Itsinda rya Biden rishinzwe gukurikirana ibikorwa by’ihererekanya ry’ubutegetsi ryangiwe guhura n’inzego z’ubutasi

Yanditswe na Uwimana Abraham
Kuya 5 Ukuboza 2020 saa 03:07
Yasuwe :
0 0

Ubuyobozi bwa Trump muri iki cyumweru bwangiye itsinda rya Biden rishinzwe gukurikirana ibikorwa by’ihererekanya ry’ubutegetsi, guhura n’inzego z’ubutasi muri Minisiteri y’Ingabo mu biganiro bigamije kureba uburyo ihererekanywa ry’ubutegetsi rizakorwa.

Uku gukerereza iki gikorwa bivuze ko itsinda rya Biden ritabashije guhura n’abayobozi mu nzego z’ubutasi mu gisirikare, harimo Urwego rw’Ubutasi bw’Igisirikare ndetse n’Urwego rw’Ubutasi bw’Imbere mu gihugu. Gusa babashije kugirana ibiganiro n’izindi nzego nyuma y’ibyumweru byari bishize nabyo byaradindiye.

Ni nyuma y’uko ku wa 23 Ugushyingo 2020, hari hatanzwe itegeko ryemerera uruhande rwa Biden gutangira guhura n’inzego zitandukanye muri guverinoma, haganirwa k’uburyo ihererekanya ry’ubutegetsi rizakorwa mu buryo bwiza.

Mu cyumweru gishize rero nibwo hari hateguwe ko uruhande rwa Biden ruzahura n’inzego z’ubutasi z’igisirikare byagombaga gukorwa muri iki cyumweru, gusa mu ntangiriro z’iki cyumweru nibwo Pentagon yatangaje ko uruhande rwa Biden rutazemererwa guhura n’inzego z’ubutasi, keretse babanje gutanga ibibazo mbere, ndetse n’urutonde rw’abantu bashaka kuzaganira nabo.

Uwahoze ari umuyobozi mu by’ubutasi ari nawe watangarije The Washngton Post iby’uku kwangirwa kw’itsinda rya Biden, yavuze ko iki ari nk’igitutsi ku buyobozi bushya.

Yagize ati “Ibi ni nk’igitutsi gikomeye kuri iri tsinda rishinzwe gurikirana ibikorwa by’ihererekanya ry’ubutegetsi.”

Umuvugizi w’ingabo, Sue Gough, yahakanye ibi bivugwa avuga ko Minisiteri y’Ingabo itigeze ibuza uruhande rwa Biden guhura n’inzego z’ubutasi.

Yagize ati “Itsinda rya Biden rishinzwe ibyo guhererekanya ubutegetsi ntabwo ryigeze ryangirwa n’Urwego rw’Umutekano (DOD), guhura n’itsinda iryo ari rwo rwose, dukomeje gukorana nabo dutegura ibiganiro n’abantu batandukanye ndetse n’ibindi bikenewe byose.”

Yongeyeho ati “Niba bidasobanutse reka mbisubiremo, izi mpinduka zabayeho zatewe n’uko uruhande rwa Biden rutanyuze kuri DOD mbere y’uko itegura ibiganiro n’abantu batandukanye bo mu rwego rw’ubutasi, naho ubundi nta kindi bangiwe, ahubwo barasabwa kunyura mu nzira nyayo.”

Umuvugizi w’itsinda rishinzwe gukurikirana ibikorwa by’ihererekanya ry’ubutegetsi ku ruhande rwa Biden, Ned Price, yahakanye ibyatangajwe na DOD, ahubwo avuga ko ibyasabwaga byose babikoze.

Uruhande rwa Biden rwangiwe guhura n'inzego z'ubutasi mu biganiro bigendanye n'ihererekanywa ry'ubutegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .