00:00:00 IGIHE NETWORK KN KINYARWANDA EN ENGLISH FR FRANCAIS

Inzira igoye y’umukobwa wabeshywe 15.000 Frw agaterwa inda

Yanditswe na Nsanzimana Erneste
Kuya 29 Ugushyingo 2022 saa 01:38
Yasuwe :

Muri iki gihe u Rwanda ruhanganye n’ikibazo cy’abo umuntu yakwita abagizi ba nabi bashukisha abangavu uduhendabana bakabatera inda z’imburagihe.

Ibi ni byo byabaye ku mukobwa wo mu Karere ka Karongi tutashatse gutangaza amazina ye, warangije amashuri abanza ajya gukora akazi ko mu rugo mu Mujyi wa Kigali.

Uyu mukobwa yatsinze ikizamini cya Leta kimwemerera kujya mu mashuri yisumbuye abura ubushobozi, abona icyamuha amahoro ari uko yakwigira i Kigali kuko yabonaga abandi bana bagiye ku ishuri agahinda kakamwica.

Yagiye i Kigali mu 2017 afite imyaka 14, akorayo akazi ko mu rugo imyaka ibiri icyorezo cya Covid-19 kiba kigeze mu Rwanda. Aho yakoraga bahise bamwirukana, icyakora ku gisa n’amahirwe abona akazi ahandi. Aho handi yarahakoze amezi atatu naho kubera Covid-19 ubukene burahinjira bamusezerera batamuhaye n’itike.

Ati "Banyirukanye mu kwezi kwa gatandatu ngo ningende. Nta mafaranga bampaye barambwiye ngo njye iwacu ibintu byarakomeye."

Yarasohotse ageze hanze ahura n’umuhungu yari asanzwe abona muri ako gace, amusaba kujya kumucumbikira amwizeza ko nibucya amuha ibihumbi 15 Frw agataha iwabo i Karongi.

Umukobwa yarabyemeye baratahana, umusore arateka barafungura, amwereka icyumba aryamamo. Umukobwa aragenda araryama mu mahoro. Byageze saa tanu z’ijoro yumva umuntu aramukomangiye, akinguye asanga ni wa musore.

Umukobwa yahise abona ibye bimurangiriyeho atakambira umusore ngo areke kumusambanya n’amafaranga ye ayareke, umuhungu aranga ashaka kubikora ku gahato.

Ngo bahereye ubwo baragundagurana umukobwa abura umutabara, nyuma y’imirwano yamaze amasaha atatu, umukobwa yari amaze gucika intege umusore nawe ahita amushyiraho amasohoro.

Ahagana saa cyenda mu rukerera uwo musore yamusohoye mu nzu ngo kuko n’ubundi icyo yari amwitezeho ntiyakibonye. Amasaha yari asigaye ngo bucye yayamaze hanze bucyeye, ahamagara nyirakuru amubwira ko aho yakoraga bamwirukanye nta tike bamuhaye umukecuru amwoherereza itike.

Uyu mukobwa ntiyigeze abwira nyirakuru ibyamubayeho dore ko atatekerezaga ko ashobora gusama kuko ‘imibonano mpuzabitsina nyirizina itabaye’. Uko gushidikanya kwatumye amenya ko atwite inda igize amezi atanu.

Icyo gihe yari afite imyaka 16, ntabwo yari azi ko umukobwa utewe inda atarageza ku myaka 17 itegeko rimwemerera kuyikuramo nta buryozwacyaha bubayeho.

Yatekereje kuyikuramo kwa magendu agira ubwoba ko ishobora kumuhitana cyangwa byamenyekana agafungwa, ni uko aheberera urwaje arayireka irakura.

Inda igize amezi arindwi nyirakuru yarabimenye, umukobwa amusobanurira uko byagenze, umukecuru amubera imfura ntiyamutererana cyane ko ari na we wamureze nubwo afite ababyeyi.

Igihe cyarageze nyirakuru amugurira imyenda y’uruhinja arabyara. Nk’abandi babyeyi ahamagara umusore wamuteye inda, umusore amutera utwatsi ati "Ko uzi ko tutabikoze ni gute wavuga ngo naguteye inda?"

Byabaye ukutamenya

Magingo aya uyu mwana agize imyaka ibiri atarandikwa mu irangamimere ndetse n’umusore nta n’icyo aramufasha ngo yite ku wo yabyaye.

Kimwe na bagenzi be babyaye imburagihe, uyu mukobwa yitabiriye ibiganiro bitegurwa n’Umuryango wita ku buzima HDI biri kubera mu turere dutandukanye.

We na bagenzi be basobanuriwe ibijyanye n’ubuzima bw’imyororokere, banabwirwa ko umwangavu uri munsi y’imyaka 18 itegeko rimwemerera kujya kwa muganga ku bitaro bakamukuriramo inda igihe abikeneye kandi ko icyo gihe nta buryozwacyaha bubaho.

Uretse umwana utarengeje imyaka 17 abandi bemerewe gukurirwamo inda ni umugore cyangwa umukobwa washyingiwe ku gahato, uwafashwe ku ngufu, uwatewe inda n’uwo bafitanye isano ya bugufi n’uwo abaganga basanze inda ishobora kumuhitana.

Impuguke mu bijyanye n’ubuzima, Dr Mporanyi Theobald yabwiye IGIHE ko ibibazo nk’ibi by’abakobwa bahohoterwa ntibabone uburenganzira bwabo bakunze guhura na byo.

Gusa ngo bigenda bigabanuka kuko bamaze imyaka itatu bafatanya na Imbuto Foundation kuganiriza abangavu batewe inda imburagihe. Abitabiriye ibi biganiro baragenda bagasangira n’abandi amakuru bityo akagera kuri benshi.

Dr Mporanyi avuga ko nubwo nta bushakashatsi burakorwa ngo bugaragaze ishusho y’imibare y’abakobwa bamaze gukurirwamo inda, ngo iyo baganira n’abaganga bababwira ko basigaye bakira abakobwa n’abagore basaba uburenganzira bwabo bwo gukuramo inda nibura kabiri buri kwezi. Ibi bivuze ko abajya kuzikuzamo kwa magendu bagenda bagabanuka bityo n’umubare w’abagore bapfa babyara uzagabanuka.

Ati "Ikigamijwe si ugukuramo inda ni ukugabanya ingaruka zibaho iyo bakuriyemo inda ahatarabigenewe".

Dr Mporanyi avuga ko iyo baganiriza abakobwa babyariye iwabo basanga harimo benshi batandikishije abana, akavuga ko biterwa no kutagira amakuru kuko abenshi impamvu batanga ari uko badafite indangamuntu cyangwa ko se w’umwana atabonetse.

Ati "Ubu Leta yarabyoroheje umwana wese uvukiye kwa muganga agomba kwandikwa si ngombwa ko se aba ahari cyangwa ko uwamubyaye aba yarafashe indangamuntu".


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .