Ishimwe ry’ababyeyi barwariye i Kibagabaga bahawe ifu ya Nootri irwanya imirire mibi

Yanditswe na Evariste Nsengimana
Kuya 22 Ukwakira 2019 saa 07:43
Yasuwe :
0 0

Ababyeyi n’abana babo barwariye mu bitaro bya Kibagabaga batishoboye, biganjemo abafite ikibazo cy’imirire mibi, bashyikirijwe ifu y’igikoma ya ‘Nootri’ ifasha mu guhangana n’ikibazo cy’imirire mibi.

Iyi fu y’igikoma ya Nootri ingana n’udupaki 120, ikaba imwe mu zikorwa n’Uruganda AIF (African Improved Foods) rukora ubwoko butandukanye bw’izikungahaye ku ntugamubiri bayishyikirijwe kuri uyu wa 22 Ukwakira 2019.

Uwimana Clarisse umaze ukwezi arwarijeyo umwe mu bana batanu yabyaranye n’Umunyamahanga [Umurundi] akabata, yavuze ko imibereho yabo itameze neza kubera amikoro macye.

Yavuze ko hashize igihe kinini umugabo we abataye mu Murenge wa Kinyinya mu Karere ka Gasabo, ku buryo kubabonera indyo yuzuye ari ingorabahizi.

Ati “Naje hano kwa muganga mbura ubushobozi none mbonye bampamagaye ngo bampe agafu k’igikoma cy’umwana nkaba mbashimiye Imana ibampere umugisha.”

Mugenzi we, Ntezukobagira Marie Chantal, wo mu Murenge wa Kinyinya ufite abana barindwi, yavuze ko agorwa no kubabonera amafunguro.

Ati “Naje hano mfite umwana ufite uburwayi bukomeye, mpahurira n’umumama witwa Mbabazi Teta, aramfasha akajya amumvuriza kuko ntari mfite ubushobozi bwo kumuvuza, igihe kiragera arakira ndataha.”

Uyu mubyeyi yavuze ko Mbabazi yakomeje kumwitaho amufashisha ifu y’igikoma yifasha mu guha abana be ikabarinda indwara zifitanye isano n’imirire mibi.

Teta Mbabazi Nadine watangije iyi gahunda ya ‘Jesus Care for Kids’ yabwiye IGIHE ko yayitangije agamije kugira uruhare mu gufasha no guhumuriza abatabasha kubona iby’ibanze birimo ibiribwa n’ubuvuzi.

Yavuze ko abagiraneza barimo abantu ku giti cyabo n’ibigo bagenda bamufasha kubona ibyo afashishwa abarwayi nk’uko uruganda rwa Africa Improved Foods rwabikoze rukamuha amakarito 120 y’ifu.

Ati “Dukusanya amafaranga tukagura imiti, ifu, tugakora igikoma tukakizana. Naje kugira Imana mpura na Africa Improved Foods, badutera inkunga dutangira kujya tugemurira abamama babyaye n’abana bafite imirire mibi.”

Umuyobozi ushinzwe ubucuruzi muri Africa Improved Foodss muri Afurika y’Iburasirazuba, Osbert Kiveu, yavuze ko ‘Twaje hano gufasha abantu tubaha ifu y’igikoma ikungahaye intungamubiri nk’imwe mu ntego yacu yo gufasha abari mu gace dukoreramo.”

Africa Improved Foods yashyize imbaraga mu kurwanya imirire mibi aho kuri ubu itanga ubufasha binyuze muri gahunda ifatanyamo na Leta y’u Rwanda yo kugeza ifu ya Shisha Kibondo, ku baturage bo mu cyiciro cya mbere cy’ubudehe.

Uru ruganda rwa AIF, rukora ifu z’ubwoko burimo ‘Nootri mama’ na ‘Nootri Toto’, ‘Shisha Kibondo’ na ‘Super’ zose zikorwa mu bihingwa birimo Ibigori na Soya.

Ababyeyi barwariye i Kibagabaga bahawe ifu ikungahaye ku ntungamubiri
Mbabazi arimo guha ababyeyi ifu y'igikoma
Byari ibyishimo ubwo bari bamaze guhabwa ifu y'igikoma

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza