00:00:00 IGIHE NETWORK KN KINYARWANDA EN ENGLISH FR FRANCAIS

Ireme ry’impamyabumenyi ku bize muri ULK, isoko ry’umurimo… Ikiganiro na Dr Rusibana

Yanditswe na Akayezu Jean de Dieu
Kuya 28 January 2022 saa 07:10
Yasuwe :

Kimwe n’abandi benshi mu Banyarwanda, mu 1994 nibwo Prof Rwigamba Balinda, yatashye mu Rwamubyaye, atangira akazi ko kwigisha muri Kaminuza y’u Rwanda. Nk’umuntu wari uvuye muri Repubulika Iharanira Demokarasi ya Congo asanzwe afite inararibonye mu rwego rw’uburezi, yigiriye inama yo kugira uruhare mu kubaka uburezi bw’u Rwanda.

Mu 1996, Prof Rwigamba yatangije Kaminuza Yigenga, ULK [Universite Libre de Kigali], kuva icyo gihe igenda yaguka aho kuri ubu ifite ishami ku Gisenyi ndetse ikaba ifite n’iryigisha Imyunga n’Ubumenyi-Ngiro.

Muri iyo myaka 26 ishize, ULK ikomeje kugira uruhare mu kubaka Umunyarwanda ufite ubumenyi bumufasha gupiganwa ku isoko ry’umurino no kwihangira umurimo umuteza imbere ukanateza imbere igihugu cye.

Byose bikorwa kubera ubuyobozi bufasha mu gushyira mu bikorwa icyerekezo cy’iyi kaminuza ari na yo mpamvu mu minsi mike ishize, Dr Rusibana Claude yagizwe Umuyobozi Mukuru wa ULK.

Dr Rusibana afite inararibonye mu rwego rw’uburezi. Yigishije muri ULK mu 2009, akora mu zindi Kaminuza zirimo Mount Kenya University, Kaminuza ya Kigali n’ahandi.

Mu kiganiro na IGIHE, Dr Rusibana yagarutse ku cyizere yagiriwe n’abashinze ULK, ingamba n’amavugurura ateganya gukora mu gukomeza gushyira mu bikorwa icyerekezo cya ULK cyo gutanga uburezi bufite ireme.

Ireme ry’impamyabumenyi zitangwa na ULK….

Hashize imyaka 26 ULK ishinzwe ikaba imaze gushyira ku isoko ry’umurimo abasaga ibihumbi 36.

Muri ULK hatangirwa amasomo mu mashami arimo ubukungu, ikoranabuhanga, ibaruramari, amategeko, amasomo ajyanye n’iterambere n’ububanyi n’amahanga, Ubwubatsi, Amashanyarazi, Ubumenyi mu itumanaho no Gupima Ubutaka.

Abaharangiza bahabwa impamyabumenyi z’icyiciro cya kabiri cya kaminuza, icyiciro cya gatatu (Master’s) ndetse n’impamyabushobozi zitangwa n’Ishuri Rikuru ry’Ubumenyingiro (ULK Polytechnic Institute).

Dr Rusibana avuga ko abarangiza muri ULK baba barahawe ubumenyi bufite ireme ryifuzwa kuko uretse kuba bafite abarimu babifitiye ubushobozi, hari n’ibikoresho bifasha mu gutanga uburezi bufite ireme.

Ati “Icya mbere dufite abarimu bafite impamyabushobozi ziri ku rwego rwo hejuru, ikindi dufite icyumba cya mudasobwa na internet ifasha abanyeshuri gukora ubushakashatsi bwabo bakongera ubumenyi bwabafasha mu kazi bajyamo cyangwa abajya kwihangira umurimo.”

Dr Rusibana Claude uherutse kugirwa Umuyobozi Mukuru wa ULK afite inararibonye mu burezi

Dr Rusibana yasobanuye kandi ikibazo cy’umuco ukunze kuvugwa mu banyeshuri barangiza za kaminuza by’umwihariko abo mu zigenga wo gushaka abantu babandikira ibitabo, ibizwi nko ‘Kudodesha’.

Kuri we, avuga ko kugira ngo umunyeshuri ahitemo kwandikisha igitabo bituruka ku mpamvu zirimo kubura umwanya no kudafata inshingano ariko bidakwiye guhuzwa n’ireme ry’ubumenyi baba barahawe na kaminuza.

Ati “Nubwo twe hano muri ULK uwo muco udahari ndetse dukomeje gushyiramo imbaraga ngo twirinde hatazagira abawugira. Twe uburyo dukoresha, umwarimu asaba umunyeshuri kuzana ingingo azandikaho cyangwa azakoraho ubushakashatsi, hanyuma mwarimu akamufasha kuyiha umurongo.”

Dr Rusibana avuga ko uburyo bukoreshwa muri ULK, butapfa korohera umunyeshuri ufite izo ntekerezo zo kudodesha.

ULK ku isoko ry’umurimo...

Ubuyobozi bwa ULK butangaza ko hagiye gukorwa ubushakashatsi bugaragaza uko iyi kaminuza ihagaze ku isoko ry’umurimo, ibikorwa bakora n’uruhare rwabo mu guteza imbere igihugu.

Ni ubushakashatsi buzagaragaza abarangije muri ULK aho baherereye, ibikorwa bitandukanye bakora, abihangiye imirimo ndetse n’abakora mu nzego zaba iz’abikorera nk’amabanki, ibigo by’ubwishingizi ndetse n’abakorera Leta mu mirimo itandukanye.

Dr Rusibana ati “Iyo urebye hirya no hino muri iki gihugu cyacu baba abayobozi mu nzego zitandukanye, abenshi twavuga ko hafi 80% bize muri ULK. Ibyo biraduha ishusho y’agaciro k’impamyabumenyi n’impamyabushobozi duha abize aha ngaha.”

Yakomeje agira ati “Nkanjye iyo ngiye mu bigo by’imari nkakirwa n’umunyeshuri nigishije bimpa icyizere cy’uko abana bacu bari mu mirimo. Iyo mpamyabumenyi batahana baragenda bakayikoresha mu buzima bwa buri munsi no mu guhindura sosiyete no gufasha leta kugira ngo igere ku cyizere cy’Abanyarwanda bashoboye.”

Dr Rusibana avuga kandi ko abenshi mu bize muri ULK bihangiye imirimo ahanini biturutse ku kuba baba bafite ubumenyi mu guhanga imishinga, kuyicunga ndetse n’ubuhanga mu by’ibaruramari n’icungamari.

Yavuze ko abize muri ULK bakomeje kwitwara neza nk’uko baba barabitojwe n’abayobozi cyangwa abarimu babigisha umunsi ku munsi babibigishije.

Kaminuza ikora ubucuruzi ?

Abahanga n’abarambye mu myuga itandukanye by’umwihariko uw’uburezi, bavuga ko kuwujyamo akenshi ari umuhamagaro. Bavuga ko uramutse ushoyemo imari byakugora gushyira imbere inyungu.

Kuri Prof Rwigamba Balinda washinze ULK avuga ko ajya kuyitangiza yari afite intego yo kugira uruhare mu kubaka urwego rw’uburezi nk’umuntu wari wararubayemo muri Repubulika Iharanira Demokarasi ya Congo.

Ibi kandi bishimangirwa n’Umuyobozi Mukuru wa ULK, Dr Rusibana Claude uvuga ko nubwo icyangombwa kaminuza ifite ari icy’ubucuruzi ariko icya mbere ari ugutanga umusanzu ku burezi bw’u Rwanda.

Ati “Niko amategeko abigena, ntabwo ducuruza abantu ariko ducuruza ubumenyi kuko ufite ubwo bumenyi na we yarabuguze, ni yo mpamvu umunyeshuri asabwa kwishyura mbere y’uko abona ubwo burezi cyangwa mbere y’uko abona iyo mpamyabushobozi ye.”

Yakomeje agira ati “Kwigisha ntabwo wabyita ko ari akazi gahambaye cyane ariko ni umuhamagaro. Ni ibintu umuntu akora akunze. Uwashinze Kaminuza rero ntabwo yari agamije ubucuruzi ahubwo yari agamije gufasha kugira ngo leta n’abikorera babone abazabafasha kugera ku byo bifuza kugeraho bakoresheje bwa bumenyi.”

Ibiciro bigaragara ku rubuga rwa internet rwa ULK bigaragaza ko abiga muri iki kigo bishyura hagati y’ibihumbi 600Frw na 750Frw. Ni mu gihe abiga muri ’Masters’ bishyura miliyoni 1.6Frw.

Kuri Dr Rusibana, na we avuga ko kaminuza zigenga zidakora ubucuruzi nk’uko bamwe babikeka, ahubwo ngo zikoresha amafaranga atangwa n’abanyeshuri kugira ngo zibashe kubafasha kubona ubwo bumenyi butuma bagera ku ntego zabo.

Ati “Abantu bakunze kuvuga ngo kaminuza zacu ni kaminuza zigenga. Zose nubwo ba nyira zo ari abikorera ariko ni kaminuza z’abanyarwanda, nta tandukaniro riri hagati ya kaminuza zigenga n’iza leta.”

Kaminuza Yigenga ya Kigali (Université Libre de Kigali, ULK), iri mu zigenga zimaze igihe kinini mu Rwanda ndetse ibipimo byagiye bikorwa mu myaka itandukanye biyishyira mu myanya y’imbere mu zitanga uburezi bufite ireme.

Buri mwaka ULK ishyira ku isoko ry'umurimo abanyeshuri bayirangijemo biteguye gufasha igihugu mu iterambere
Prof Balinda Rwigamba washinze ULK yari afite intumbero yo gutanga umusanzu mu kubaka urwego rw'Uburezi nyuma ya Jenoside yakorewe Abatutsi
No mu bihe bya Covid 19 ULK yakomeje gutanga ubumenyi hifashishijwe ikoranabuhanga
Zimwe mu nyubako abanyeshuri biga muri ULK bigiramo
ULK imaze imyaka irenga 26 ishinzwe na Prof Balinda Rwigamba

Amafoto na Video: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .