00:00:00 IGIHE NETWORK KN KINYARWANDA EN ENGLISH FR FRANCAIS

Hagaragajwe uruhare rw’inyigisho z’ubujyanama mu kuzamura ireme ry’uburezi

Yanditswe na Kanamugire Emmanuel
Kuya 26 June 2022 saa 01:33
Yasuwe :

Abarimu, abayobozi b’amashuri hamwe n’izindi nzego zifite ibikorwa bifite aho bihuriye n’uburezi, bagaragaje ko inyigisho z’ubujyanama zifite uruhare runini mu kunganira amasomo asanzwe abanyeshuri bahabwa by’umwihariko ingimbi n’abangavu kuko bafite imbogamizi nyinshi bahura na zo mu myigire.

Ubushakashatsi bwakozwe n’ishami rishinzwe ubuzima bwo mu mutwe mu Kigo cy’Igihugu gishinzwe Ubuzima, RBC, mu 2021, bwagaragaje ko abagera kuri 23, 1% mu rubyiruko mu Rwanda bibasiwe bikomeye n’agahinda gakabije kandi banabaswe n’inzoga.

Ubu bushakashatsi bwakorewe ku bari mu kigero cy’imyaka iri hagati ya 14 na 30 hirya no hino mu gihugu, bwerekanye ko ibi bibazo byiganje cyane mu b’igitsina gabo, abatuye mu bice by’ibyaro, abatarize ndetse n’abantu bakennye.

Iki kibazo gishobora kuba kinafitanye isano n’umubare w’abanyeshuri bata ishuri ukiri munini nk’uko Minisitiri w’Uburezi, Dr Uwamariya Valentine yabigaragaje, ubwo yatangaga ikiganiro mu ihuriro nyunguranabitekerozo ry’imitwe ya politiki yemewe mu Rwanda, muri Werurwe uyu mwaka.

Icyo gihe yagaragaje ko abanyeshuri bakirwa mu mwaka wa mbere baba bagera ku bihumbi 500 ariko bakagera mu mwaka wa gatandatu hasigaye nk’ibihumbi 180.

Uburezi bw’ingimbi n’abangavu kandi bubangamiwe n’ihohoterwa rishingiye ku gitsina ari na ryo rivamo inda zitateguwe, ikibazo gicanye maremare kuva mu myaka ishize.

Hashize imyaka igera kuri ibiri hatangijwe porogaramu y’inyigisho z’ubujyanama zigenewe ingimbi n’abangavu bo mu mwaka wa mbere w’amashuri yisumbuye (bari mu kigero cy’imyaka 13-18), ku bufatanye bw’Ikigo Gishinzwe Uburezi bw’Ibanze (REB) n’umuryango ufasha mu burezi, Inspire Educate Empower Rwanda.

Yatangijwe mu mashuri 50 yo mu turere twa Musanze, Rulindo, Bugesera, Gasabo, Huye na Kayonza binyuze mu mushinga wiswe ‘Youth First Rwanda’ aho abarimu bahuguwe ari bo batanga inyigisho ziteganyijwe.

Izo nyigisho zirimo izo kurwanya ibiyobyabwenge, iz’ubuzima bw’imyororokere n’ubwo mu mutwe, ubujyanama bufasha mu kwikura mu bibazo bahura na byo, kwigirira icyizere no gukunda ubuzima hagamijwe gukumira kwiyahura n’izindi.

Abanyeshuri bigishirizwa mu matsinda mato hagakoreshwa isaha imwe buri cyumweru kugira ngo amasomo asanzwe atabangamirwa.

Mu nama isuzuma ibyagezweho muri iyi porogaramu, yabereye i Kigali mu mpera z’iki cyumweru, Umuyobozi ushinzwe uburezi mu Karere ka Kayonza, Nzabahabwa Alphonse, yavuze ko basanze yunganira amasomo asanzwe mu buryo bufatika.

Yagize ati “Iyo hatabonetse porogaramu nk’iyi yunganira ya masomo asanzwe usanga intego nyamukuru yo gutegura Umunyarwanda wuzuye tutayigeraho neza. Ni porogaramu ifasha umunyeshuri kwimenya, kumenya imbogamizi afite bitewe n’ikigero arimo noneho ikamuha n’umurongo wo kuzivamo. Imufasha gufata ibyemezo, kuva mu biyobyabwenge n’ibindi byamubuza amasomo.”

Umuyobozi ushinzwe uburezi mu Karere ka Kayonza, Nzabahabwa Alphonse, yavuze ko basanze iyi porogaramu yunganira amasomo asanzwe mu buryo bufatika

Agaruka ku kamaro k’aya masomo, Umuyobozi w’Ishami ry’uburezi mu Karere ka Musanze, Munyamahoro Alexis, yagize ati “Abana bahamya ko bungutse ubumenyi bubafasha mu buzima bwa buri munsi ndetse imyitwarire yarahindutse. Ubu ni ubuhamya mpabwa n’abayobozi b’amashuri n’ibyo nanjye ubwanjye niboneye mu gihe nasuraga bimwe mu bigo by’amashuri.”

“Muzi ko dufite abana bagenda bata amashuri mu gihugu hose ariko bagiye biyemeza kurigumamo nyuma y’izi nyigisho kandi bakatubera n’abavugizi kuri bagenzi babo baritaye. Bungutse ubumenyi bwo guhangana n’ihohoterwa iryo ari ryo ryose, bikarinda abakobwa bahohoterwaga n’abantu bakuru. Ikindi ni uko abana bazamuye urwego rw’imitsindire mu mashuri.”

Porogaramu nk’iyi y’ubujyanama yifashishwa muri Kenya n’u Buhinde nk’uko byatangajwe n’umuyobozi ushinzwe ibikorwa bya ‘Youth First Rwanda’, Jane Nungari Njuguna.

Yavuze ko mu bituma abanyeshuri bata ishuri harimo no kwishora mu biyobyabwenge, ikaba ari yo mpamvu muri izi nyigisho harimo ijyanye no kubakangurira kubyirinda.

Harimo kandi ibijyanye n’ubuzima bw’imyororokere aho abanyeshuri bafashwa kumenya imiterere yabo no gufata ibyemezo bibarinda kugwa mu mutego wo gushorwa mu mibonano mpuzabitsina bakiri bato cyangwa bakubaka ingo imburagihe.

Ku bijyanye n’ubuzima bwo mu mutwe bigishwa kudaheranwa n’amateka mabi, intege nke zitera bamwe gutsindwa mu ishuri ahubwo bakabasha gutahura n’ibyiza bifitemo nk’uko Njuguna yakomeje abisobanura.

Ati “Tubereka ko nta wukwiye kwiyanga nko mu gihe yatsinzwe mu ishuri ahubwo ashobora kugira ibindi akora neza. Umuntu ashobora kuba umuririmbyi mwiza, umucuranzi w’ikirangirire, umuhinzi mwiza; mbere tugerageza kubabwira ko ubuzima butagana mu cyerekezo kimwe gusa.”

Ruhumuriza Didier, umwarimu mu Karere ka Bugesera, yagize ati “Hari ukuntu abana bajyaga mu biyobyabwenge bikabaganza ariko nyuma yazo umubare wabo waragabanutse. Hari abakorerwaga ihohoterwa bagaceceka ariko ubu twabigishije uko batanga amakuru, twishimira ko dufite abana bafite icyerekezo.”

“Mu kigo cyacu muri uyu mwaka nta mwana wigeze aterwa inda kuko bamenye uburyo babyirinda nyamara mu gihe cyashize wasangaga hari abavuye mu ishuri kubera iyo mpamvu.”

Umuyobozi wungirije wa Inspire Educate Empower Rwanda, Kabera Betty, yavuze ko iyi porogaramu yaje ari igisubizo ku bibazo birimo guta ishuri, inda zitateguwe no kujya mu biyobyabwenge kw’abakiri bato kandi ko yagize uruhare mu kuzamura ikigero cy’imitsindire mu bo yagezeho.

Kabera yashimangiye ko yagezwa mu mashuri menshi ndetse no ku babyeyi kubera ko byinshi mu bibazo bibangamira abanyeshuri mu myigire baba babikuye mu miryango.

Bamwe mu barimu bagize uruhare mu gutanga inyigisho z'ubujyanama mu mashuri yo mu turere tugera kuri tutandatu
Umuyobozi wungirije wa Inspire Educate Empower Rwanda, Kabera Betty,yaavuze ko hifuzwa ko inyigisho nk'izi zagezwa no mu yandi mashuri ndetse no ku babyeyi
Umuyobozi w'ishami ry'uburezi mu Karere ka Musanze, Munyamahoro Alexis yavuze ko imitsindire yazamutse mu byanyeshuri bahawe inyigisho z'ubujyanama
Abarimu bafashije abanyeshuri muri iyi porogaramu bahawe ibyemezo by'ishimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .