Ishuri rya Gisirikare rya Gako rigiye kongerwamo amashami n’ikoranabuhanga rishya

Yanditswe na Ishimwe Israel
Kuya 16 Ugushyingo 2019 saa 02:31
Yasuwe :
0 0

Abanyeshuri 320 basoje amasomo n’amahugurwa mu Kigo cya Gisirikare cya Gako, kuri uyu wa 16 Ugushyingo 2019, binjijwe mu Ngabo z’u Rwanda, bahabwa ipeti rya Sous-Lieutenant.

Mu banyeshuri 320, abagera kuri 29 ni abakobwa, mu gihe bane basoje amasomo ya gisirikare mu bihugu by’ibituranyi n’u Rwanda.

Umuyobozi w’Ishuri rya Gisirikare rya Gako, Brig Gen Ephrem Rurangwa, mu ijambo rye yashimye abanyeshuri basoje amasomo yabo ko bagaragaje umuhate.

Yavuze ko ubumenyi bahawe buzabafasha kuzuza inshingano zabo mu gisirikare cya RDF cy’umwuga.

Ishuri Rikuru rya Gisirikare rya Gako rishinzwe gutoza no kwigisha abifuza kuba abasirikare mu Ngabo z’u Rwanda, ibijyanye n’indangagaciro z’umwuga wa Gisirikare, amasomo atandukanye arimo no kwiga kuba umuyobozi w’ingabo n’ayandi.

Ishuri rya Gako ryatangiye kwigisha abofisiye bato mu Ngabo z’u Rwanda guhera mu 1999, icyo gihe imyitozo yamaraga umwaka umwe.

Kuva mu 2015 ku bufatanye na Kaminuza y’u Rwanda, ryatangije icyiciro cy’abashaka kuba abofisiye b’u Rwanda, bakanasoza bafite Impamyabumenyi y’Icyiciro cya Kabiri cya Kaminuza.

Abo banyeshuri biga mu mashami atandukanye arimo Ubuvuzi, Mechanical Engineering, Ubumenyi bw’Imibanire y’abantu hongewemo n’ubwa Gisirikare (Social and Military Science, Engineering, and General Medicine).

Ku nshuro ya mbere kuva iyi gahunda itangijwe, imfura zayo ziri mu basoje amasomo.

Brig Gen Ephrem Rurangwa yavuze ko mu bagera kuri 50 batangiye amasomo y’imyaka ine, muri bo abanyeshuri 37 aribo barangije muri Kaminuza mu cyumweru gishize banahabwa impamyabumenyi.

Yagize ati “Batangiye ari 50 ariko bamwe ntibashoboye kurangiza kubera impamvu zitandukanye.’’

“Dushimiye imfura z’iri shuri zize muri Kaminuza zikabona impamyabumenyi. Ubuyobozi bw’ishuri bushimiye igihe bamaze biga. Twifuza ko ubwo bumenyi bazabukoresha neza.’’

Iri shuri ririmo abanyeshuri 418, abazarangiza mu mwaka utaha ni 141 barimo 27 biga Mechanical Engineering. Mu 2021, hazasoza abanyeshuri 102 barimo abaganga 21.

Yakomeje ati “Ku baganga mu 2024, nibigenda neza iri shuri rizaba rimaze gushyira ku isoko abaganga 95, baziyongera ku bo dusanzwe dufite mu gihugu.’’

Abanyeshuri basoje amasomo bize bashingiye ku nkingi eshatu ishuri rya Gako rigenderaho zirimo gutozwa imico myiza, umwuga wa gisirikare no kwigisha amasomo ku rwego rwa kaminuza.

Muri gahunda z’Ishuri rya Gako riteganya gutangiza andi mashami ya siyansi harimo Ubutabire, Ibinyabuzima, Ubugenge n’Imibare.

Ishuri kandi rizakomeza kongera ubumenyi abarimu ndetse hazashyirwaho n’urubuga rwa murandasi rw’ishuri kugira ngo rishobore guhanahana amakuru n’abafatanyabikorwa cyane za kaminuza zindi n’ayandi mashuri ya gisirikare.

Inyubako z’Ishuri rya Gisirikare rya Gako zubatswe mu 1960. Mu 1974 nibwo hatangiye gutangirwa amahugurwa ku binjira mu gisirikare bato.

Iri shuri rifite umwihariko w’uko mu 1994 ariho hahurijwe ingabo za Ex-FAR zije kwinjizwa mu Gisirikare cya RPA.

Abanyeshuri 320 bahawe ipeti rya Sous-Lieutenant nyuma y'igihe bahabwa amasomo n'amahugurwa ya gisirikare
Umuyobozi w'Ishuri rya Gisirikare rya Gako, Brig Gen Rurangwa, yavuze ko aba basirikare bahawe amasomo abemerera kuzanoza neza akazi kabo

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza