Inzego z’ubucuruzi n’ubwubatsi zihariye umubare munini w’inguzanyo zitishyuwe mu 2019

Yanditswe na Rabbi Malo Umucunguzi
Kuya 3 Werurwe 2020 saa 08:37
Yasuwe :
0 0

Imibare ya Banki Nkuru y’u Rwanda, BNR, igaragaza ko inzego z’ubucuruzi n’ubwubatsi ziza imbere mu kugira umubare munini w’inguzanyo zitishyurwa, urebye imibare yo kugeza ku wa 31 Ukuboza 2019.

Muri rusange mu nguzanyo zose zitishyuwe, urwego rw’ubwubatsi rufitemo 35.0 ku ijana mu gihe urw’ubucuruzi rufitemo 35.5 ku ijana.

BNR igaragaza ko kugeza mu Ukuboza 2019, inguzanyo zari zimaze gutangwa zari miliyari 2084 Frw, zivuye kuri miliyari 1871 Frw zatanzwe kugeza mu Ukuboza 2018.

Inguzanyo zitishyurwa zavuye kuri 6.4 ku ijana zikagera kui 4.9 kugeza mu Ukuboza 2019, igabanuka ryashingiye ku izamuka ry’ubukungu ryari ryifashe neza mu mwaka ushize, kimwe n’inguzanyo zasibwe mu bitabo by’imari.

Bitandukanye no mu myaka yashize, inguzanyo zitishyurwa zagabanutse mu nzego z’ibikorerwa mu nganda n’amahoteli, ubuhinzi, ubwikorezi n’itumanaho. Gusa mu bijyanye n’inyubako zariyongereye, ziva kuri miliyari 25 Frw mu Ukuboza 2018 zigera kuri miliyari 30 mu Ukuboza 2019. Inguzanyo zitishyurwa mu bucukuzi bw’amabuye y’agaciro zageze kuri miliyari 2 Frw zivuye kuri miliyoni 40.

Izamuka ry’inguzanyo zitishyurwa mu bijyanye n’inyubako ryatewe ahanini n’imishinga minini idahagaze neza, mu gihe mu bijyanye n’ubucukuzi bw’amabuye y’agaciro, byatewe n’ihungabana ry’ibiciro ku isoko muzamahanga.

BNR igaragaza ko nk’inyungu iva mu mabuye y’agaciro u Rwanda rwohereza mu mahanga arimo gasegereti, coltan na wolfram, yagabanutseho 31.3 ku ijana mu Ukuboza 2019 ugereranyije n’igihe nk’icyo mu mwaka wabanje, kuko yavuye kuri miliyoni $142 mu Ukuboza 2018 akagera kuri miliyoni $97.6.

Ni igabanuka ryatewe n’impinduka ku biciro by’amabuye y’agaciro ku isoko mpuzamahanga, aho nk’igiciro cya gasegereti cyagabanutseho 7.2 ku ijana, icya coltan kimanukaho 20.2 ku ijana naho icya wolfram kimanukaho 18.8 ku ijana.

Imibare igaragaza ko banki zikomeje kunoza imitangire y’inguzanyo, aho inyinshi zatanzwe mu bikorerwa mu nganda nk’urwego ruhagaze neza mu gihugu. Nibura mu 2019, banki zemeje inguzanyo 419 nshya zifite agaciro ka miliyari 144 Frw, ugereranyije n’inguzanyo 311 zemejwe mu 2018, zifite agaciro ka miliyari 71.

Ibi byatumye uru rwego ruba urwa gatanu mu zishyirwamo amafaranga menshi, aho rufitemo 11.3 mu nguzanyo zatanzwe, nyuma y’inyubako zifite 35.2 ku ijana, ubucuruzi bufite 16.2 ku ijana, inguzanyo zijyanwa mu bindi zifitemo 13.1 ku ijana naho ubwikorezi n’itumanaho bifitemo 12.9 ku ijana.

Inguzanyo zatanzwe mu bijyanye n’inyubako nazo, bigaragara ko ziri mu byiciro byo guturamo (44.9 %), inzu z’ubucuruzi (36.4%) n’inyubako rusange (18.7%).

Amafaranga akoreshwa n’amabanki mu Rwanda akomeje kuzamuka

Imibare mishya ya Banki Nkuru y’u Rwanda, BNR, igaragaza ko ingano y’amafaranga akoreshwa mu mirimo inyuranye ya banki mu Rwanda, yongeye kuzamuka mu mwaka wa gatatu wikurikiranya.

Mu mibare iheruka gutangazwa, mu 2019 banki mu Rwanda zakoresheje miliyari 372.5 Frw. Mu mwaka wa 2016 zari miliyari 278.4 Frw, mu 2017 zari miliyani 308.1 Frw, mu gihe mu 2018 zari miliyari 324.6 Frw.

Ibyo ahanini byatewe n’uburyo banki zo mu Rwanda zasabwaga kuguza amafaranga hanze y’igihugu, akenshi ugasanga bibaye mu mafaranga y’amahanga bityo ikiguzi cyayo kikazamuka.

Kugira ngo kandi banki zikore, niba ari nk’inguzanyo zitangwa bisaba ko zigira n’amafaranga abitswa n’abakiliya, kandi kugeza ubu haracyifashishwa uburyo bwo kugaba amashami hirya no hino, nabyo bikagira ikiguzi bitwara.

Banki zo mu gihugu kandi zakomeje kubona amafaranga zikoresha azamuka cyane kubera ishoramari rikomeje gukorwa mu ikoranabuhanga, rigamije kuzamura uburyo abantu bagerwaho na serivisi z’imari no koroshya uburyo zitangwa.

Ubu buryo bugendana no kwishyura iri koranabuhanga no kubaka ibikorwa remezo bijyana naryo, kimwe no guhugura abakozi bazaba barikoresha. Ni ibintu kugira ngo bitangire kubyara inyungu bigomba gufata indi myaka.

BNR igaragaza ko amafaranga yakoreshejwe n’amabanki kandi yazamuwe n’inguzanyo zitishyurwa neza zazamutse 18.2 ku ijana, ziyongeraho miliyari 21.5 Frw zigera kuri miliyari 67.8 Frw. Ni ukuvuga ko zavuye kuri miliyari 41.3 Frw mu Ukuboza 2018.

Kugeza ubu banki zikomeje ibikorwa byo kugabanya amashami, ari nako byongera ishoramari mu bikorwa by’ikoranabuhanga.

Muri rusange umwaka ushize wasize banki zihagaze neza, kuko umutungo w’uru rwego wazamutse ukava kuri miliyari 3091 Frw mu Ukuboza 2018 zikagera kuri miliyari 3476 Frw mu Ukuboza 2019, bingana n’izamuka rya 12.5 ku ijana . Gusa iri zamuka ni rito kuri 15.1 ku ijana ryabonetse umwaka ushize.

Amafaranga y’urwego rw’amabanki ahanini yari agizwe n’abitswa n’abaturage, yazamutse akaba kuri miliyari 1965 akagera kuri 2190 Frw.

Igishushanyo kigaragaza inguzanyo zatanzwe ntizishyurwe
Inguzanyo zatanzwe mu 2019 n'ibyiciro zibarizwamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .