamikiye ku ishyaka rya Habyarimana bakomeje ubwicanyi, ku rundi ruhande FPR ikaza urugamba rwo kubohora igihugu.

Muri icyo gihe ngo abafaransa bohereje ingabo zabo zari zigize 1er RPIMa (Régiment de parachutistes d’infanterie de marine), gutera ingabo mu bitugu ingabo z’u Rwanda ku rugamba.

Undi munsi ngo ubwo yagenzuraga abasirikare be muri Pariki y’Akagera, Général Varret yamenye ko hari ishami rishinzwe gutabara (DAMI), ryagiye gutata FPR muri Uganda. Icyo gikorwa cyari kitemewe kuko izo ngabo zari zibujijwe kwivanga mu makimbirane ayo ariyo yose, ngo wari umurongo utukura utagomba kurengwa.

Général Varret ati "Nkibyumva, nababwiye nabi. Natashye i Paris, nyuma y’iminsi itatu mbona ubutumwa bukurikira: Imitwe ya DAMI ntabwo ikiri munsi y’itegeko ryawe. Njye nabibonye nko kuntererana. Ntabwo nari nkifitiwe icyizere."

Général Varret yakuwe mu nshingano

Muri Mata 1993, Général Varret yavanywe mu nshingano z’ushinzwe ubutwererane mu bya gisirikare, Minisitiri ushinzwe ubutwererane, Michel Roussin, amumenyesha ko atazahabwa izindi nshingano mu gihe cy’umwaka nk’uko yabyifuzaga, asimbuzwa Général Huchon. Nyuma y’umwaka umwe, jenoside yari itangiye.

Hejuru y’ibyo byose, Varret wahise asezera mu gisirikare avuga ko ari amakosa yabayeho bigatuma bigera kuri Jenoside nubwo we yagiye hakiri kare.

Ati "Amateka agaragaza ko [mu myitwarire y’u Bufaransa] habayemo ikosa, birenze ukwibeshya kuko byagejeje kuri Jenoside. U Bufaransa bwari bufite amakuru ahagije kuri ibyo byose." Mu maso ye, abayobozi b’abafaransa baba aba gisivili cyangwa ba gisirikare, bafite uruhare babazwa mu bibazo byagejeje kuri Jenoside.

Yakomeje ati "Habayeho igisa n’ubuhumyi. Nta muyobozi waba uwa gisirikare cyangwa uwa gisivili wifuzaga Jenoside. Nta n’umwe. Ariko ibimenyetso byagaragaye ntibyafashwe nk’ibintu bikomeye."

Amiral Jacques Lanxade ntabikozwa

Gusa ibirego bya Jean Varret byahakanywe na amiral Jacques Lanxade, mu kiganiro yagiranye n’ibinyamakuru Radio France na Mediapart.

Uyu wabaye Umugaba w’Ingabo hagati y’umwaka 1991-1995 yagize ati "Nta guhuma amaso kwabayeho, ntekereza ko twahoraga tuzirikana ku byashoboraga kuba. Ni nayo mpamvu twari turi hariya. Jean Varret afite uburenganzira bwo kuvuga nk’ibyo yavuze, ariko nta wafata umwanzuro ko hari ibyo tutitayeho."

Laxade avuga ko ibyo Jean Varret atabona ari uko bitari mu nshingano ze z’ubutwererane, ndetse ko umurongo bagendeyeho bayobowe na Perezida Mitterrand wari uboneye.

Avuga ko ikibabaje ariko bari mu Rwanda ngo Jenosite ntibe ariko ntibigerweho. Indi mpamvu ngo yari ugufasha Habyarimana muri politiki ngo yemere ko igihugu cye kigendera kuri demokarasi ndetse ngo yari atangiye kubikora, ikindi ni "ugushyigikira igisirikare cya leta kugira ngo FPR itinjira, umutekano ugahungabana."

Hanakomozwa ku buhamya bushya

Mu iperereza byakoze kandi, ibinyamakuru Radio France na Mediapart byahishuye ubuhamya bushya bwa Walfroy Dauchy wari umukozi muri Croix Rouge, akorera i Goma mu mpera z’Ukwakira 1994, mu gihe cya Operation Turquoise.

Avuga uburyo ingabo zakoraga Jenoside zimaze kumeneshwa, igice cyagenzurwaga n’u Bufaransa mu burengerazuba bw’igihugu, cyabaye icyuho abajenosideri banyuzemo bahungira muri Zaire.

Uyu wari ushinzwe ibirebana n’amazi meza, yakundaga kujya muri Kenya akoresheje ikibuga cy’indege cya Goma cyagenzurwaga n’Abafaransa. Avuga ko yahuye n’umufaransa ufite imbunda, uri hagati y’imyaka 23-25, avuga ko akorera ikigo cya Se cyagemuraga intwaro.

Walfroy ati "Ibyo yarabinyibwiriye. Ndamubaza nti ese urumva ari igikorwa kizima gukomeza gutanga intwaro kandi harimo kuba jenoside? Uwo muhungu aransubiza ati: Oh, urabizi ibi ni ubucuruzi. Atanabaye twe tuzitanga abandi babikora."

Avuga ko atabonye izo ntwaro ariko yabonye ibisanduku byazo n’indege z’abafaransa zibipakiye. Ibyo byose ngo byakorwaga ku manywa y’ihangu, nta byo kwihishahisha.

Abajijwe kuri iryo tangwa ry’intwaro, Amiral Lanxade yavuze ko ntabyo azi, ndetse iyo ngingo ntiyigeze iganirwaho mu buyobozi bukuru bw’ingabo. Wenda ngo aho bari bayoboye hari intwaro zahanyuze, "ariko ingabo z’u Bufaransa ntaho zihuriye nazo."

Général Jean Varret avuga ko hari ikosa u Bufaransa bwakoze mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza