Ivuriro Legacy Clinics ryasabanye n’abakozi baryo ryizeza kongera gutanga serivisi nziza muri 2020

Yanditswe na Evariste Nsengimana
Kuya 21 Mutarama 2020 saa 02:49
Yasuwe :
0 0

Abayobozi n’abakozi b’Ivuriro ‘Legacy Clinics & Diagnostics’ bahuriye mu busabane bugamije gushimira abakozi uko bakorana ubwitange n’ubunyamwuga bagamije gusigasira ubuzima bw’abarwayi bahivuriza baturutse imbere mu gihugu no hanze yacyo.

Ni igikorwa cyabaye ku mugoroba wo kuri uyu wa 18 Mutarama 2020, uhuriza hamwe abakozi b’iri vuriro basaga 160 barimo abaganga b’inzobere 53(specialists), abavura indwara rusange batatu (General practitioners) n’abandi barimo abaforomo (nurses), abakira abarigana (customer care officers), abakora isuku, abacunga umutekano, abashoferi hamwe n’abafatanyabikorwa baryo bakora mu rwego rw’ubuvuzi n’ahandi.

Umuyobozi ushinzwe ubuvuzi muri Legacy Clinics, akaba n’umuganga w’inzobere mu ndwara z’abagore (Gynecologist), Dr.Ndizeye Ntwali, yagarutse ku bikorwa bitandukanye iri vuriro ryagezeho kuva mu mpera za 2016 kugera ubu, avuga ko bigaragaza umusaruro w’ubwitange bw’abakozi muri rusange n’uburyo ubuyobozi bwaryo bubasha kuzuza inshingano zabwo.

Mu by’ukuri iri vuriro ryatangijwe n’abikorera hagamijwe gusubiza ikibazo cy’abarwayi cyagaragaye mu gusiragira bashaka serivisi zitandukanye z’ubuvuzi zikenera abaganga b’inzobere cyangwa gusuzumwa hakoreshejwe ibyuma nka CT Scan , X-ray, Mammogram n’ibindi hamwe na laboratwari, bikaba byose byarashyizwe hamwe mu korohereza abarwayi barindwa gusiragira.

Muri rusange umubare w’abarwayi baryivurijeho wavuye ku bihumbi 17 muri 2017 ukagera ku bihumbi birenga 71 umwaka ushize. Abafotorewe ibice by’umubiri birwaye bavuye ku bihumbi 10 mu 2017 barenga ibihumbi 30.

Abahawe serivisi z’ubuvuzi bw’amenyo bavuye kuri 3843 mu 2017 bagera kuri 7373 mu gihe ibizamini byakorewe muri Laboratwari byavuye ku bihumbi 101 bikarenga ibihumbi 233 mu mwaka wa 2019.

Umuyobozi Mukuru wa Legacy Clinics& Diagnostics akaba n’umwe mu bayishinze, Kalima Jean Malic, yashimiye abakozi bose muri rusange ku bwitange bagaragaza kugira ngo ubufasha baha abarwayi burusheho kwiyongera mu bwinshi no mu bwiza.

Ati “Abakozi baba bafite byinshi bakoze, ibyo bagezeho cyane cyane muri uyu murimo wacu w’ubuvuzi. Kugira ngo tubahuze nk’umubare munini wabo bisaba ko dufata umunsi umwe mu mwaka kugira ngo tubahuze, turebe ibyo twakoze, turebe inzira tuvuyemo n’iyo tugiye gutangira, tuganire ku ngamba nshya tugiye kwiyemeza no kubashimira imirimo bakoranye ubwitange.”

Umuyobozi Mukuru yavuze ko nk’uko umurongo w’igihugu ari ugukomeza guhanga udushya mu nzego zitandukanye no kuri iri vuriro ariko bimeze mu gihe kiri imbere abarigana bagomba kwitega serivisi ziganjemo ibishya byinshi kandi byihariye bizagerwaho binyuze mu guhugura abakozi bigamije kubongerera ubushobozi.

Yavuze ko gahunda iri vuriro rifite harimo ko uyu mwaka ujyana n’ibikorwa byo gutangira kubaka inyubako yo gucumbikira abarwayi barembye bakeneye kwitabwaho n’abaganga umwanya ku wundi. Iyi nyubako biteganyijwe ko izaba ifite nibura ibitanda 65.

Yabwiye abakozi ati “Ni ukongera kubashimira mbabwira ko tudakwiye kwirara tugomba kwitegura gukomeza gutanga serivisi nziza kuko icyagaragaye abantu benshi bakomeza gushima serivisi dutanga ariko batwibutsa ko tutazasubira inyuma.”

Ku ruhande rw’abakozi bagaragaje ko umwanya nk’uyu bicara hamwe bareba uko umwaka wagenze, ari kimwe mu bituma bakorana umurava.

Umwe mu bakozi wanahawe igihembo nk’uwahize abandi mu baforomo n’ababyaza, Uwamurera Ruth, yavuze ko igihembo yahawe kimwongereye imbaraga mu kazi akora no gukomeza kongera umusaruro no guharanira guhesha ishema Legacy Clinics.

Ati “Uyu munsi ni umunsi ukomeye. Mu bidufasha gutanga serivisi nziza ni uko ubuyobozi bwacu duhorana umunsi ku wundi. Ntabwo ari ba bantu batujya kure ngo tubabure, duhorana umunsi ku wundi, tubana nk’abavandimwe tutabatinya. Kuba baduteguriye umunsi nk’uyu byongeye kutwereka ko baturi hafi.”

Muri uyu muhango bagize n’umwanya wo gushimira abakozi bahize abandi muri buri cyiciro no muri rusange aho umukozi w’umwaka yabaye Gahonzire Fabien ukora mu bijyanye no gufata amafoto y’ibice by’umubiri birwaye (Imaging).

Legacy Clinics ni ivuriro riri mu bice bitatu harimo igice kigizwe n’ibikoresho bifasha mu gusuzuma abarwayi; bikorwa n’abaganga bo mu Rwanda, no mu bindi bihugu; Legacy Diagnostics igizwe no gufotora ibice by’umubiri (imaging service) na laboratwari (Laboratory ); Legacy Dental irebana na serivisi z’amenyo.

Ivuriro ‘Legacy Clinics & Diagnostics’ riherereye ahazwi nko kuri 15 mu Murenge wa Nyarugunga mu karere ka Kicukiro, riherutse kwegukana igihembo cy’ikigo cy’abikorera cyatanze serivisi nziza, mu bihembo bya 2019 bitangwa na RDB.

Si ubwa mbere Legacy Clinics ishimiwe serivisi nziza kuko muri Kamena 2017 nyuma y’amezi umunani gusa itangiye, yahawe igihembo n’ikigo Business Initiative Directions (BID) cyo muri Espagne kireba uburyo ibigo bigira udushya no gutanga serivisi nziza. Cyatangiwe i New York muri Leta Zunze Ubumwe za Amerika.

Abahize abandi babishimiwe
Abashinzwe kwakira abagana Legacy Clinic bahaye impano Karima wayishinze n'umufasha we
Ubwo Uwamurera yashimirwaga nk'umuforomo witwaye neza mu kazi ke
Umuyobozi ushinzwe abakozi muri Legacy arimo gutanga ikiganiro
Umuyobozi Mukuru wa Legacy Clinics akaba n'umwe mu bayishinze Kalima Jean Malic ashimira abakozi
Abayobozi bakuru ba Legacy Clinics bitabiriye uyu muhango
Umuyobozi ushinzwe ubuvuzi muri Legacy Clinics n'umuganga w'inzobere mu ndwara z'abagore Ndizeye Ntwari yagarutse ku bikorwa bitandukanye

Amafoto: Dushimimana Ami Pacifique

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .