Irengayobora mu rubanza rwa Rusesabagina; urukiko rwemeye ko ahura n’umwavoka we

Yanditswe na Rabbi Malo Umucunguzi
Kuya 20 Ugushyingo 2020 saa 10:55
Yasuwe :
0 0

Urukiko Rwisumbuye rwa Nyarugenge rwategetse ko Paul Rusesabagina ahura na Me Gatera Gashabana ugomba kumwunganira, nyuma yo kugaragaza ko kuva yamuhitamo batigeze bahura ngo bige kuri dosiye.

Ni iburanisha ryatangiye ritinze kubera ko Rusesabagina yavugaga ko atabonye umwanya wo kuvugana na Me Gatera Gashabana umwunganira, nyuma y’uko iburanisha riheruka ryasubitswe, kuko atari yunganiwe, aho Me Gashabana yari muri Tanzania.

Babanje guhabwa umwanya bavugana mu ikoranabuhanga, abandi bose basohoka mu cyumba cy’urukiko.

Rusesabagina aregwa ibyaha birimo kurema umutwe w’ingabo utemewe, gutera inkunga iterabwoba, gukora iterabwoba ku nyungu za politiki n’ubufatanyacyaha mu cyaha cy’ubwicanyi no gufata undi bugwate.

Ku wa 17 Nzeri 2020 nibwo Urukiko rw’Ibanze rwa Kicukiro rwanzuye ko Rusesabagina aburana afunzwe kubera ko hari ibimenyetso bikomeye bituma akekwaho ibyaha bikomeye no kuba hari iperereza rigikeneye gukorwa, ahita ajuririra. Urukiko rwisumbuye rwa Nyarugenge, ku wa 2 Ukwakira rutesha agaciro ubujurire bwe.

Ubushinjacyaha bwaje no gusubira mu Rukiko rw’Ibanze rwa Kicukiro busaba kongera iminsi 30 ku gihe cyo gufungwa by’agateganyo kubera iperereza ryari rigikorwa, biranemezwa, Rusesabagina ahita yongera kubijuririra mu Rukiko Rwisumbuye rwa Nyarugenge.

Iburanisha mu bujurire ku kongera igihe cy’ifungwa ry’agateganyo rigiye gutangira kuri uyu wa Gatanu, Umushinjacyaha yahise ahaguruka, avuga ko hari inzitizi batanze igaragaza ko uru rukiko rutari rukwiye kwakira iki kirego.
Rusesabagina yahise ahabwa ijambo, ariko Me Gashabana avuga ko mu kuganira n’umukiliya we, basanze mbere yo kuburana ari ngombwa ko bahura imbonankubone, bityo ko Urukiko rwakwemeza ko ajya kuri gereza.

Rusesabagina yunzemo ati "Twasanze mbere y’uko njya mu rubanza twabanza tugahura, nkabasha kubona dosiye yose, nkayisoma, noneho nkagira icyo nyivugaho mu gihe cyo kuburana."

Yavuze ko iburanisha ryasubikwa, bagahabwa undi munsi bazaburanaho, bamaze kuganira.

Me Gashabana yavuze ko iburanisha barishyize undi munsi, bawushyira ku wa Gatanu kubera ko yageze mu Rwanda ku wa Gatatu nimugoroba avuye mu rundi rubanza hanze y’igihugu, bamupima Covid-19, ku buryo kuri uyu wa Kane nimugoroba aribwo yavuye muri hotel bari bamushyizemo.

Yavuze ko ku wa Mbere azasubira hanze, ku buryo nagaruka azanyura mu minsi yo kongera kwipimisha, bityo ku wa Gatanu utaha aribwo baburana, ariko ngo akabanza kubonana na Rusesabagina kuri gereza.

Umushinjacyaha yavuze ko ari ibintu bitangaje kumva uyu munsi bataburanye, kuko kuburana ubu bujurire bimaze gusubikwa kabiri, ubwa mbere bikorwa kubera ko Me Gashabana atari ahari, n’ubwa kabiri biterwa n’uko yari ataraboneka.

Ati "None uyu munsi urageze bazana indi mpamvu itumvikana, ngo barashaka kubanza kubonana ngo asome dosiye."

Yavuze ko Rusesabagina na Me Gashabana mbere y’iburanisha basabye isaha yo kuganira mu muhezo bakabihabwa, none bakaba basabye ko urubanza rwimurwa.

Ni ibyo yise ko ari impamvu zo kudashaka kuburana mu gihe ari urubanza rwagakwiye kwihuta.

Ati "Ese dosiye bategura ni iyihe? Wajurira nta dosiye wasomye? Ko iyo dosiye bamaze kuyiburanaho kenshi?"

Yavuze ko uregwa akwiye kuvuga ko ubujurire aburetse, agategereza kuburana mu mizi.

Byongeye, ngo Me Gashabana abizi neza ko kujya kuri gereza bidashoboka kubera icyorezo cya COVID-19, bityo ko Urukiko rwakwemeza ko nta shingiro ubusabe bwabo bufite.

Me Gashabana yavuze ko kuva hafatwa icyemezo cyo kutajya kuri gereza, yari atarahura na we, nyuma y’uko Rusesabagina yari amaze kwamburwa abavoka yari yarahawe n’urugaga rwabo, ku buryo hatekerezwa ku irengayobora ryatuma baganira bahanye intera kandi bambaye udupfukamunwa.

Umushinjacyaha yavuze ko nta mpamvu yo gushyira irengayobora kuri Rusesabagina kuko atari umuburanyi udasanzwe cyangwa se ko uwunganira ari umwavoka udasanzwe.

Rusesabagina ariko yagaragaje impungenge, kuko nk’umuburanyi adashobora kubona dosiye ndetse adashobora guhura na avoka we, akibaza uburyo ashobora kuburana atazi ibyo aza kubazwaho.

Umucamanza yavuze ko kubonana n’umwunganizi ari uburenganzira butagereranywa haba mu bihe bisanzwe n’ibihe bidasanzwe, kimwe n’uburenganzira bwo kuburanishwa vuba, kuko biri mu nyungu z’uregwa.

Yavuze ko kuva Ubushinjacyaha butaratanze icyo bwita inzitizi ngo zigere kuri Rusesabagina, nta mpamvu ituma icyo Rusesabagina asaba cyo guhura n’umwavoka we bidakorwa.

Umucamanza yabajije niba bishoboka ko bahita babonana noneho iburanisha rigakomeza nyuma ya saa sita, Me Gashabana avuga ko yahita ajya kuri gereza bagahura.

Rusesabagina yahise avuga ko kuba bakomeza kuburana uyu munsi bigoye, kuko kuva yahitamo Me Gashabana ngo amwunganire batigeze bahura, bityo ko bakeneye umwanya uhagije wo kuvugana, urubanza rugahabwa indi tariki.

Urubanza rwimuriwe tariki 27 saa tatu.

Uru rubanza rwabaye hifashishijwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .