Ishusho y’ingendo za Perezida Kagame mu 2018

Yanditswe na Ishimwe Israel
Kuya 31 Ukuboza 2018 saa 05:54
Yasuwe :
0 0

Kuva ku wa 14 Mutarama i Dar es Salaam muri Tanzania kugera i Abidjan muri Côte d’Ivoire ku wa 19 Ukuboza 2018, ni amatariki abumbatiye uruhurirane rw’ingendo Perezida Paul Kagame yagiriye mu migabane itandukanye y’Isi zigamije gutsura umubano n’u Rwanda.

Umwaka wa 2018 wabaye udasanzwe ku Rwanda binyuze mu murava w’Umukuru w’Igihugu wo guhihibikanira kunoza ubuhahirane n’ubufatanye n’ibindi bihugu.

Perezida Kagame yakoze ingendo zitandukanye mu mwaka wabaye uw’akazi kadasanzwe ko gushaka andi maboko yo guhangana n’ibibazo by’Abanyarwanda.

Ku ikubitiro, ku wa 14 Mutarama 2018, Perezida Kagame na mugenzi we wa Tanzania, John Pombe Magufuli bemeranyije ku iyubakwa ry’umuhanda wa Gari ya moshi Isaka-Kigali.

Ingendo yakoze hanze ziganjemo izahuriranye n’inama mpuzamahanga zikomeye, aho yanaganiriye n’abayobozi ku mpande zitandukanye ku iterambere ry’u Rwanda, Afurika yari abereye Umuyobozi binyuze mu Muryango wayo wunze Ubumwe (AU) n’Isi yose.

Perezida Kagame yakoze ingendo 23 mu bihugu 28 byo ku migabane itandukanye y’Isi irimo Afurika, u Burayi, Aziya na Amerika.

Birimo Tanzania, u Busuwisi, Ethiopia, u Budage, u Buhinde, Uganda, u Bwongereza, Repubulika ya Congo, u Busuwisi, u Bubiligi, Amerika, Canada, u Burusiya, Ghana, Kenya, Mauritanie, Djibouti, Afurika y’Epfo, Namibia, u Bushinwa, Arménie, u Bufaransa, Qatar, Argentine, Misiri, Autriche, Jordanie na Côte d’Ivoire.

Yanagiriye ingendo mu turere dutanu tw’u Rwanda. Yifatanyije n’abatuye Muhanga mu birori by’Umunsi wo Kwibohora ku nshuro ya 24 ku wa 4 Nyakanga; yatashye Epic hotel iri mu Karere ka Nyagatare ku 1 Werurwe; yasoje amahugurwa ku basirikare 180 bo ku rwego rw’abofisiye i Gako mu Bugesera ku wa 13 Nyakanga; yanitabiriye ibikorwa byo kwamamaza abakandida depite b’Umuryango FPR Inkotanyi i Gisagara ku wa 23 Kanama 2018.

Urugendo rwa nyuma hanze y’urwa Gasabo, Perezida Kagame yarugiriye i Abidjan muri Côte d’Ivoire ku wa 19-20 Ukuboza 2018 aho yambikiwe umudali nk’inkoramutima y’iki gihugu ndetse anagirwa umuturage w’uyu mujyi.

Umwaka wa 2018 usize u Rwanda rusinyanye amasezerano y’ubufatanye n’ibihugu bitandukanye ku Isi byiganjemo ibyo Umukuru w’Igihugu yanyuzemo aharura inzira y’imikoranire.

Perezida Kagame yakoze ingendo 23 mu bihugu 28 byo ku migabane itandukanye y’Isi
Perezida Kagame yakoreye ingendo mu bihugu bya Afurika, u Burayi, Aziya na Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza