Iyi yaba ariyo etage ya mbere yubatswe mu Rwanda?

Yanditswe na Hakizimana Jean Paul
Kuya 20 Nyakanga 2019 saa 09:36
Yasuwe :
0 0

Amateka agaragaza ko mu 1892 ku ngoma ya Kigeli wa IV Rwabugiri, aribwo abazungu batangiye kugera mu Rwanda. Icyo gihe Abadage nibo bahageze bwa mbere, bidatinze Abarabu nabo batangiye kujya baza kuhagurisha imyenda baturutse muri Tanzania, gusa ngo barazaga bagasubirayo.

Abazi neza iby’amateka ya kera basobanura ko Abarabu bahaga abanyarwanda imyenda nabo bakabaha ingurane y’inka z’ibimasa, bakabyambukana muri Tanzania.

Mu mpera za 1898 bivugwa ko Abarabu bambutse bakaza gutura mu Rwanda, baba ahitwa i Rukira mu Karere ka Ngoma bahava bajya i Karembo naho ni muri Ngoma, nyuma baza kwimukira i Rwamagana ngo kuko hari ahantu haba abaturage benshi n’inka nyinshi kandi hanateye neza.

Ngo bakihagera batangiye kujya bagurisha impu, imyenda n’ibindi bikoresho bitandukanye ku buryo Rwamagana yahise ihinduka igice cy’ubucuruzi aho abo Barabu baguranaga imyaka mo imyenda ndetse ngo n’abanyarwanda bagaturuka imihanda yose bagiye kuguranisha.

Ntibyatinze ngo hahise haza n’Abahinde, begerana na ba Barabu. Bo ngo bagurishaga amasuka n’imyunyu. Nyuma batangiye kujya baranguza n’ibindi bicuruzwa by’amoko atandukanye ku buryo Rwamagana yahise iba umujyi w’ubucuruzi abantu baturukaga Gitarama, Ruhengeri na Gatsibo bakajya kuharangura.

Hadji Musonera Sued w’imyaka 67 ni umwe mu bakuriye mu gasantere ka Buswayirini ahatangirijwe ubucuruzi mu Rwanda n’aba Bahinde n’Abarabu.

Yabwiye IGIHE ko mu mateka yakuye ku babyeyi be n’abakuru baganiraga, ngo Abarabu bakimara kuhagera batangiye gushinga inzu zo gucururizamo bifashishije ibyatsi byo mu gishanga byitwa Inkorogoto.

Ati “Kubera ko Umurwa Mukuru w’u Rwanda wari Astrida, nabo bashakaga ahantu hatuma n’ibwami babahahira, inaha rero bahasanze abantu benshi bituma ariho baguma batangira no kuhubaka, uko ibihe byateraga imbere niko bajyaga Tanzania bakazana amabati bakayasimbuza bya byatsi.”

Uko Abahinde baje mu Rwanda

Musonera avuga ko Abahinde baje nyuma y’Abarabu mu 1919 ngo nabo baturutse Tanzania.

Ati “Habanje kuza Umuhinde witwaga Jetha ( Liladhar Jetha Jobanputra) aza aje kuranguza imyenda ba Barabu, ahageze arahishimira nawe ahitamo kuhakorera, arakora abona bigenda neza ageze aho aragenda azana bene wabo barimo uwitwaga Pepu wabanje kujya acururiza Jetha ageze aho ajya gufungura ubucuruzi bw’amagare ku ruhande.”

Uko etage ya mbere yubatswe

Musonera yakomeje agira ati “Jetha uriya nakubwiye wahageze bwa mbere ni nawe ubyara Kishore Jobanputras (washinze uruganda rwa Utexrwa) rero Pepu wa wundi wazanywe na Jetha akimara gufatisha ubuzima yamwiyomoyeho ashinga iduka ry’amagare ndetse n’ibindi bikoresho bitandukanye.”

“Yabanje gukodesha ageze aho amaze kubona amafaranga yubaka iyi etage, ngereranyije yubatswe nko mu 1926 cyangwa 1927 ni aho hagati, yubatswe n’umugore w’umuzungukazi uwo mugore yanubatse n’ikiraro kiri Gasese muri Uganda ngo yayubakaga nijoro, n’izindi nzu nyinshi ureba aha zikomeye niwe wazubakishaga.”

Etage imaze kuzura ngo nibwo noneho hatangiye kuza Abahinde benshi n’abandi Barabu nabo bagenda bubaka izindi nzu z’ubucuruzi ku ruhande kugeza ubwo igihugu cyose cyatangiye kujya kirangura i Rwamagana.

Abanyarwanda nabo bahise bafatiraho batangira gucuruza abo bita ba Munyabuhoro n’abandi benshi batangira gutera imbere. Pepu yahise atangira no gukorera muri RDC yagura ubucuruzi bwe ava i Rwamagana gutyo.

Uko Habyarimana yaciye intege Rwamagana

Tariki 05 Nyakanga 1973 nibwo Habyarimana yagiye ku butegetsi ahiritse Kayibanda. Ngo akijya ku butegetsi yatangiye kwikoma cyane Rwamagana avuga ko ubucuruzi buhakorerwa bwuzuyemo amanyanga na za magendu ngo kuko ntiyiyumvishaga ukuntu abacuruzi bakomeye b’Abarabu, Abahinde ndetse n’abanyarwanda benshi babikorera i Rwamagana nubwo na Kigali bari batangiye kujya bajyayo.

Icyo gihe amasoko yo kugemura imyaka mu bigo by’amashuri byinshi mu Rwanda, kugemura ibigori muri za gereza, kugura ikawa n’ibindi byakorwaga n’abacuruzi bafite amakamyo biberaga i Rwamagana.

Mu 1978 ngo Habyarimana byaramuriye cyane atangira kubafunga abandi bimukira Kigali kuko yari itangiye gufatika no guturwamo n’abantu benshi.

Musonera ati “Habyarimana urebye niwe nyirabayazana kuko yaravugaga ngo abanyarwamagana batunzwe n’imitsi y’abandi, ngo nta bintu bifututse bajya bakora, benshi bahitamo kugenda barimo Hardi wari ukize cyane yahise yigira i Gisenyi, Hassan yimukira i Kigali, Sultan yigira hanze bakajya bagaruka inaha baje gusura abantu gusa.”

Musonera avuga ko kuva icyo gihe Habyarimana akomatanyirije Rwamagana, ubucuruzi bwahise bucika integer.

Ati “ Nk’ubu nta muntu wapfa kubona afite imodoka 20 muri Rwamagana, abenshi usanga banacuruza utuntu duke duke two guterateranya n’uwo bavuga ngo arakize usanga afite Fuso imwe, mu gihe abandi bazitungaga ari 30, ikindi kera umuntu yafataga inzu y’imiryango itanu yose akayikoreramo wenyine nta muntu wakoreraga mu nzu imwe n’undi nk’ab’iki gihe.”

Bivugwa ko Abarabu batatu bageze mu Rwanda bwa mbere ari uwitwaga Hassan, Sultan na Hillar. Hassan niwe ubyara Hamud Hassan nyiri uruganda rwa Sobolirwa rwari rwubatse i Remera.

Abana ba Jetha baherutse guha ubuyobozi bw’Akarere ka Rwamagana inzu papa wabo yabagamo ndetse banemeye kubaka ishuri rizuzura ritwaye miliyoni 400 Frw.

Iyi etage bivugwa ko ariyo yubatswe bwa mbere mu Rwanda hagati ya 1926 na 1927
Kuri iyi etage n'ubu haracyacururrizwa amagare
Buswayirini haracyari inzu z'ubucuruzi zubatswe n'Abarabu n'Abahinde ba mbere bahatangiriye ubucuruzi
Hari yo amaduka menshi yo gucururizamo gusa abahakorera ubu bavuga ko bitakigenda neza
Hadji Musonera Sued avuga ko Habyarimana ariwe watumye ubucuruzi busubira inyuma muri Rwamagana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza