Ishyirahamwe ry’abavuzi bigenga mu Rwanda ryiyemeje kuvugurura imikorere, rigateza imbere abarigize

Yanditswe na Mukahirwa Diane
Kuya 29 Ugushyingo 2020 saa 05:21
Yasuwe :
0 0

Kuri iki cyumweru ubwo hateragana inama rusange y’abagize ishyirahamwe ry’abavuzi bigenga mu Rwanda (RHF), biyemeje kuvugurura imikorere y’iri shyirahamwe mu rwego rwo guteza imbere abakora ubuvuzi bigenga.

Iri shyirahamwe ryashinzwe mu mwaka wa 2014 mu rwego rwo guhuza imbaraga nk’abakora ubuvuzi bwigenga ngo babone uko batera imbere batabanje kurindira inkunga ya leta.

Nubwo hari ibyagezweho ariko iri shyirahamwe ryagiye rihura n’imbogamizi nyinshi zirimo kuba hari abanyamuryango batagiye bashyiramo imbaraga cyane bitewe ni imiterere y’akazi kabo .

Mu rwego rwo kuvugurura ibikorwa no kunoza imikorere y’iri shyirahamwe bahisemo kuvugurura komite, kugira ngo abatabasha kuboneka basimburwe n’abazabasha kugeza iri shyirahamwe ku ntego yaryo.

Umuyobozi w’ishyirahamwe ry’abavuzi bigenga mu Rwanada Dr.Jean Nyirikwaya, wari usanzwe ari na we mu yobozi yavuze ko bifuje gushyira amaraso mashya muri komite kugira ngo babashe kuvugurura iri shyirahamwe.

Ati “Uyu munsi twagerageje kureba ukuntu twabyutsa ishyirahamwe ryacu, tugenda twongeramo amaraso mashya muri iyi komite, kugira ngo bizadufashe kureba uko twateza imbere ubuvuzi bwigenga tutarebye leta.”

Yakomeje avuga ko iyi komite nshyashya igiye gushyira imbaraga mu guteza imbere iri shyirahamwe ndetse n’abanyamuryango babo cyane ko bazafasha bamwe mu banyamuryango baba badafite ubuzima gatozi kububona.

Ati “Kuri ubu komite yabashije kuzura kandi irimo abantu bafite ubushake bwo kuza kudufasha batagiye kuba abantu bo kuzuza izina gusa. Nk’ubu hari bamwe mu banyamuryango bacu badafite ubuzima gatozi ni ugukora uko dushoboye bakabubona, ndetse tukabakorera n’ubundi buvugizi bakenye.”

Ibi kandi byashimangiwe na Danny Mutembe, watorewe kuba umuyobozi wungirije muri iri shyirahamwe akaba yavuze ko intego yabo ari ugukomeza iri shyiramwe, bagakorana n’inzego z’ubuzima zishoboka zose mu guteza imbere ubuvuzi.

Ati “Iki nicyo gihe cyo gukomeza iri shyirahamwe, tukaryandikisha muri RGB tukagira ubuzima gatozi, ndetse tugateza imbere amashyirahamwe y’abanyamuryango bacu bose, tukabakorera ubuvugizi aho ari ngombwa hose mu nzego z’ubuzima.”

Iyi komite nshya ikaba iyobowe na Dr.Jean Nyirinkwaya, yungirijwe na Mutembe Danny, umuhuza bikorwa ni Ngamba Jean Damascene, umubitsi akaba ari Niyomwungeri Marie Therese .

Hatowe kandi n’abajyanama batatu aribo Dr.Gatsinga Jean Damascene, Dr.Gatsinzi Charles ndetse na Dr. Amani Alice.

Hatowe ushinzwe igenzura ariwe Gatembagara Andre, hatorwa n’abashinzwe gukemura amakimbirane igihe yavutse aribo Emmanuel Rudakemwa , Aphrodis Kagaba na Dr.Kayibanda Emmanuel.

Komite yavuguruwe igiye gushyira imbaraga mu kuvugurura no kugera ku ntego za RHF

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .