00:00:00 IGIHE NETWORK KN KINYARWANDA EN ENGLISH FR FRANCAIS

Inzara n’igwingira mu marembera; Ibyishimo byashibutse mu muhate w’ab’i Nyamagabe

Yanditswe na Ntabareshya Jean de Dieu
Kuya 27 Ukuboza 2022 saa 08:16
Yasuwe :

Hambere aha Gikongoro yari izwi nk’agace karangwamo inzara idasanzwe, abahatuye bari bariswe ‘Abatebo’ [kuko ibitebo ni ho bifite inkomoko] ndetse iterambere baryumvaga nk’umugani.

Iyahoze ari Gikongoro ni yo irimo Uturere twa Nyaruguru na Nyamagabe by’ubu.

Ubutaka bwaho bwari bwarakayutse, bwuzuye ubusharire ku buryo igihingwa cyahaterwaga cyameraga nk’ikiri ku gasi.

Ababizi bavuga ko Gikongoro ubwaryo ari izina ry’uburwayi bw’ibihingwa cyangwa inzara iterwa no kurumbya imyaka cyangwa konerwa n’uburima, ng’iyo imvano y’inzara yahoraga inuma.

Bibiliya yera na yo ibigarukaho mu Gitabo cy’Umuhanuzi Amosi 4:9 hagira hati “Nabateje kurumbya ndetse na gikongoro: imirima yanyu myinshi n’inzabibu zanyu n’imitini yanyu n’imyelayo yanyu byonwe n’uburima, ariko ntibyatuma mungarukira.”

Kuri ubu, inzara yabaye amateka ndetse abitwaga ‘Abatebo’ ubu ni abakungu kuko imibereho yabo yahindutse, ubutaka bwashariraga butatse ibihingwa bitoshye n’icyayi gikomeje guhogoza amahanga.

Nk’AKarere ka Nyamagabe gafite ubuso bwa kilometero kare 1090, gafite igice kinini gikora kuri Pariki y’Igihugu ya Nyungwe isurwa n’abakerarugendo bifite kubera ikiraro cyo mu kirere [Canopy Walkway] na hoteli ziteye amabengeza nka One & Only Nyungwe House.

Iryo terambere ryagezweho n’impinduka mu mibereho myiza y’abaturage b’i Nyamagabe byaturutse ku mvune z’abikorera bagize uruhare mu gusora mu myaka 25 ishize Ikigo cy’Imisoro n’Amahoro gishinzwe.

Kuri ubu Abanyarwanda benshi basobanukiwe n’umusoro bawutanga batiganda, mu gihe harimo n’abagihina akaboko mu kuwutanga bikaba intandaro yo kutagera ku iterambere igihugu cyifuza.

Urebye ibyiza byo gutanga imisoro n’impinduka igira ku gihugu binyuze mu kubaka ibikorwaremezo ntiwazarira kuwutanga. Kuvuga ibyiza by’i Nyamagabe ntiwabirangiza, icyakora abahatuye bahavuga imyato.

Uburezi, ubuzima n’imibereho myiza ntibyarengejwe ingohe

Imyaka 25 ni myinshi mu mibare, ariko kandi ni mike cyane ugereranyije naho igihugu cyari kigeze biturutse ku mateka mabi cyanyuzemo yagejeje kuri Jenoside yakorewe Abatutsi mu 1994.

Byasabye imbaraga nyinshi mu kubaka igihugu mu nguni zose ngo hatagira agace gasigara inyuma mu iterambere, bijyanishwa no gusana imitima y’Abanyarwanda bagizweho ingaruka na Jenoside yakorewe Abatutsi mu 1994.

Mu nguni zose, Akarere ka Nyamagabe kahinduriwe ubuzima aho wasangaga abana benshi barataye amashuri ariko kuri ubu si ko biri kuko bayegerejwe hirya iyo mu mirenge.
Kuri ubu Nyamagabe ifite ibyumba by’amashuri byubatswe muri gahunda yo kugeza uburezi kuri bose, aho buri murenge ufite nibura ibyumba by’amashuri bitanu, aho asaga miliyari 10 Frw amaze gukoreshwa.

Umuyobozi w’Akarere ka Nyamagabe, Niyomwungeri Hildebrand, yemeza ko hatewe intambwe idasanzwe mu iterambere no kugeza uburezi kuri bose.

Ati “Ubu buri murenge wacu ufite ibigo by’amashuri bitari munsi ya bitanu kandi murabizi ko mbere y’imyaka 25 ibigo by’amashuri wasangaga bibarirwa ku ntoki. Ni amashuri menshi kuko dusigaye dufite ibigo bisaga 150.”

Mu buvuzi, havuguruwe hanubakwa ibitaro bibiri byari bisanzwe birimo ibya Kaduha na Kigeme, ibigo nderabuzima, amavuriro y’ibanze 40 n’izindi ziri kubakwa.

Hanubatswe ibikorwaremezo bifasha mu mitangire inoze ya serivisi nk’ibiro by’imirenge, utugari n’ibiro by’Akarere ka Nyamagabe byatwaye asaga miliyari 1 Frw.

Inzara yabaye umugani, ubutaka bwashariraga butanga umusaruro

Imwe mu nenge ikomeye Akarere ka Nyamagabe kari gafite, ni inzara idashira yaterwaga no guhinga ku butaka bushaririye, bigatuma budatanga umusaruro ukwiye.

Niyomwungeri yemeza ko mu guhangana n’inzara muri Nyamagabe byatwaye imbaraga zidasanzwe zirimo gutunganya ibishanga no guhuza ubutaka, gukoresha ifumbire mvaruganda n’ishwagara.

Ati “Muri rusange kuri buri gice gikora ku buzima bw’umuturage wacu twubatse byinshi, kandi twageze kuri byinshi bituma uhageze, yaragaherukagamo mbere y’imyaka 25 ahita bona impinduka.”

Kuri ubu ubutaka bwashariraga butatse imyaka inyuranye by’umwihariko ibirayi, ingano n’icyayi ku buryo umusaruro w’ibikomoka ku buhinzi wiyongereye.

Yemeza ko inzara yabaga muri Nyamagabe mu myaka 25 yashize bikaba ibintu bigenda binagabanya igwingira ry’abana kuri ubu riri kuri 33, 6%. Mu gihe mbere wasangaga umubare munini w’abayituye bari mu murongo utukura ku bijyanye n’imirire.

Abaturage b’i Nyamagabe bagaragaza ko bavuye kure bigendanye naho bageze uyu munsi nk’uko Hakizimana Eliphase wo mu Murenge wa Gasaka yabigarutseho.

Ati “Kera twajyaga guhinga kuko hari amashinge twahinga ntibyere, ariko ubu haje amashwagara haza ifumbire mvaruganda kandi turahinga tukeza. Iyo urebye ubona ko iterambere ryaje kuko turahinga tukeza, inyubako zirazamurwa, imihanda irubakwa ibyo byose bitwereka neza iterambere.”

Kuri ubu hubatswe amakusanyirizo y’imbuto, imihanda ihuza imirenge yorohereza ubuhahirane no kugeza umusaruro ku isoko nubwo hakiri ikenewe kugira ngo iterambere ryihutishwe.

Mu guharanira gukura abaturage ba Nyamagabe mu bukene hubatswe ibikorwaremezo bitandukanye birimo udukiriro twifashishwa mu guhanga udushya, amasoko ya Kijyambere nk’irya Nyamagabe ryatwaye asaga miliyari 1,5 Frw.

Hubatswe kandi imiyoboro itandukanye y’amashanyarazi n’amazi kugira ngo abaturage bagerweho n’amazi meza ndetse bave no mu mwijima.

Mu Mujyi wa Nyamagabe kandi hubatswe imihanda ya kaburimbo, ihuza ibice by’umujyi ikanifashishwa mu buhahirane, ibintu byahinduye ishusho ya Nyamagabe.

Ubuyobozi bw’akarere bushingiye ku bikorwa byagezweho binyuze mu misoro, mu misoro bwahamagariye abaturage gukomeza gahunda yo gutanga umusoro neza kuko “iyo udasora neza uba uri kwihombya”.

Udukiriro twarubatswe, abaturage bihangira imirimo
Uduce dutandukanye twagiye dutezwa imbere
Ubutaka buteraga kuri ubu bwamezeho icyayi giteye amabengeza
Nyamagabe ifite igice kinini gikora ku Ishyamba rya Nyungwe
Mu Karere ka Nyamagabe hari n'amashuri ageretse
Mu Karere ka Nyamagabe hari n'amashuri ageretse
Mu Karere ka Nyamagabe hubatswe imihanda itandukanye
Isoko rya Kijyambere rya Nyamagabe ryatwaye asaga miliyari 1 Frw
Iki kiraro kiri mu bituma Akarere ka Nyamagabe gasurwa n'abatari bake
Ibitaro bya Kigeme byaravuguruwe bivuye mu mbaraga z'imisoro
Ibigo by'amashuri byubatswe mu buryo bugezweho bikagira ndetse byanashyiriweho ubwiherero bwiza
Abo mu Gakiriro ka Nyamagabe bazi gukora neza intebe, ameza n'utubati
Abivuriza mu Bitaro bya Kigeme bemeza ko ari ingirakamaro
Abakora mu dukiriro bagaragaza ko hari byinshi byahindutse mu mibereho yabo
Abatuye Nyamagabe bishimira iterambere aka karere kagezeho
Uyu yari avuye kubyarira mu Bitaro bya Kigeme. Yemeje ko kuva aho bivugururiwe ababigana bahabwa serivisi nziza kandi zihuta
Umuyobozi w’Akarere ka Nyamagabe, Niyomwungeri Hildebrand, yemeza ko hatewe intambwe idasanzwe mu iterambere

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .