Isomwa ry’umwanzuro ku bujurire bw’abasirikare ba RDF baregwa gufata ku ngufu ryasubitswe

Yanditswe na Twarabanye Venuste
Kuya 27 Gicurasi 2020 saa 11:00
Yasuwe :
0 0

Urukiko rw’Ubujurire rwa Gisirikare rwasubitse isomwa ry’umwanzuro ku bujurire bw’abasirikare mu ngabo z’igihugu bashinjwa ibyaha byo gufata ku ngufu abagore, gukubita abaturage no guta akazi.

Nyuma y’iburanisha ry’amaze amasaha agera kuri atanu ku wa 22 Gicurasi 2020, ku bujurire urukiko rwanzuye ko umwanzuro uzasomwa kuri uyu wa Gatatu tariki 27 Gicurasi 2020 ariko ntiwasomwe.

Urukiko rwatangaje ko umwanzuro utasomwe kubera impamvu zitunguranye, ahubwo ko wimurirwe ku wa Gatanu tariki 29 Gicurasi 2020.

Ku wa 13 Gicurasi 2020 nibwo Urukiko rwa Gisirikare rwafashe umwanzuro wo gufunga mu gihe cy’iminsi 30 y’agateganyo, abasirikare batanu n’umusivili umwe. Ni umwanzuro abasirikare bahise bajuririra.

Ku wa 22 Gicurasi 2020, nibwo urukiko rwumvise buri ruhande, rugaragaza impamvu zifatika rushingiraho ruhagarara ku cyemezo cyarwo.

Ubushinjacyaha bwakomeje gushyigikira icyemezo cyafashwe n’Urukiko rwa Gisirikare cyo gufunga by’agateganyo Pte Ndayishimiye Patrick, Pte Nishimwe Fidèle, Pte Gatete François, Pte Gahirwa John, Pte Twagirimana Théoneste, mu gihe Ntakazirabo Donat we atarebwaga n’iburanisha ry’uyu munsi kuko atigeze ajurira.

Ku ruhande rw’abaregwa bose bagarutse ku mpamvu zishyigikira ubujurire bwabo ndetse basaba urukiko ko rwafata umwanzuro wo kubarekura bagakurikiranwa bari hanze kuko ngo ibyaha bakurikiranyweho bibemerera gukurikiranwa bari hanze, ndetse bamwe muri bo bakaba bifuza kujya kureba imiryango yabo badaherukana.

Bakurikiranyweho ibyaha birimo gukubita no gukomeretsa, gukoresha imibonano mpuzabitsina ku gahato no guta inshingano, bivugwa ko babikoreye mu Mudugudu wa Kangondo ya II mu Murenge wa Remera mu Karere ka Gasabo.

Isomwa ry’umwanzuro w’urubanza rw’ubujurire rw’abasirikare batanu ba RDF ryashyizwe ku wa Gatanu w'iki cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .