Itabwa muri yombi rya Kayumba Nyamwasa, umubano na Museveni, Kabuga...Ibisubizo bya Perezida Kagame

Yanditswe na Philbert Girinema
Kuya 29 Kamena 2020 saa 05:49
Yasuwe :
0 0

Perezida Kagame yavuze ko u Rwanda rurajwe ishinga n’umubano mwiza na Afurika y’Epfo, ko ibyo kuba Kayumba Nyamwasa yafatwa akoherezwa mu Rwanda aho akurikiranyweho ibyaha n’inkiko atari cyo cy’ingenzi nubwo nabyo bikozwe byaba ari intambwe nziza.

-  Perezida Kagame ati “Kayumba afashwe akoherezwa mu Rwanda, byaba ari byiza ariko si cyo cy’ingenzi”

-  Yavuze ko muri iki gihe hari umutuzo mu mubano we na Museveni nubwo ibibazo bitakemutse

-  Icyo atekereza ku ifatwa rya Kabuga no kuba yaburanishirizwa mu Rwanda

-  Aho Protais Mpiranya aherereye

Hashize umwaka n’amezi arenga atandatu u Rwanda rwoherereje Afurika y’Epfo inyandiko zisaba itabwa muri yombi rya Kayumba Nyamwasa kimwe n’abandi bayobozi bari ku ruhembe rw’ibikorwa bigamije guhungabanya umutekano warwo.

U Rwanda rwasabye Afurika y’Epfo guta muri yombi Kayumba Nyamwasa akoherezwa kuburanira mu gihugu nyuma y’uko ashinjwe gukorana n’indi mitwe y’abarwanyi bo mu Burasirazuba bwa RDC mu misozi ya Fizi na Uvira mu ishyamba rya Bijombo mu bikorwa bigamije guhungabanya u Rwanda.

Zari impapuro za kabiri ashyiriweho nyuma y’izo mu 2010 ubwo we na Karegeya Patrick basabirwaga gutabwa muri yombi ku byaha by’iterabwoba bari bakurikiranyweho biturutse ku bitero bya gerenade bya hato na hato muri Kigali.

Perezida Kagame mu kiganiro yagiranye n’Umunyamakuru François Soudan wa Jeune Afrique hamwe na Nicholas Norbrook wa The Africa Report, yabajijwe niba u Rwanda rushishikajwe no kubona Kayumba yoherezwa mu gihugu, asubiza ko icy’ingenzi ari umubano mwiza na Afurika y’Epfo.

Ati “Biramutse bikozwe, ni ikintu cyiza. Gusa si ikintu cy’ingenzi kuri twe. Icy’ingenzi, ni umubano mwiza na Afurika y’Epfo. Twagaragarije neza abayobozi b’i Pretoria ko niba bashaka kumuha sitati y’ubuhunzi, kuri twe icyo nta kibazo kirimo. Mu gihe iyo sitati yubashywe ku buryo uyihawe atayuriraho ngo akore ibikorwa bihungabanya umutekano aturutse hanze.”

“Bisaba guhitamo hagati yo gukorana n’u Rwanda nk’igihugu cyigenga, hanyuma no gufunga amaso ku bikorwa by’imitwe igamije guhungabanya inyungu zarwo. Ntabwo dushobora gufata impande zombi. Ni nabyo twabwiye Uganda.”

Perezida Kagame yavuze ko imitwe ya RNC na FDLR ubushobozi yifitemo ari buke, ahubwo ko ikibazo gikomeye ari uko ikomeza kubaho, igakingirwa ikibaba mu nyungu z’indi z’ibihugu n’imiryango yo mu Burayi, Leta Zunze Ubumwe za Amerika na Afurika.

Yavuze ko abayobozi bayo “utaragize uruhare muri Jenoside yakorewe Abatutsi, yahoze ari umuntu wamunzwe na ruswa wahunze igihugu nyuma yo gushyirwa ku karubanda”. Bose ngo bakoresha uburyo bumwe, bwo kuvuga ko ari “abanyapolitiki batavuga rumwe n’ubutegetsi barwanira demokarasi n’uburenganzira bwa muntu”.

Yavuze ko ibyo bavuga akenshi usanga byakirizwa yombi n’itangazamakuru ryirengagiza abo aribo.

Uwari Ambasaderi wa Afurika y’Epfo mu Rwanda, George Nkosinati Twala, muri Gashyantare 2019 yabwiye IGIHE, ko mu 2010 Afurika y’Epfo yashakaga kohereza mu Rwanda Kayumba na Karegeya ariko ikibazo kiba ko bari baramaze guhabwa ubuhungiro, hatekerezwa kuba bakoherezwa mu bindi bihugu.

Ati “Ntabwo twari tubishimiye. Ntabwo twigeze dushaka ko Afurika y’Epfo iba igicumbi cy’impunzi, dufite ibibazo byinshi byacu. Rero twashakaga kubimura, nicyo kintu cyiza cyagombaga gukorwa ni yo mpamvu twashatse kubimura gusa ntibyakunda. Twagerageje no kwegera Loni, twakoze ibiganiro n’ibindi bihugu by’inshuti.”

Yavuze ko icyo gihe ibihugu bimwe byashyizeho amahame yo gukurikiza ariko Afurika y’Epfo irananirwa bituma ibaguma mu gihe ku rundi ruhande u Rwanda rwabashakaga.

Ati “Ntitwashoboye kubohereza kuko twasinye amasezerano ya Loni agendanye n’impunzi. N’ubu turacyazitiwe. Twagombaga gushaka ubundi buryo bwo gukemura ikibazo.”

“Nta nubwo ari bariya babiri gusa, hari n’abandi. Twari dufite ubushobozi bwo gukemura ikibazo ndetse ndatekereza ko byari mu murongo mwiza kugeza ubwo twumvaga urupfu rwa Karegeya hanyuma hakaza ibibazo mu mubano tukirukana Abadipolimate babiri b’u Rwanda n’Umurundi hanyuma u Rwanda mu gusubiza rukirukana batandatu ba Afurika y’Epfo.”

Umubano w’u Rwanda na Uganda...

Perezida Kagame kandi yabajijwe niba nta mpinduka mu mubano we na mugenzi we wa Uganda, Yoweli Kaguta Museveni, avuga ko muri iki gihe ibintu bisa n’ibituje kuko bombi bafite ibindi bikomeye bahanganye nabyo

Ati “Kandi twizeye ko uyu mutuzo uzageza ku gusubiza umubano mu buryo. Ariko dushyize mu gaciro, ikibazo kiracyari ikibazo, ikibazo bigoye gusobanura inkomoko yacyo n’uburyo cyakomeje kutarangira, nubwo hashyizwemo ingufu nyinshi mu kugikemura.”

Uganda ishinjwa n’u Rwanda gufunga mu buryo bunyuranyije n’amategeko abaturage barwo ndetse bagakorerwa iyicarubozo nyuma bakajugunywa ku mipaka barabaye intere. Ibi binajyana kandi n’uburyo ishyigikira imitwe igamije kuruhungabanyiriza umutekano irimo RNC ya Kayumba Nyamwasa.

Hashize igihe hari ibiganiro bigamije kugarura umwuka mwiza hagati y’ibihugu byombi, ndetse mu minsi ishize Minisitiri w’Ububanyi n’Amahanga wa Uganda, Sam Kutesa, yavuze ko icyo gihugu cyemeye kurekura Abanyarwanda 130, ariko abagera kuri 310 baregwa ibyaha bikomeye bo bagomba gukomeza gufungwa.

Perezida Kagame ku ifatwa rya Kabuga...

Perezida Kagame kandi yabajijwe niba yaratunguwe n’ifatwa rya Kabuga uherutse gufatirwa mu Bufaransa ku wa 16 Gicurasi 2020 nyuma y’imyaka irenga 20 ashakishwa n’ubutabera mpuzamahanga ku ruhare rwe muri Jenoside yakorewe Abatutsi.

Ati “Muri icyo gihe cyose, nize ko nta kintu cyantangaza Ntabwo rero natunguwe cyangwa ngo nishime. Yarafashwe ni byiza. Reka turebe ibikurikiraho.”

Mu myaka yose Kabuga yamaze yihishahisha, yakoreshaga ibyangombwa by’ibihimbano n’amazina atandukanye mu buryo bwo kwiyoberanya. Antoine Tounga ni rimwe mu mazina yakoresheje mu myaka yamaze yihisha, ndetse yari afite pasiporo zirimo n’iya Repubulika Iharanira Demokarasi ya Congo.

Umukuru w’Igihugu yabajijwe niba adashishikajwe no kumenya ukuri k’uburyo yihishe iyo myaka yose n’abamufashije, asubiza ko ari ngombwa, ndetse ko yizeye ko bizanageza ku kumva ubuhamya bwite bwa Kabuga.

Perezida Kagame yavuze ko cyaba ari igitekerezo cyiza kuba Kabuga yaburanishirizwa mu Rwanda kugira ngo ubutabera butangwe abanyarwanda birebera ariko no kuba yaroherejwe mu Rwego rwasigariyeho Urukiko Mpuzamahanga Mpanabyaha, IRMCT, nacyo ari ikintu cyiza.

Nyuma y’ifatwa rya Kabuga, amaso ahanzwe ibikorwa byo guta muri yombi abandi bantu bakomeye bakekwaho uruhare muri Jenoside yakorewe Abatutsi barimo Protais Mpiranya, Kayishema Fulgence, Munyarugarama Pheneas, Ndimbati Aloys, Ryandikayo Charles na Sikubwabo Charles.

Mpiranya wavutse mu 1960 muri Komine ya Giciye mu yahoze ari Perefegitura ya Gisenyi. Muri Jenoside yari Komanda wa batayo y’abajepe yo mu ngabo z’u Rwanda (FAR), umwanya yariho kuva muri Mutarama kugera muri Nyakanga 1994.

Perezida Kagame yavuze ko amakuru afitwe n’inzego z’u Rwanda ari uko uyu mugabo afite imitungo mu gihugu cyo mu majyepfo ya Afurika ndetse ko “rimwe na rimwe agendagenda muri Afurika y’Uburengerazuba no mu Burayi. Bitinde bitebuke, ubutabera buzamufata”.

Iki ikiganiro Perezida Kagame yagiranye na Jeune Afrique kigaruka ku ngingo zitandukanye guhera ku mubano w’u Rwanda n’amahanga, ku cyorezo cya Coronavirus, kuri politiki y’imbere mu gihugu kugeza no ku ngingo ziri kuvugwaho cyane muri iki gihe ku rwego mpuzamahanga zirimo n’urupfu rwa George Floyd, umwirabura uherutse kwicwa n’umupolisi muri Amerika.

Perezida Kagame yavuze ko kuba Afurika y’Epfo yata muri yombi Kayumba Nyamwasa ari ikintu cyiza nubwo atari cyo cy’ingenzi ugereranyije n’umubano w’ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .