00:00:00 IGIHE NETWORK KN KINYARWANDA EN ENGLISH FR FRANCAIS

Isano ya Jenoside iri gututumba muri RDC n’ubutegetsi bwa Habyarimana

Yanditswe na IGIHE
Kuya 5 Ukuboza 2022 saa 07:20
Yasuwe :

Hashize iminsi mike Umuryango w’Abibumbye utanze umuburo ko nihatagira igikorwa muri Repubulika Iharanira Demokarasi ya Congo hashobora kuba Jenoside ku baturage b’iki gihugu bavuga Ikinyarwanda cyane cyane abo mu bwoko bw’Abatutsi.

Mu butumwa uyu muryango washyize hanze wavuze ko "Imvururu ziri muri Repubulika Iharanira Demokarasi ya Congo ari ikimenyetso cy’uko hakiri uburyo butuma urwango rwavuyemo Jenoside mu bihe byashize rukomeza guhererekanwa."

Loni yatanze uyu muburo mu gihe muri Repubulika Iharanira Demokarasi ya Congo hamaze iminsi hari imvugo zibiba urwango ku baturage bavuga Ikinyarwanda cyane cyane abo mu bwoko bw’Abatutsi ndetse n’ibikorwa bibibasira.

Ibintu byarushijeho kuba bibi ubwo M23 isanzwe n’ubundi irwanira uburenganzira bw’abavuga Ikinyarwanda yuburaga imirwano.

Abaturage bavuga Ikinyarwanda bagize 5 % by’abaturage bose ba Repubulika Iharanira Demokarasi ya Congo. Biganje mu Burasirazuba bw’igihugu, muri Kivu y’Amajyepfo n’Amajyaruguru.

Amateka agaragaza ko aba baturage bamwe bisanze muri Congo kuko ubutaka bari batuyeho bwashyizwe kuri icyo gihugu buvuye ku Rwanda n’u Burundi ubwo hacibwaga imipaka mu nama y’i Berlin yagabanyije Afurika mu 1884.

Abandi bahagiye mu gihe cy’ubukoloni bajyanywe n’Ababiligi kujya gukora mu birombe by’amabuye y’agaciro no gushakira abakoloni ubundi butunzi bagumayo gutyo.

Kugeza ubu icyo benshi bakomeje kwibaza ni impamvu y’ukwibasirwa kw’aba baturage bavuga Ikinyarwanda n’urwango rukomeye andi moko yo muri Repubulika Iharanira Demokarasi ya Congo akomeje kugirira Abatutsi.

Ikibazo cy’Abanye-Congo bavuga Ikinyarwanda cyatangiye kuzamuka cyane nyuma y’ubwigenge bwa Congo mu 1960 ubwo hagabanywaga ubutaka, abiyita Abanye-Congo gakondo bashaka kubwima abavuga Ikinyarwanda bafataga nk’Abanyamahanga.

Ntabwo byasakuje cyane kubera ko Congo yari ihanganye n’ibindi bibazo nk’intambara zo kuyiyomoraho, ubukene n’ibindi.

Byongeye gufata intera mu myaka ya 1970 kugeza n’uyu munsi rucyambikanye, aho abaturage bo mu yandi moko batibonamo bagenzi babo bavuga Ikinyarwanda.

Bifite imizi mu butegetsi bwa Habyarimana

Inzobere akaba n’inararibonye muri politiki y’u Rwanda n’akarere, Tito Rutaremara, yagaragaje ko uyu munsi urwango abaturage bo mu bwoko bw’Abatutsi muri Repubulika Iharanira Demokarasi ya Congo bafitiwe rufite inkomoko muri Leta ya Habyarimana Juvenal wayoboye u Rwanda.

Tito Rutaremara yavuze ko kuva mu gihe cy’ubukoloni Repubulika Iharanira Demokarasi ya Congo yagiye irangwa n’amacakubiri ashingiye ku moko.

Ati “Amateka ya Congo yaranzwe n’amacakubiri mu moko, guhera ku Babiligi kugera kuri Mobutu, Kabila mukuru, Kabila Muto, Tshisekedi, Fayulu na bagenzi be.”

Yakomeje avuga ko kugeza mbere ya 1994 muri Repubulika Iharanira Demokarasi ya Congo hari hakiri ingengabitekerezo y’amacakubiri gusa ngo nyuma yaje kubyara ingengabitekerezo ya jenoside bitewe n’ubutegetsi bwa Habyarimana.

Ati “Ingengabitekerezo ya Jenoside yajyanywe muri Kivu y’Amajyaruguru (Rutshuru na Masisi) na leta ya Habyarimana niyo yafashije kurema koperative yitwa Magrivi. Iyo Magrivi niyo yakwije ingengabitekerezo y’amacakubiri n’iya Jenoside muri Kivu y’Amajyaruguru (yo Kwanga no kwica Abatutsi).”

Icyiswe Mutuelle agricole des Virunga (Magrivi) ni ishyirahamwe ry’Abahutu ryashinzwe bigizwemo uruhare na Leta ya Habyarimana.

Iri shyirahamwe ryahawe inshingano zo gukwirakwiza ingengabitekerezo ya Parmehutu mu yandi moko yari atuye muri Kivu y’Amajyaruguru arimo Abahunde, Abandande, Abanyanga n’Abahunde.

Magrivi yashyigikiwe cyane n’Akazu mu rwego rwo kwikiza Abatutsi bari barahunze kuva mu 1959, ndetse iza kugira uruhare mu bwicanyi bwabibasiye hagati ya 1991 na 1993.

Ibibazo by’urwango ku Banye-Congo bavuga Ikinyarwanda byarushijeho gukara nyuma ya Jenoside yakorewe Abatutsi mu 1994, ubwo abahoze mu ngabo za Leta ya Habyarimana (Ex FAR) bambukanaga intwaro muri Kivu zombi, bagaragiwe n’impunzi zisaga miliyoni ebyiri z’abahutu.

Ibyari amoko mu Rwanda byatangiye gucengera no muri Congo, inyigisho z’urwango rwibasiye Abatutsi kavukire muri ibyo bice zitangira gufata indi ntera.

Bakomeje kwenyegeza urwango bavuga ko Abatutsi ari abantu babi bashaka kwigarurira akarere ngo bakaremo ubwami bwabo muri Afurika y’Ibiyaga Bigari, bityo ko bagomba gufatanyiriza hamwe bakabarwanya.

Abo basirikare bavanze n’Interahamwe niko bakoraga ubugizi bwa nabi ku baturage bagiye basanga batabiyumvamo, bituma Abanye-Congo b’andi moko barushaho kwanga urunuka abavuga Ikinyarwanda.

EX FAR ku bufatanye n’Abahutu bo muri Kivu y’Amajyaruguru, bagabye ibitero byinshi ku Batutsi bo muri utwo duce, bagamije kubikiza.

Tito Rutaremara yavuze ko abagiye bayobora RDC mu bihe bitandukanye barushijeho gutiza umurindi iyi ngengabitekerezo ya Jenoside.

Ati “Ba Kabila bombi na FDLR bakwirakwije ingengabitekerezo y’amacakubiri ni ingengabitekerezo ya Genocide muri Kivu zombi no muri Kinshasa, aha bigishaga amoko yose yo muri Kivu zombi n’Abaturage bo muri Kinshasa kwanga Abatutsi.”

Yavuze ko n’iyo arebye uyu munsi asanga ubutegetsi bwa Perezida Tshisekedi bwarakomeje muri uwo murongo.

Ati “Tshisekedi, Fayulu na bagenzi be, uyu munsi barakwirakwiza muri Congo yose ingengabitekerezo y’amacakubiri n’iya Jenoside ( kwanga no kwica abatutsi bo muri Congo).”

Tito Rutaremara yavuze ko ntacyo amahanga ashobora gukora ngo abatabare Abanye-Congo bavuga Ikinyarwanda kuko icyo ashyize imbere ari umutungo w’iki gihugu, ku buryo umuyobozi wese ubemerera kuwusahura ntacyo aba abatwaye.

Ati “Abanye-Congo bose, abakwicwa n’ubukene, abakwicwa n’inzara, abakwicwa n’indwara, abakwicwa n’intambara, abakwica na Jenoside n’ibindi… si ikibazo cyabo. Ntabwo ari amabuye y’agaciro yapfuye. icyo bashaka gusa ni uko DRC yaguma mu kavuyo cyangwa ikagira umuyobozi w’umucakara wabo bakabona uko basahura ubukungu bitabaruhije.”

Juvénal Habyarimana yagiye akorana na Mobutu Sese Seko wayoboye Zaire (ubu ni RDC) mu guhembera urwango ku Batutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .